گەرمانيا سەنبى كۇنى سوڭعى ا ە س جۇمىسىن توقتاتپاقشى

بەرلين. قازاقپارات - سەنبى كۇنى گەرمانيا قالعان بارلىق اتوم ەلەكتر ستانسيالارىنىڭ جۇمىسىن تولىق توقتاتۋدى جوسپارلاپ وتىر. ماسەلە ءۇش ەنەرگوبلوك تۋراسىندا بولىپ وتىر.

جوسپار بويىنشا، ولار بىلتىر جىل سوڭىندا جابىلۋى كەرەك ەدى. ءبىراق ۋكرايناداعى جاعداي مەن سودان بولعان ەنەرگەتيكالىق داعدارىس بۇل قادامدى كەيىنگە شەگەرۋگە ءماجبۇر ەتتى. سول كەزدە سوڭعى رەاكتورلاردى قالدىرىپ قانا قويماي، جۇمىسى توقتاعاندارىن قايتا ىسكە قوسۋ كەرەكتىگى دە ايتىلدى. الايدا ۇكىمەت «اتوم ەنەرگەتيكاسىنىڭ ۇزاقمەرزىمدى قاۋىپ- قاتەرىن باقىلاۋ مۇمكىن» ەمەستىگىن العا تارتتى.

«بولشەكتەۋ سەحىندا ءبىز نەگىزگى بولىكتەردى، ياعني بۋ گەنەراتورلارى مەن رەاكتورلاردىڭ بىتەۋ كورپۋستارىن بولشەكتەيمىز جانە بۇل ىسپەن 40-شى، ءتىپتى 50-جىلدارعا دەيىن اينالىسامىز. ال بولشەكتەۋ سەحىنىڭ ءوزىن بولشەكتەۋ 60-جىلدارعا جوسپارلانعان»، - دەپ اتاپ ءوتتى ا ە س ۋتيليزاتسياسىمەن اينالىساتىن كومپانيا وكىلى كۋرت رادلوفف.

ساۋالناما بويىنشا، نەمىستەردىڭ تورتتەن بىرىنەن ءسال عانا اسقان بولىگى ا ە س- تەن باس تارتۋدى قولداعان. ۇشتەن ەكىسى اتوم ەنەرگەتيكاسىن ساقتاپ قالۋدى نەمەسە كەم دەگەندە، رەاكتورلاردى پايدالانۋ مەرزىمىن ۇزارتۋدى قولداپ داۋىس بەرگەن. ستانسيا جابىلۋىنا قارسى شىعۋشىلار كەلتىرگەن ارگۋمەنتتەردىڭ ءبىرى -قۇرىلعىلار مەن يادرولىق قالدىقتاردى جويۋ قۇنى تىم جوعارى.