بەيجىڭدە ناۋرىز مەرەكەسى تويلاندى

استانا. قازاقپارات - قازاقستاننىڭ قىتايداعى ەلشىلىگىندە ۇلىستىڭ ۇلى كۇنى - ناۋرىز مەيرامى ءداستۇرلى تۇردە اتالىپ ءوتتى.

مەرەكەگە بەيجىڭدەگى قازاق ەلىنىڭ ديپلوماتتارى مەن ولاردىڭ وتباسى مۇشەلەرى، شانحاي ىنتىماقتاستىق ۇيىمى حاتشىلىعىنىڭ جانە قازاقستان ۇلتتىق كومپانيالارى وكىلدىكتەرىنىڭ قىزمەتكەرلەرى، سونداي-اق قىتايداعى قازاق دياسپوراسىنىڭ وكىلدەرى مەن قىتاي جوعارى وقۋ ورىندارىندا ءبىلىم الىپ جاتقان قازاقستاندىق ستۋدەنتتەر قاتىستى.

سالتاناتتى ءىس-شارا اياسىندا قىتايداعى تانىمال جازۋشى، قىتايدىڭ حالىقتىق ساياسي كونسۋلتاتيۆتىك كەڭەسىنىڭ بۇرىنعى دەپۋتاتى، اباي قۇنانباي ۇلىنىڭ شىعارمالارىن قىتاي تىلىنە اۋدارعان قانداسىمىز اقبار ءماجيت جينالعان قاۋىمعا اق باتاسىن بەردى.

ەلشىلىك مەرەكەلىك كونتسەرت ۇيىمداستىرىپ، وندا بەيجىڭدە جۇمىس ىستەيتىن ديپلوماتتار مەن قازاقستاندىقتاردىڭ بالالارىمەن بىرگە جەرگىلىكتى قانداستار ءارتۇرلى نومىرلەرمەن ونەر كورسەتتى.

ارتىستەردىڭ ورىنداۋىنداعى «ناۋرىز مەرەكە»، «ناۋرىز-دۋمان» سياقتى قازاق اندەرى، «بالدىرعان»، «اققۋلار» سىندى بيلەرى جينالعان قاۋىمعا ەرەكشە كوڭىل-كۇي سىيلادى. سونىمەن قاتار اسىق اتۋ، ارقان تارتۋ، توعىزقۇمالاق سياقتى ۇلتتىق سپورت ويىندارى كوپشىلىكتىڭ كوڭىلىنەن شىقتى.

مەرەكەلىك جيىندا كوپشىلىككە ارنالعان ۇلتتىق تاعامداردىڭ داستارحانى مولىنان جايىلىپ، ۇلىستىڭ ۇلى كۇنىندەگى باستى تاعام - ناۋرىز كوجە ۇسىنىلدى.