رەسەيدەگى ومبىدا قازاق ءتىلى مىندەتتى ءپان رەتىندە ەندى وقىتىلا باستادى

اقتوبە. قازاقپارات - ونداعى جاستار اراسىندا انا ءتىلىن بىلمەيتىندەردىڭ سانى ارتقان. رەسەيدىڭ ومبى قالاسىنداعى مەكتەپتەردە قازاق ءتىلى مىندەتتى ءپان رەتىندە وقىتىلادى.

بۇل تۋرالى Qazaqstan تەلەارناسى حابارلادى.

مامانداردىڭ ايتۋىنشا، وڭىردە قازاق تىلىنە سۇرانىس جوعارى. سوعان قاراماستان قالاداعى 11 مەكتەپتە ول تەك بەيىندىك ءپان رەتىندە وقىلىپ كەلگەن. سونىمەن قاتار ومبى قالاسىنداعى مەكتەپتەردە قازاق تىلىندەگى ساپالى وقۋلىقتار بولماعان. ال قازىر ءتىل ماماندارىنىڭ قاتىسۋىمەن جاڭا وقۋلىق ازىرلەنگەن.

ەگەر ءبىز بەيىندىك ءپان تۋرالى ايتساق، مۇنداي ساباققا بارعىسى كەلگەن وقۋشىلار عانا بارادى. سوندىقتان ءتىلدى تولىق مەڭگەرمەيدى. ال مىندەتتى ءپان رەتىندە ەنگىزىلسە، وقۋشىلار دا تولىق قاتىسادى. قازىر اتا-انالار تاراپىنان دا تىلگە دەگەن قىزىعۋشىلىق ارتقان. وسى سەبەپتى وزدەرى دە بالالارىنا قازاق ءتىلىن ۇيرەتۋگە تىرىسادى، - دەيدى مۇعالىم باتكەن سارسەنوۆا.

ازىرگە 1-4-سىنىپتارعا ارنالعان «الىپپە» مەن «قازاق ءتىلى» وقۋلىقتارى ساراپتامادان ءوتىپ، رەسەيلىك وقۋ باعدارلاماسىنا رەسمي ەنگىزىلگەن. الداعى ۋاقىتتا جوعارى سىنىپ ءۇشىن دە وقۋلىق دايىندالماق.

مەن 7-سىنىپتا وقيمىن. قازاق ءتىلىن 4-سىنىپتان باستاپ ۇيرەنىپ ءجۇرمىن. انا ءتىلىم بولعاندىقتان، مەڭگەرىپ، ەركىن سويلەگىم كەلەدى. الداعى ماقساتىم - وسى، - دەيدى وقۋشى جاسمين ءابدىرناسىروۆا.

ومبى جانە التاي مۇعالىمدەرى جاڭا وقۋلىقتار رەسەيدىڭ وزگە مەكتەپتەرىندە قولدانىسقا ەنىپ، قازاق ءتىلىن وقىتۋ اياسى كەڭەيەدى دەپ سەنەدى. جالپى وڭىردە ءتىلدى دامىتۋعا ەرەكشە ءمان بەرىلگەن.

سوڭعى جىلدارى جاستار اراسىندا قازاق ءتىلىن بىلمەيتىندەردىڭ سانى كوبەيدى. بۇل ولقىلىقتى جويۋ ءۇشىن ءتىل ۇيىرمەلەرىنىڭ دە سانىن ارتتىردىق. ەندى قازاقتاردىڭ مۋزەيى مەن كىتاپحاناسىن اشۋدى جوسپارلاپ وتىرمىز، - دەدى «ومبى قازاقتارى» قوعامدىق ۇيىمىنىڭ ءتوراعاسى قۋانىش ەلەۋتايەۆ.

بۇگىندە ومبى وبلىسىندا 70 مىڭعا جۋىق قازاق تۇرادى. سوندىقتان مۇعالىمدەر انا ءتىلىن بارلىق مەكتەپ پەن بالاباقشادا وقىتۋ كەرەك دەپ ەسەپتەيدى.