ماجارستاندا قازاقستاندىق اۋدارماشىنىڭ ەڭبەگى ۇزدىك دەپ تانىلدى - فوتو

بۋداپەش. قازاقپارات - ماجارستانداعى حالىقارالىق بايقاۋدا قازاقستاندىق اۋدارماشى داۋرەن بەرىكقاجى ۇلىنىڭ ەڭبەگى ۇزدىك دەپ تانىلدى، دەپ حابارلايدى قازاقپارات ماجار-تۇران قورىنا سىلتەمە جاساپ.

ماجار اقىنى پەتوفي شاندوردىڭ تۋعانىنا 200 جىل تولۋىنا وراي، اقىن پوەزياسىن قازاق، ازەربايجان، قىرعىز، تۇرىك، تۇرىكمەن جانە وزبەك تىلدەرىنە اۋدارۋدا حالىقارالىق بايقاۋ جاريالاندى. بايقاۋ شارتى بويىنشا، تۇركى حالىقتارىنىڭ اقىندارى پەتوفي شاندوردىڭ «ماحاببات پەن بوستاندىق» اتتى ولەڭى مەن ءوزى تاڭداعان ءبىر شىعارماسىنىڭ اۋدارماسىن ۇسىنۋى ءتيىس.

حالىقارالىق بايقاۋ لاۋرەاتتارى ناۋرىزدىڭ 10-20 ارالىعىندا ماجارستان قالالارىن ارالاپ، شارانىڭ جابىلۋ سالتاناتىنا قاتىستى. ولاردىڭ قاتارىندا داۋرەن بەرىكقاجى ۇلى (قازاقستان)، راميل ەحمەد پەن بارىش جاۆيد موۆسۋملى (ازەربايجان)، تولۋك بەك بايزاق (قىرعىزستان)، دۋرسۋن ايان (تۇركيا)، رۋستام مۋسۋرمون (وزبەكستان) جانە اقمۇرات رەجەبوۆ (تۇركىمەنستان) بار.

ماجارستان پارلامەنتىنىڭ ۆيتسە- سپيكەرى لەجاك شاندور قوناقتاردى قارسى الىپ، ولاردى ماجار حالقىنا تانىستىرۋ ماقساتىندا، پارلامەنت عيماراتىندا باسپا ءسوز ءماسليحاتىن وتكىزدى. شارادا اقىندار ءوز اۋدارمالارىن وقىپ، ءار ەلدە جارىق كورگەن اقىننىڭ شىعارمالار جيناقتارىن پەتوفي ادەبي مۇراجايىنا تابىس ەتتى. باسپا ءسوز ءماسليحاتىندا ءسوز العان قازاق اقىنى داۋرەن بەرىكقاجى ۇلى، قادىر مىرزا-الىدەن كەيىن پەتوفي شىعارمالارىن اۋدارۋ ۇلكەن جاۋاپكەرشىلىك ەكەنىن، سونىمەن قاتار ماجار مەن قازاق حالىقتارىنىڭ رۋحاني، مادەني، ادەبي مۇراسىنداعى ۇقساستىقتارعا توقتالدى. شارا سوڭىندا داۋرەن بەرىكقاجى ۇلى قادىر مىرزا-ءالىنىڭ «ماحاببات پەن بوستاندىق» (اۋدارما) كىتابىن ۇيىمداستىرۋشىلارعا تابىس ەتتى.

ۇيىمداستىرۋشىلاردىڭ ايتۋىنشا، اۋدارىلعان شىعارمالار الداعى ۋاقىتتا جيناق بولىپ شىعارىلادى. ايتا كەتەيىك، ءار جەڭىمپازعا 2 مىڭ دوللار كولەمىندە قارجىلاي سىياقى بەرىلەدى.