ەلىمىزدە انالار مەن اجەلەردى فۋتبول ويناۋعا تارتاتىن جوبا ىسكە قوسىلادى
«قىزدار اراسىندا فۋتبولدان جاس وسپىرىمدەر ليگاسىن قۇرۋ 2025-جىلعا جوسپارلانىپ وتىر. ول ءۇشىن U-17 فورماتى تاڭدالادى. الدىن الا بولجام بويىنشا 10-12 كوماندا قاتىسادى»، - دەدى روحۋس شوح ەلوردادا وتكەن باسپا ءسوز ءماسليحاتىندا.
ءوز كەزەگىندە قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ فۋتبول سپورتىنا انالار مەن اجەلەردى تارتۋ جوسپارى تۋرالى ايتتى.
«بۇل مۇلدەم جاڭا جوبا. وتكەن جىلى ءبىز ايەلدەر فۋتبولىنىڭ نە ەكەنىن، ونى دامىتۋ جولدارىن زەرتتەدىك. بىلاي قاراساڭ، ەلىمىزدە ايەلدەر فۋتبولى بار دا، جوق تا سياقتى. ءبىز ايەلدەرگە ارنالعان اۋقىمدى فۋتبول باعدارلاماسىن دايىنداپ جاتىرمىز. باعدارلاما تەك قىزدار مەن كاسىبي فۋتبولشىلارعا عانا ەمەس، سونىمەن قاتار فۋتبولعا قۇمار انالار مەن اجەلەرگە دە ارنالادى»، - دەيدى فۋتبول فەدەراتسياسىنىڭ باسشىسى.
ونىڭ ايتۋىنشا، انالار مەن اجەلەرگە ارنالعان فۋتبول باعدارلاماسى بيىل نەمەسە كەلەسى جىلى ىسكە قوسىلادى.
«بۇل جەردە ءبىرىنشى ماسەلە - ماماندار. سەبەبى، وعان باسقا جاتتىقتىرۋشىلار، باسقا ءتاسىل كەرەك. ويتكەنى، فۋتبول ءتۇرى وزگەشە. ەگەر دايىندىق جۇمىستارىن بيىل اياقتاساق، جوبانى باستايمىز. ەگەر ۇلگەرمەسەك كەلەر جىلى جاريالايمىز دەپ ويلايمىن»، - دەدى ءا. بارمەنقۇلوۆ.
بۇعان دەيىن حابارلاعانىمىزداي، ەلىمىزدە فۋتبولدان جاڭا جاس وسپىرىمدەر ليگاسى قۇرىلدى.
سپورت جانە دەنە شىنىقتىرۋ كوميتەتى باسشىسىنىڭ مالىمدەۋىنشە، ەلىمىزدە 800 مىڭنان استام ادام فۋتبولمەن جۇيەلى اينالىسادى.