تەحنولوگيا ءتىلىن مەڭگەرۋدە: وسكەمەن ىرگەسىندەگى اۋىلدا وقۋشىلار كىتاپحانادان شىقپايدى

وسكەمەن. قازاقپارات - وسكەمەن ىرگەسىندە ورىن تەپكەن شىعىس اۋىلىنداعى بالالاردىڭ كۇن سايىن باراتىن جەرى - كىتاپحانا.

نەگە دەسەڭىز، ولاردى روبوتوتەحنيكا، 3D مودەلدەۋ سىندى زاماناۋي ۇيىرمەلەر قىزىقتىرادى. IT ورتالىققا اينالعان رۋحانيات وشاعى دا كۇن سايىن تۇرلەنىپ، جاڭا جابدىقتارمەن تولىعۋدا. جۋىقتا قازاقپارات ءتىلشىسى سول كىتاپحاناعا بارىپ، ونداعى تىنىس-تىرشىلىكتى كورىپ قايتقان ەدى.

جاقىندارىنا سىيلىق جاسايدى

شىعىس اۋىلىندا ورالحان بوكەي اتىنداعى ورتالىقتاندىرىلعان كىتاپحانا جۇيەسىنىڭ №12-فيليالى ورنالاسقان. بۇل ەلدى مەكەندە تۇراتىن حالىقتىڭ دەنى - قانداستار.

شىنىن ايتۋ كەرەك، وسكەمەننىڭ شەتىندەگى وسى اۋىلدا ۋاقىتتى ءتيىمدى ءارى قىزىقتى وتكىزەتىن ورىن جوق. سوندىقتان بالالار كىتاپحاناعا ءجيى كەلەدى.

تەك ءىش پىسقاننان ەمەس، مۇنداعى سان ءتۇرلى ۇيىرمەلەردەن قالىس قالماۋ ءۇشىن.

- كىتاپحانا تەك كىتاپ وقيتىن جەر ەمەس. بىزگە كەلەتىن ءار بالانى كىتاپ وقۋعا باۋلۋدان بولەك، جان- جاقتى دامۋىنا جاعداي جاساۋعا تىرىسىپ جاتىرمىز. ماسەلەن، «شەبەر قولدار» ۇيىرمەسىندە جۇمساق قاعاز بەن ءار ءتۇرلى زاتتاردان بۇيىمدار جاساۋدى ۇيرەتەمىز. وزدەرىنىڭ قيالدارىنا دا ەرىك بەرگىزەمىز، - دەيدى ورالحان بوكەي اتىنداعى №12-كىتاپحانا- بولىمشەسىنىڭ كىتاپحاناشىسى ايداريعا ءاشىراپ.

وقۋشىلار وسىندا اتا-اناسىنا، جاقىندارىنا سىيلىقتار جاسايدى. ۇيىرمەگە بارلىعى 20 عا جۋىق بالا كەلەدى.

- «توعىزقۇمالاق» ۇيىرمەسىنە قاتىساتىندار دا از ەمەس. تۇراقتى تۇردە 15 بالا كەلگەنىمەن، كىتاپحاناعا باس سۇعىپ جۇرگەندەر تۇگەل دەرلىك توعىزقۇمالاق ويناپ ۇيرەنىپ العان. ارا- تۇرا ولاردىڭ اراسىندا بايقاۋ دا ۇيىمداستىرامىز. ال «جاس قالامگەر» ۇيىرمەسىندە كەلۋشىلەردى ساۋاتتىلىققا، وقۋعا جانە جازۋعا دەگەن قۇشتارلىققا باۋليمىز، مەكتەپتەگى تاپسىرمالاردى شىعارماشىلىقپەن ورىنداۋعا كومەكتەسەمىز. ياعني، شىعارمانى شەبەر جازۋىنا، مازمۇن ايتۋدا ءوز ويىن اشىق ءارى ەركىن جەتكىزە بىلۋىنە سەپتىگىمىزدى تيگىزەمىز. بايقاساڭىز، قازىرگى بالالارعا وقىعانىن ەستە ساقتاپ، ايتىپ بەرۋدىڭ ءوزى قيىندىق تۋدىرادى. قولعا قالام الىپ، ويىنداعىن قاعازعا ءتۇسىرۋ - ءتىپتى ماشاقات. اپتاسىنا 2 رەت جۇرگىزىلەتىن بۇل ۇيىرمەنىڭ ماقساتى - وسىنداي بالالارعا بارىنشا كومەك كورسەتۋ، - دەيدى ايداريعا ءاشىراپ.

