سايلاۋعا كەلگەن الماتىلىقتارعا ناۋرىز كوجە مەن باۋىرساق تاراتىلىپ جاتىر

الماتى. قازاقپارات - ەلىمىزدەگى سايلاۋ ۋچاسكەلەرى ەڭ كوپ شوعىرلانعان الماتى قالاسىندا دا داۋىس بەرۋ قىزۋ ءجۇرىپ جاتىر. ءدال قازىرگى ۋاقىتتا حالىقتىڭ سايلاۋ ايماقتارىنا كەلۋ قارقىنى ارتتى، دەپ حابارلايدى قازاقپارات ءتىلشىسى.

ەلىمىزدىڭ ماڭىزدى وقيعاسىنان شەت قالماي، ءوز تاڭداۋىن جاساۋعا كەلگەن قالا تۇرعىندارىنىڭ كوڭىل- كۇيى كوتەرىڭكى. ءار سايلاۋ ۋچاسكەسى سايلاۋشىلارىن ەرەكشە كۇتىپ الۋعا تىرىسىپ جاتىر. وقۋشىلار سارايىندا ورنالاسقان №377-سايلاۋ ۋچاسكەسى كەلۋشىلەرگە ناۋرىز كوجە مەن ىستىق باۋىرساقتان ءدام تاتقىزۋدا.

«ءبىزدىڭ سايلاۋ ۋچاسكەسى 2569 ادامعا شاقىرۋ قاعازىن بەرگەن بولاتىن. تۇرعىندار بەلسەندى اتسالىسىپ جاتىر. كوڭىل كۇيلەرى وتە جاقسى. ءبىز دە ءوز تاراپىمىزدان بارىنشا جاعداي جاساۋعا تىرىسىپ جاتىرمىز. سايلاۋشىلاردى اۋەزدى انمەن قارسى الىپ، كوجە مەن باۋىرساق ۇسىنۋدامىز»، - دەيدى №377-ۋچاسكەلىك سايلاۋ كوميسسياسىنىڭ ءتوراعاسى اسيا ماليموۆا.

سونداي-اق اتالعان سايلاۋ ۋچاسكەسىنە العاشقىلاردىڭ ءبىرى بولىپ كەلگەن مامىرقۇلوۆتار سىيلىق الدى.

«وسى ۋاقىتقا دەيىن ەشقانداي ساياسي ناۋقاننان تىس قالعان ەمەسپىن. بالا-شاعاممەن كەلىپ، داۋىس بەرۋ وتباسىلىق داستۇرگە اينالدى. ارينە ءارقايسىمىز ءوز تاڭداۋىمىزدى جاسادىق. ويلاماعان جەردەن سىيلىققا يە بولدىق»، - دەيدى قالا تۇرعىنى ايدا.

ايتا كەتەيىك، مەگاپوليستە 600 دەن استام سايلاۋ ۋچاسكەسى جۇمىس ىستەپ جاتىر.