پارلامەنتتىڭ جالپى وتىرىستارىن تەلەارنادان تىكەلەي ەفيردە كورسەتۋ قاجەت - پرەزيدەنت
بۇل تۋرالى پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ەندى ۇكىمەت شىن مانىندە ەسەپ بەرەتىن ۇكىمەتكە اينالادى. مينيسترلەردىڭ ءوز جۇمىسىن جەتىك ءبىلۋى عانا جەتكىلىكسىز. ولار ءوز ۇستانىمىن پارلامەنت الدىندا قورعاۋعا قابىلەتتى بولۋعا ءتيىس. ءوز باستامالارىن قوعامعا انىق ءتۇسىندىرۋى قاجەت. قازىر ۇكىمەتتىڭ قاتەلىگى مەن كەمشىلىگىن اشىق ايتىپ، جونگە سالىپ وتىرۋعا تولىق مۇمكىندىك بار. وسى مۇمكىندىكتى حالىق مۇددەسى ءۇشىن دۇرىس پايدالانۋ كەرەك»، - دەدى مەملەكەت باسشىسى.
پرەزيدەنت پارلامەنتتىڭ ءوز جۇمىسى دا بارىنشا اشىق بولۋعا تيىستىگىن باسا ايتتى.
«بۇگىندە ونىڭ جيىندارى ينتەرنەت ارقىلى كورسەتىلەدى. بۇل جاقسى ۇردىسكە اينالدى. وعان جۋرناليستەر دە، قالىڭ كوپشىلىك تە قىزىعۋشىلىق تانىتادى. پارلامەنتتە اسا ماڭىزدى ماسەلە تالقىلانسا، جالپى وتىرىستى مەملەكەتتىك تەلەارنا ارقىلى تىكەلەي ەفيردە كورسەتۋ قاجەت دەپ سانايمىن. ازاماتتار وزدەرى سايلاعان دەپۋتاتتىڭ قالاي جۇمىس ىستەيتىنىن ناقتى كورىپ، باعا بەرە الادى. پارلامەنتتەگى پىكىرتالاستار، شىن مانىندە جالپىۇلتتىق اۋقىمعا يە بولادى. سونىمەن بىرگە، بۇل ءتاسىل اشىق ساياسات جۇرگىزۋدىڭ جاڭا ستاندارتتارىن قالىپتاستىرۋعا، قوعامدىق ديالوگ مادەنيەتىن دامىتۋعا سەپتىگىن تيگىزەدى»، - دەدى قاسىم-جومارت توقايەۆ.
سونىمەن قاتار «سايلاۋ الدىنداعى ۋادەلەر رەتىمەن ورىندالۋى كەرەك»، دەدى قاسىم-جومارت توقايەۆ.
مەملەكەت باسشىسى قاسىم-جومارت توقايەۆ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىندا سايلاۋ الدىنداعى ۋادەلەر مەن باعدارلامالاردى ورىنداۋدىڭ ماڭىزدىلىعىنا توقتالدى، دەپ حابارلايدى قازاقپارات ءتىلشىسى.
«مەملەكەتتىك باسقارۋدىڭ تيىمدىلىگىن جانە ستراتەگيالىق جوسپارلاۋدىڭ ساپاسىن كوتەرۋ قاجەت. سايلاۋ الدىنداعى باعدارلامالار جانە ۋادەلەر رەتىمەن ورىندالۋى كەرەك. سوندا ازاماتتاردىڭ بيلىككە جانە شىنايى وزگەرىسكە دەگەن سەنىمى ارتادى»، - دەدى پرەزيدەنت.
مەملەكەت باسشىسىنىڭ پايىمىنشا، رەفورمالاردى ازىرلەۋ جانە جۇزەگە اسىرۋ ىسىندە مەملەكەتتىك قىزمەتشىلەر ماڭىزدى ءرول اتقارادى.
«سول سەبەپتى، جۇمىسقا ىنتاسى بار جانە جوعارى بىلىكتى مامانداردى مەملەكەتتىك قىزمەتكە تارتۋ كەرەك. جەكە سەكتوردا جۇرگەن كاسىبي جانە دارىندى باسقارۋشىلار ءۇشىن جول اشىق بولۋعا ءتيىس. بىزگە مەملەكەتتىك قىزمەتتىڭ بارىنشا ۇيلەسىمدى ۇلگىسىنە كوشۋ قاجەت. ورتالىققا جالتاقتاماي، جەرگىلىكتى جەردە ماسەلەنى شەشۋگە داعدىلانۋ كەرەك. مەملەكەتتىك ورگاندارداعى جۇمىستى ۇيىمداستىرۋ مادەنيەتىن دە تولىق جاڭعىرتقان ءجون»، - دەدى قاسىم-جومار توقايەۆ.
ايتا كەتەيىك، ەلوردادا VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسى ءوتىپ جاتىر. جيىنعا مەملەكەت باسشىسى قاسىم-جومارت توقايەۆ قاتىسۋدا.