الەۋمەتتىك كودەكس: قاعاز قۇجاتتار جۇيەدەن شىعارىلادى
بۇل سەناتتىڭ جالپى وتىرىسىندا ق ر الەۋمەتتىك كودەكسىنىڭ جوباسى مەن ىلەسپە زاڭ جوبالارىن ءبىرىنشى وقىلىمدا تالقىلاۋ كەزىندە ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
«الەۋمەتتىك كودەكستى ازىرلەۋ كەزىندە حالىقارالىق تاجىريبە مۇقيات زەردەلەنىپ، ەۋروپا وداعىنىڭ الەۋمەتتىك كودەكسى باسشىلىققا الىندى. بۇل رەتتە ەلىمىزدىڭ ءوز ەرەكشەلىكتەرى جان-جاقتى ەسكەرىلدى»، - دەدى ت. دۇيسەنوۆا.
وسى ورايدا مينيستر قۇجاتتا قامتىلعان تىڭ قادامدارعا توقتالدى. ءبىرىنشى نوۆەللا - بۇل مەملەكەتتىك ورگانداردىڭ بارلىق قولدانىستاعى اقپاراتتىق جۇيەلەرىنىڭ دەرەكتەرى نەگىزىندە قالىپتاستىرىلاتىن وتباسىنىڭ سيفرلىق كارتاسى (و ت س ك). ونى ەنگىزۋ اياسىندا قازاقستاندىقتار تەڭ دارەجەدە مەملەكەتتىك قولداۋ جۇيەسىنىڭ كومەگىنە سۇيەنە الادى.
«سوندىقتان كودەكستە و ت س ك- نى مەملەكەتتىك الەۋمەتتىك ساياساتتىڭ ورتا جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى رەتىندە بەلگىلەدىك. ياعني مەملەكەت كىمگە، قاشان، قانداي كومەك قاجەت ەكەنىن انىقتاپ قانا قويماي، الەۋمەتتىك تاۋەكەلدەردىڭ الدىن الۋ ءىس-شارالارىن قاراستىرۋعا مۇمكىندىك الادى. ەكىنشىدەن، كارتا ارقىلى وتباسىلار نەمەسە وتباسى مۇشەلەرىنىڭ الەۋمەتتىك ستاتۋسىنا جانە وتباسىلىق ءال-اۋقات دارەجەسىنە قاراپ، مەملەكەتتىك قولداۋدىڭ قانداي ءتۇرىن الۋعا قۇقىلى ەكەندىگىن جەتكىزىپ وتىراتىن ەلەكتروندى جارشى قۇرالى قىزمەتىن اتقاراتىن بولادى. مۇنداي اقپارات ءار وتباسىنا ورتالىق مەملەكەتتىك ورگان جاعىنان SMS- حابارلاما رەتىندە جىبەرىلمەك»، - دەدى مينيستر.
سونىمەن قاتار ول مەملەكەتتىك قولداۋ پرواكتيۆتى فورماتتا جۇرگىزىلەتىنىن ايتتى. ياعني ازاماتتارعا الەۋمەتىىك تولەمدەر مەن ءتيىستى كومەك اقپارات جۇيەسىندە بار دەرەكتەر اياسىندا بەكىتىلەدى. قولدانىستاعى قاعاز قۇجاتتار كەزەڭ-كەزەڭىمەن جۇيەدەن شىعارىلاتىن بولادى.