الماتىدا ەر ادام ءۇيىنىڭ تەرەزەسىنەن وق جاۋدىردى
08:40, 17 - ءساۋىر 2023
الماتى. قازاقپارات - الماتى قالاسىندا ماس ەر ادام ءۇيىنىڭ تەرەزەسىنەن وق جاۋدىردى، دەپ حابارلايدى قازاقپارات Polisia.kz-كە سىلتەمە جاساپ.
الماتى قالاسىنىڭ اۋەزوۆ اۋدانىنداعى ۇيلەردىڭ بىرىندە ەر ادامنىڭ پاتەر تەرەزەسىنەن وق اتقانى تۋرالى حابارعا دەرەۋ پاترۋلدىك پوليتسيا قىزمەتكەرلەرى مەن پوليتسيانىڭ ارنايى جاساعى اتتانعان.
«ناتيجەسىندە، 1959 -جىلى تۋعان ازامات ك. ۇستالدى. ول الكوگولدى ماساڭ كۇيدە ءوز اتىنا تىركەلگەن اڭشى مىلتىعىنان بىرنەشە رەت وق اتقاندىعى بەلگىلى بولدى. زارداپ شەككەندەر جوق. ونىڭ ارەكەتىنە قۇقىقتىق باعا تەرگەۋ بارىسىندا بەرىلەتىن بولادى. ق ر قىلمىستىق- پروتسەسسۋالدىق كودەكسىنىڭ 201-بابىنا سايكەس وزگە مالىمەتتەر جاريا ەتۋگە جاتپايدى»، - دەلىنگەن پوليتسيا حابارلاماسىندا.