قاشاعان مۇنايى اقتاۋ-باكۋ باعىتى ارقىلى تاسىمالدانا باستادى
17:28, 20 - ناۋرىز 2023
باكۋ. ازەرتادج - قازاقپارات - قازاقستاندىق «قاشاعان» كەنىشىنەن الىنعان مۇناي كاسپي تەڭىزى ارقىلى اقتاۋ-باكۋ باعىتىندا تاسىمالدانا باستادى، دەپ حابارلايدى قازاقپارات ازەربايجاننىڭ ازەرتادج اگەنتتىگىنە سىلتەمە جاساپ.
جاڭا باعىت بويىنشا تاسىمال «ازەربايجان كاسپيي تەڭىز پاروحودى» جاق (ASCO) تەڭىز كولىك فلوتىنا قاراستى «اكادەميك حوشباحت يۋسيفزادە» تانكەرىنىڭ كومەگىمەن جۇزەگە اسىرىلادى.
ازەرتادج اگەنتتىگىنىڭ حابارلاۋىنشا، ءبىرىنشى پارتيا اياسىندا تانكەردىڭ رەزەرۆۋارىنا بارلىعى 6900 توننا شيكى مۇناي تيەلگەن. اقتاۋ پورتىنان ساپارعا شىقان تانكەر ازەربايجاننىڭ «سانگاچال» تەرمينالىنا جەتكىزىلەدى.
ايتا كەتەيىك، پرەزيدەنت يلحام اليەۆتىڭ قاتىسۋىمەن 2022-جىلى ىسكە قوسىلعان «اكادەميك حوشباحت يۋسيفزادە» تانكەرى 7800 توننا جۇك كوتەرە الادى. بۇل تانكەرمەن مۇنايمەن قاتار حيميالىق ونىمدەردى دە تاسىمالداۋعا بولادى.