ۇمىت بولعان ويۋلار

استانا. قازاقپارات - ۇلىستىڭ ۇلى كۇنى مەرەكەسىنە وراي تارازداعى ىقىلاس دۇكەن ۇلى اتىنداعى قالالىق مادەنيەت ۇيىندە «ۇمىت بولعان ويۋلار» اتتى قۇراقشىلار فەستيۆالى ۇيىمداستىرىلدى.

قولونەرشىلەردىڭ تۋىندىلارى ورنالاستىرىلعان كورمەنى تاماشالاعانداردىڭ قاتارىنان تابىلعان تاراز قالاسىنىڭ اكىمى باقىتجان ورىنبەكوۆ ۇلتتىق تانىم مەن داستۇردەن قول ۇزبەگەن وڭىردە مۇنداي ءىس- شارالار ءجيى ءوتۋى كەرەكتىگىن ايتتى.

- قازاقتىڭ ويۋ-ورنەك ونەرى - ءالىمساقتان بەرى حالقىمىزبەن جاساسىپ كەلەدى. سان عاسىرلىق تاريحىمەن بىتە قايناسقان بۇل ونەر ءتۇرى حالىقتىڭ شىنايى رۋحاني تانىمىمەن دە استاسىپ جاتىر. ويۋ- ورنەك - قازاق ەلىنىڭ مادەني دامۋىنىڭ شەجىرەسى. ونىڭ كونە اتاۋى - حالىقتىڭ تاريحى مەن مادەنيەتىن، ۇلتتىق ەرەكشەلىگىن، دۇنيەتانىمىن سيپاتتايدى.

قازىرگى جاھاندانۋ داۋىرىندە ءبىزدىڭ قازاقى ويۋ-ورنەگىمىزدىڭ ءبىرشاما ءتۇرى ۇمىتىلىپ بارادى. بۇل كوڭىل قىنجىلتار جاعداي. سەبەبى بۇگىنگى وسكەلەڭ ۇرپاق قازاقتىڭ وسى باعا جەتپەس قۇندىلىعىنىڭ ماڭىزىن ءتۇسىنىپ، ساناسىنا توقۋى قاجەت.

بۇگىنگى فەستيۆالگە قاتىسۋشىلار ۇمىت بولعان ۇلتتىق قۇندىلىعىمىزدى ۇلىقتاپ، جاس بۋىننىڭ ساناسىنا ساۋلە ۇيالاتادى دەگەن سەنىمدەمىن.

جالپى، بۇل ءىس-شارا مىڭداعان جىلدار بويى قالىپتاسقان ۇلتتىق ويۋ-ورنەكتەرىمىزدى مىنا الماعايىپ زاماندا امان ساقتاپ، جاستارىمىزدىڭ بويىندا جاڭعىرتۋعا باعىتتالىپ وتىر. سوندىقتان فەستيۆالگە قاتىسقان بارشا انالارعا العىسىمدى بىلدىرەمىن، - دەيدى ب. ورىنبەكوۆ.

فەستيۆال سوڭىندا بايقاۋ جەڭىمپازدارى مەن جۇلدەگەرلەرى ارنايى ماراپاتتارعا يە بولدى.

فەستيۆال اياسىندا «شاپاعات» مەدالىنىڭ يەگەرى، كاسىپكەر انار بەكسۇلتانوۆا مەن شاكىرتتەرىنىڭ تۋىندىلارى كوپشىلىك نازارىنا ۇسىنىلىپ، شەبەرلىك سىنىبى ۇيىمداستىرىلدى.

تابيعات مۇسىلمانقۇل

تاراز

Egemen Qazaqstan