بۇل تۋرالى قارۋلى كۇشتەر باس شتابىنىڭ ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى باۋىرجان ارتىقوۆ ايتتى، دەپ حابارلايدى قازاقپارات ءتىلشىسى.
«ەڭ الدىمەن دەسانتتىق-شابۋىلداۋشى اسكەر مەن مەملەكەتتىك كۇزەت قىزمەتى وتە تانىمال. كەيبىرەۋلەرى شەكارا قىزمەتى بولىمشەلەرىنىڭ اسكەري ءبولىمى ورنالاسقان وڭىرلەردە اسكەري بورىشىن وتەۋدى قالايدى. ماسەلەن، شىعىس جانە وڭتۇستىك وڭىرلەردە. نەگىزىنەن جاستاردىڭ باسىم بولىگى دەسانتشى نەمەسە تەڭىز جاياۋ اسكەرى بولعىسى كەلەدى»، - دەدى باۋىرجان ارتىقوۆ ورتالىق كوممۋنيكاتسيالار قىزمەتىندەگى بريفينگ بارىسىندا ب ا ق وكىلدەرىنىڭ ساۋالىنا وراي.
ال قورعانىس ءمينيسترىنىڭ ورىنباسارى دارحان احمەديەۆ وزگە دە اسكەري بولىمدەردە بورىشىن وتەۋگە تىرىساتىن جاستاردىڭ بار ەكەندىگىن ايتادى.
«بىزدە ءجيى شىعىپ، مەرزىمدى قىزمەت جاۋىنگەرلەرىمەن اڭگىمەلەسىپ تۇرامىز. ءوزى قالاعان اسكەر تۇرىنە ماقساتتى تۇردە بارعىسى كەلەتىندەر دە بار. ياعني، ءبارى دە جەكە ادامنىڭ قالاۋىنا بايلانىستى. جالپى، مۇنداي ترەندتىڭ بار ەكەندىگى ءسوزسىز»، - دەدى مينيستر ورىنباسارى.