قار كولەمى جاعىنان رەكوردتار كىتابىنا ەنبەسە دە، وسى ماۋسىمداعى ەڭ قالىڭ قار بولدى.
سولتۇستىكتەگى نيۋ-دجەرسي شتاتىنان وڭتۇستىكتەگى مەن شتاتىنا دەيىنگى ايماق قار قۇرساۋىندا قالىپ، جولداعى تارتىپسىزدىككە ۇلاستى. ءبىراق جاعداي جول ماسەلەسىمەن شەكتەلىپ قالعان جوق.
سەيسەنبى كۇنى سولتۇستىك- شىعىستاعى بىرنەشە اەروپورت رەيستەردىڭ كەشىگەتىنىن جانە توقتاتىلعانىن حابارلادى. Flight Aware دەرەگىنشە، ەڭ كوپ رەيس، ياعني 160 تان اسا ۇشاق ۇشپاي قالعان اۋەجاي - نيۋ-يوركتەگى لا-گۋارديا اۋەجايى.
بوستوندىق لوگان حالىقارالىق اۋەجايى، دجون ف. كەننەدي اتىنداعى حالىقارالىق اۋەجاي مەن نيۋارك ليبەرتي حالىقارالىق اۋەجايى سەيسەنبى كۇنى رەيستەردىڭ ايتارلىقتاي كەشىگەتىنىن جانە كەيبىرىنىڭ مۇلدەم ۇشپايتىنىن مالىمدەدى. دجون ف. كەننەدي اۋەجايىندا 400 دەن اسا كەشىگۋ بولسا، بوستوندا 300 دەن اسا رەيس ۇشۋ مەزگىلىنەن كەشىككەن.
سولتۇستىك-شىعىستاعى كوپتەگەن مەكتەپ پەن مەكەمەلەر جابىلدى نەمەسە سەيسەنبى تاڭەرتەڭگى قاردان كەيىن اشىلۋىن كەيىنگە قالدىردى.
رود-ايلەند شتاتىنداعى باتىس گرينۆيچتە دە 20 سانتيمەتردەن اساتىن قار تۇسكەن. شامامەن وسىنداي كولەمدەگى قار ماسساچۋسەت شتاتىنداعى پلەينفيلد قالاسى مەن نيۋ-يوركتەن ءبىر جارىم ساعاتتىق جەردەگى چەستەردە، سونداي-اق كوننەكتيكۋت شتاتىنىڭ ءبىرقاتار بولىگىندە جاۋعان.
مەتەورولوگتاردىڭ ايتۋىنشا، نيۋ-يورك، بوستون، فيلادەلفيا مەن ۆاشينگتون، كولۋمبيا وكرۋگى سىندى سولتۇستىك-شىعىستاعى قالالاردا قىستا مۇلدەم قار جاۋماعان. سول سەبەپتى قىستىڭ سوڭعى كۇنى وسى قالا تۇرعىندارى ءۇشىن ەڭ قارلى كۇن بولدى. مۇنداي قار كەيىنگى رەت نيۋ-يوركتە 1998-جىلدىڭ 22- ناۋرىزىندا جاۋعان.
سەيسەنبى مەتەورولوگيالىق قىستىڭ سوڭعى كۇنى ەكەنىنە قاراماستان، AccuWeather سينوپتيكتەرى سولتۇستىك-شىعىستا ءالى دە قىستىڭ كۇن رايى ساقتالاتىنىن ايتتى. مەتەورولوگتار اپتا سوڭىندا جاعالاۋعا قالىڭ قار جاۋىپ، جەرگىلىكتى تۇرعىندار ءۇشىن ايتارلىقتاي ماسەلە تۋدىراتىنىن ايتىپ وتىر.