راس، وسى زامان بالالارىنىڭ سوزدىك قورى تىم جۇتاڭ. بالكىم بۇعان ۇيالى تەلەفوننىڭ اسەرى بار شىعار.

ارينە، ءسات سايىن دامىپ كەلە جاتقان تەحنولوگيانى شەتكە ىسىرىپ تاستاي المايمىز. ءبىراق ونى تەك جاقسى قىرىنان پايدالانا بىلگەنىمىز ءجون.

تەحنولوگيا دەمەكشى، جۋىقتا كىتاپحاناعا جاڭا زاماناۋي جابدىقتار اكەلىنگەن.

- بالالار جاڭا زامان تەحنولوگيالارىن مەڭگەرۋى ءۇشىن «جاس IT مامانى» جوباسى اياسىندا كىتاپحانا جاڭا تەحنولوگيامەن جابدىقتالدى. سونىڭ ارقاسىندا قازىر بالالار روبوتوتەحنيكا، ياعني لەگو قۇراستىرعىشتارىمەن، 3D ۇلگىلەۋ جانە ۇلگىنى 3D پرينتەرمەن باسىپ شىعارۋ، «PAPER CRAFT» ءارتۇرلى بەينەلەردى قاعازبەن جاساۋ سياقتى جۇمىستاردى ۇيرەنۋدە. بالالاردىڭ قىزىعۋشىلىقتارى وتە جوعارى. ءوز قيالدارىنداعى ءتۇرلى روبوتتاردى جاساپ، ولاردى جۇرگىزۋگە ارنالعان باعدارلامانى مەڭگەرىپ الدى. سونىمەن قاتار جاڭا زاماناۋي ۇلگىدەگى ساندىق سەنسورلىق پانەلمەن ءوز شىعارماشىلىقتارىن ارتتىرىپ، ءتۇرلى سۋرەتتەر سالىپ، تانىمدىق بەينەجازبالاردى تاماشالاۋدا. قىزىعاتىن بالالار سانىنىڭ كوبەيۋىنە بايلانىستى ۇيىرمەلەردىڭ سانىن ارتتىرىپ جاتىرمىز. بولاشاقتا دا بالالاردىڭ بۇدان دا جوعارى دەڭگەيدە مەڭگەرەتىندىگىنە بەك سەنىمدەمىز، - دەيدى كىتاپحانا بولىمشەسىنىڭ مەڭگەرۋشىسى اينار جارقىن.

سيفرلىق الەمگە بويلايدى

تاياۋدا رۋحانيات وشاعىندا «IT ARU» مەكتەبى ءوز جۇمىسىن باستادى. وندا 12-17 جاس ارالىعىنداعى قىزدارعا ساندىك، ونىڭ ىشىندە ۇلتتىق كيىمدەردى ۆيرتۋالدى تۇردە ۇلگىلەۋدى ۇيرەتەدى.

ءسويتىپ جاس ءوسپىرىم قىزدار مەن بويجەتكەندەر سيفرلىق الەمگە بويلايدى.

- وقۋشىلارعا ۇيىرمە ۇناپ جاتىر دەگەن ويدامىن. سەبەبى قىزدار تاعى دا كەلگىلەرى كەلەتىندىگىن ايتتى. بۇگىنگى ساباقتا ارنايى كومپيۋتەرلىك باعدارلاما ارقىلى سيفرلىق جەڭىل قىسقا جەيدە مەن فۋتبولكا جاسادىق. وعان 40 مينۋتتاي ۋاقىت كەتتى. ءوزىمنىڭ بۇل باعدارلامامەن جۇمىس ىستەۋدى ۇيرەنگەنىمە 1 جىلداي ۋاقىت بولدى. وسكەمەندەگى كىتاپحانادا ءدال وسى بالالار سەكىلدى «IT ARU» مەكتەبىنە قاتىسقان ەدىم، - دەيدى ۇيىرمە جەتەكشىسى، ۆيرتۋالدى ديزاينەر انەل رۋسلانوۆا.

ورالحان بوكەي اتىنداعى ورتالىقتاندىرىلعان كىتاپحانالار جۇيەسى ديرەكتورىنىڭ ورىنباسارى ايگۇل احمەتجانوۆانىڭ ايتۋىنشا، №12-فيليالعا زاماناۋي جابدىقتاردى الۋعا «كازسينك» كومپانياسى دەمەۋشىلىك كورسەتكەن.

