ءبيبىسارا اساۋبايەۆا: بىرەۋدىڭ نامىسىنا تيسەم، كەشىرىم سۇرايمىن
«ءۇندىستانداعى گران- پري جارىسىندا بولىپ جاتقان بەيبەرەكەتسىزدىكتى «كوبەلەك ەففەكتىسىنە» تەڭەۋگە بولادى. جاعانىڭ ءبىر جاعاسىنداعى سەرپىلگەن قاناتتان تۋىنداعان «سۋنامي» قارسى جاعاداعى ءبىزدى جاۋىپ قالدى. كەشە مەن اڭگىمەلەگەن ءبىر ەپيزود ەندى نە ىستەۋىمىز كەرەكتىگىن تۇسىنە المايتىنداي سالدارعا اكەلدى.
كەشە مەن قىزبالىققا سالىنعان شىعارمىن (ول ءۇشىن وزىمە تيەسىلى حەيتتەر لەگىن الىپ ۇلگەردىم دە). ءسوز جوق، سۋىق سانانىڭ الدىندا جۇرەتىن ەموتسيالار دا ءبىراز دۇنيەنى ءبۇلدىرۋى مۇمكىن. بۇل بارىمىزگە ساباق بولسىن. شاحماتشىعا بىرنەشە قادامدى الدىن الا ويلاۋ كەرەك - اسىرەسە ومىردە سونداي قابىلەتتىڭ بولعانى جاقسى. ويتكەنى ومىردەگى قاتەلىكتىڭ قۇنى شاحمات تاقتاسىنان الدەقايدا جوعارى. قاتەلەسكەن بولسام، مويىنداۋعا دايىنمىن»، - دەدى ول.
سونداي- اق، ول قازىر ەڭ اۋەلى ءتۋرنيردى ابىرويمەن اياقتاۋعا عانا مۇددەلى ەكەنىن اتاپ ءوتتى.
«ءبىراق قازىر مەن ءبىر عانا نارسەنى قالايمىن: نيۋ- دەليدە بولىپ جاتقان دۇنيەلەر ەش جەردە بولماسا ەكەن. سالعىرت ۇيىمداستىرۋ دا، ۇيقى قانباۋ دا، كوز جاسى دا، داۋ- داماي دا، قۇرساۋلى بەلگىسىزدىك تە، ءبىتىپ بەرمەيتىن، جالعان ءۇمىت سىيلايتىن ۋادەلەر دە بولماسا ەكەن.
شاحمات ويناپ، رەكوردتار ورناتىپ، ەلىمنىڭ ابىرويىن اسىرىپ، جاقىندارىمدى قۋانتقىم عانا كەلەدى. ءبىز بۇل جەرگە سول ءۇشىن كەلگەن ەدىك قوي. بىزگە سونداي مۇمكىندىك بەرەدى دە دەپ ۇمىتتەنەم.
قاسيەتتى رامازان ايىندا ويىڭنىڭ تازا، نيەتىڭنىڭ يگى بولعانى ايرىقشا ماڭىزدى. بىرەۋلەردىڭ نامىسىنا تيسەم، كەشىرىم سۇرايمىن. ونداي ماقساتىم بولعان جوق. قۇرمەتكە لايىق ادام جەتسىن!»، - دەپ جازدى شاحماتشى.
ەسكە سالساق، الەۋمەتتىك جەلىدە ءۇندى ەلىندەگى اتالمىش تۋرنيرگە قازاقستان اتىنان قاتىسۋعا بارعان ءبيبىسارا اساۋبايەۆا مەن جانسايا ابدىمالىك اراسنىدا كەلەڭسىز داۋى تۋىنداعان بولاتىن.
اۆتور
ەسىمجان ناقتىباي