ءتورت جىل بۇرىن قايعىلى وقيعا بولعان شامالعان ستانتسياسىنا «سەرگەك» كامەراسى ورناتىلدى
قاداعالاۋ ورگانى مالىمەتىنشە، جول قوزعالىسى ەرەجەلەرىن ورەسكەل بۇزۋ دەرەكتەرى ءجيى تىركەلەتىن تەمىرجول وتكەلىندە بەينەباقىلاۋ جۇيەسى ورناتىلدى.
«الماتى وبلىسىنىڭ پروكۋراتۋراسى جەرگىلىكتى پوليتسيا دەپارتامەنتىمەن بىرىگىپ، «جول قوزعالىسىنىڭ قاۋىپسىزدىگى» جوباسىن جالعاستىرىپ جاتىر. ءبىر ايدا موبيلدىك توپتارمەن 28 رەيد جاسالىپ، جول قوزعالىسىنىڭ قاۋىپسىزدىگىن قامتاماسىز ەتۋ ماقساتىندا 153 زاڭ بۇزۋشىلىقتى انىقتادى. قاراساي اۋدانى شامالعان تەمىرجول وتكەلىندە «سەرگەك» اپپاراتتىق- باعدارلامالىق كەشەندەر ورناتىلدى»، - دەلىنگەن حابارلامادا.
سونداي- اق، «الماتى- جاندوسوۆ» جولىندا قاسكەلەڭ قالاسىنىڭ بۇرىلىسىندا باعدارشام ورناتىلدى. اكىمشىلىك پوليسيامەن تالعار اۋدانىنىڭ تۇرعىن ءۇي- كوممۋنالدىق شارۋاشىلىق بولىمىنە جاياۋ جۇرگىنشىلەر وتكەلى جانە باسقا دا شەكتەۋشى جول بەلگىلەرىنىڭ جوقتىعى بويىنشا ۇيعارىمدار ەنگىزىلگەن.
جوبا اياسىندا جول پوليتسياسى جانە كولىكتىك باقىلاۋ ينسپەكتسياسى بىرلەسىپ 29 رەيد جۇرگىزدى، ناتيجەسىندە 360 تۇلعا اكىمشىلىك جاۋاپقا تارتىلدى، ونىڭ ىشىندە 30 كولىك جۇرگىزۋشىسى رۋلگە ماس كۇيىندە وتىرعان»، - دەپ اتاپ ءوتتى پروكۋراتۋرا وكىلدەرى.
ەستەرىڭىزگە سالا كەتەيىك، 2019 -جىلدىڭ 15-قىركۇيەگىندە شامالعان ستانتسياسىندا پويىز بەن اۆتوبۋس سوقتىعىسقان بولاتىن.
وقيعا ورنىندا اۆتوبۋس جۇرگىزۋشىسى مەرت بولىپ، تاعى 3 ادام قاراساي اۋداندىق اۋرۋحاناسىنىڭ جانساقتاۋ بولىمىنە ءتۇستى.
كەيىن اتالعان دەرەك بويىنشا تەمىرجولشى جاۋاپقا تارتىلدى. سوت ونى 3 جىل 6 ايعا شارتتى تۇردە باس بوستاندىعىنان ايىردى.