ناۋرىزداعى ونلاين-فەستيۆال: جۇلدەگەرلەر قازاقستاننىڭ كورىكتى جەرلەرىنە ساياحاتتايدى
قوسىمشانى پايدالانۋشىلار ناۋرىز-2023 حەشتەگىمەن ۇلتتىق مەرەكە، ونىڭ ەرەكشەلىكتەرى مەن ادەت-عۇرىپتار تۋرالى ۆيدەوروليكتەر تۇسىرەدى.
بۇل تۋرالى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ حابارلايدى.
ناۋرىز ادامداردى تابىستىرادى، ونلاين-فەستيۆال قازاقستاندىقتاردى بىرىكتىرۋگە جانە ادەت- عۇرىپتارىمىز بەن سالت-داستۇرلەرىمىزدى ناسيحاتتاۋعا كومەكتەسەدى. قازاق مادەنيەتى مەن تاريحىنا ارنالعان روليكتەر TikTok-تا تانىمال بولىپ كەلەدى. مىسالى، #قازاقستانتاريحى بويىنشا ۆيدەولار 100 ميلليونعا جۋىق، ال #قازاقستانمادەنيەتى - 75 ميلليوننان استام قارالعان. سوندىقتان، بۇل اكسيا تەك قازاقستاندا عانا ەمەس، شەتەلدە دە مۇمكىندىگىنشە كوپ ادامدى قامتۋعا ارنالعان، - دەيدى مينيسترلىكتىڭ رەسمي وكىلى ءمولدىر ابدۋاليەۆا.
چەللەندجگە TikTok-تا تانىمال كونتەنت- مەيكەرلەر: مۋزىكانتتار، اسپازدار، ساياحات بلوگەرلەرى جانە تانىمدىق ۆيدەو اۆتورلارى قاتىسىپ جاتىر.
ۇزدىك ۆيدەوروليكتەردىڭ اۆتورلارى Kazakh Tourism كومپانياسى ۇسىنعان جۇلدەلەرگە يە بولادى. العاشقى ءۇش ورىندى يەلەنگەن قاتىسۋشىلار قازاقستاننىڭ ەڭ ادەمى جەرلەرىنە ساپارلاي الادى. جەڭىمپاز 5 كۇنگە، ەكىنشى جانە ءۇشىنشى ورىن يەگەرلەرى سايكەسىنشە 3 كۇن جانە 1 كۇنگە ساياحاتقا شىعادى.
ۆيدەوروليك تاقىرىبى رەتىندە ءتورت باعىتتىڭ ءبىرىن تاڭداۋعا بولادى: تاماق، ساياحات، مادەنيەت جانە مۋزىكا.
ونلاين-فەستيۆالدىڭ قورىتىندىسى، ۇزدىك ۆيدەوروليكتەر مەن بايقاۋ جەڭىمپازدارىنىڭ ەسىمدەرى 29-ناۋرىزدا جاريالانادى.