- وسىلايشا، قانداستارعا، از قامتىلعان جانە كوپبالالى وتباسىلاردىڭ بالالارىنا ۋاقىتتى پايدالى وتكىزۋگە مۇمكىندىك جاسالۋدا. بالالار مەكتەپتەن شىعا سالا كىتاپحاناعا جۇگىرەدى. ءتىپتى ىشكە سىيماي قالىپ تا جاتادى. ارينە، بۇنى كورىپ قۋانامىز. مۇندا قولعا الىنىپ جاتقان ۇيىرمەلەر مەن جەتكىزىلگەن جاڭا تەحنيكالاردىڭ بارلىعى ەل بولاشاعىن تۋ ەتكەن سول بالالار ءۇشىن، - دەيدى ول.

قانداستاردىڭ اراسىندا ورىس ءتىلىن بىلەتىندەر نەكەن ساياق ەكەندىگى ءمالىم. سول ءۇشىن وسىندا ءتىل ۇيرەتەتىن ۇيىرمە اشىلعان. وندا تەك بالالار ەمەس، ەرەسەكتەر دە كەلە الادى.

- بۇدان بولەك، كومپيۋتەردى بۇزىپ- شاشىپ، قايتا قۇراستىرۋدى ۇيرەتەتىن ۇيىرمەمىز بار. بايقاعان شىعارسىزدار، ۇيىرمەلەردىڭ كوبى تەحنولوگيالارعا قاتىستى. سەبەبى بالالار تەحنيكا ءتىلىن مەڭگەرىپ، سول باعىتتى تاڭداپ، كەلەشەكتە جۇمىسقا دا ورنالاسىپ جاتسا نۇر ۇستىنە نۇر. تەحنولوگيا زامانىندا ەلىمىزدە وسىنداي ماماندار اۋاداي قاجەت، - دەيدى ايگۇل احمەتجانوۆا.

اشىلعالى بەرى قاتىسىپ ءجۇر

وسى ورايدا كىتاپحاناعا كەلىپ جۇرگەن بالالارمەن دە سويلەسىپ كوردىك.

اپتاسىنا ەكى رەت بولاتىن «روبوتوتەحنيكا» ۇيىرمەسىنەن ءبىر رەت تە قالماعان، جاقسى ناتيجەلەرگە قول جەتكىزىپ جۇرگەن ەكى بالا بار. ولار - 5-سىنىپتا وقيتىن ەرداۋلەت باقىتجان مەن قاراتاي جانىبەك.

- «روبوتوتەحنيكا» اشىلعالى بەرى قاتىسىپ ءجۇرمىز. قاتتى ۇنايدى. روبوتتار جاسايمىز، كومپيۋتەرلىك باعدارلاما ارقىلى ونى باسقارامىز. ءبىر روبوتقا 2-3 ساعات ۋاقىت كەتەدى. ەگەر جەڭىل روبوت بولسا، جارتى ساعاتتا جاساي الامىز. كەلەشەكتە ادام روبوت پەن تىركەمەلى تراكتور جاساعىمىز كەلەدى. وسكەندە IT مامانى بولامىز، - دەيدى جاس ورەندەر.

9 جاستاعى مادينا كوكەنگە «PAPER CRAFT» ۇيىرمەسى ۇنايدى. قاتىسىپ جۇرگەنىنە 2 اي بولىپتى.

- وسىندا ساۋساعىمىزدى قيمىلداتىپ ءتۇرلى زاتتار جاساپ، لوگيكامىزدى ارتتىرامىز. ءوزىم قاعازدان جۇرەك پىشىنىندەگى قوبديشا مەن ماسكا جاسادىم. الداعى ۋاقىتا مۋلتفيلمدەردەگى كەيىپكەرلەردى، اتاپ ايتقاندا ماشانى جاساعىم كەلەدى. «جاس قالامگەر» ۇيىرمەسىنە دە قاتىسامىن. سەبەبى ماعان شىعارما جازعان ۇنايدى. سىنىپتاستارىما، قۇربىلارىما كىتاپحاناداعى ۇيىرمەلەر تۋرالى ۇنەمى ايتىپ جۇرەمىن. كەلەشەكتە دارىگەر بولعىم كەلەدى، - دەيدى ول.

P. S: وسىلايشا، شىعىس اۋىلىنداعى كىتاپحاناعا باراتىن بالالار وزدەرىنە كەرەك بولاتىن داعدىلاردى ۇيرەنىپ، تەحنولوگيانى مەڭگەرىپ ءجۇر. ولاردىڭ اراسىنان بولاشاقتا بيىك شىڭداردى باعىندىرىپ، ەل ابىرويىن اسقاقتاتاتىن اردا ازاماتتاردىڭ شىعاتىندىعىنا سەنىمىمىز كامىل.