تۇرعىن ءۇي كوميسسياسى مۇگەدەكتىگى بار جەتىم قىزدى باسپاناسىز قالدىرا جازدادى - پروكۋراتۋرا
بۇل تۋرالى قازاقپارات ورگاننىڭ رەسمي سايتىنا سىلتەمە جاساپ حابارلايدى.
بالالار ۇيىندە تاربيەلەنگەن جانە Ⅱ توپتاعى مۇگەدەكتىگى بار قىز بالا (دەنساۋلىعىنا بايلانىستى ءوز ارەكەتتەرى ءۇشىن جاۋاپ بەرە المايدى) 2013-جىلى ءۇي ساتۋشىسىنا سەنىم ارتىپ، دەپوزيتتە جيناعان 1 ميلليون تەڭگەسىنە جاتاقحانادان 1 بولمەلى پاتەر ساتىپ الادى. الايدا، ول جەر تۇرۋعا مۇلدەم جارامسىز (سۋىق، كوگەرگەن، جوندەۋسىز جانە ەسىكسىز) بولادى. سوندىقتان، ول تانىستارىمەن بىرگە باسقا جەردە تۇرادى جانە سول كىسىلەردىڭ كومەگىمەن 2019-جىلى پاتەرىن ساتىپ جىبەرەدى. سول جىلى وعان جەتىم رەتىندە كەزەكتىلىك تارتىبىمەن مەملەكەتتەن 1 بولمەلى پاتەر («بايتەرەك» شاعىن اۋدانىنان) بەرىلەدى. الايدا، ونىڭ مەنشىگىندە جاتاقحاناداعى 1 بولمەلى پاتەر بولۋى نەگىزىندە تۇرعىن ءۇي كوميسسياسى اتقارۋشىلىق ءىس قوزعاي وتىرىپ، وعان پاتەر بەرۋ تۋرالى شەشىمدى جويادى.
مۇگەدەكتىگى بارىنا بايلانىستى قىز بالانىڭ قۇزىرەتتى ورگاندارعا ءوز بەتىنشە جۇگىنۋگە مۇمكىندىگى، سونداي-اق جاقىن تۋىستارى مەن قامقورشىلارى دا جوق. ونىڭ اۋىر جاعدايى تۋرالى پروكۋراتۋرا ورگاندارىنا اتقارۋ تۋرالى وندىرىستەردى تالداۋ بارىسىندا بەلگىلى بولدى. شۇعىل تۇردە اتقارۋشىلىق ءىس جۇرگىزۋدى توقتاتا تۇرا، پروكۋراتۋرا قىزمەتكەرلەرى قاداعالاۋ اكتىلەرىن ەنگىزىپ، جەتىم قىزدىڭ تۇرعىن ءۇي الۋعا كونستيتۋتسيالىق قۇقىقتارىن قالپىنا كەلتىرۋ جونىندە دەر كەزىندە شارالار قابىلدادى.
ءبىرىنشى كەزەكتە، تاراز قالالىق سوتىنىڭ 2022-جىلعى 28- قاڭتارداعى شەشىمىمەن قىز بالا اۋرۋىنا بايلانىستى ارەكەتكە قابىلەتسىز دەپ تانىلدى جانە تاراز قالاسى اكىمدىگىنىڭ 2022-جىلعى 28- ناۋرىزداعى قاۋلىسىمەن وعان قامقورشى تاعايىندالدى. جاتاقحاناداعى بولمەنى ساتىپ الۋ-ساتۋ مامىلەلەرىن جاساۋ كەزەڭىندە ءوز ءىس-ارەكەتتەرىنىڭ ماڭىزدىلىعىن جانە ولاردىڭ سالدارىن تۇسىنە الماعاندىعى ەسكەرىلە وتىرىپ، سوتقا ولاردى جارامسىز دەپ تانۋ تۋرالى تالاپ ارىز بەرىلدى.
تاراز قالالىق سوتىنىڭ 2022-جىلعى 11- قاراشاداعى شەشىمىمەن تالاپ تولىق كولەمدە قاناعاتتاندىرىلدى، بۇل بيىل 1- اقپاندا تۇرعىن ءۇي كوميسسياسىنىڭ ماسەلەنى قايتا قاراپ، وڭ شەشىم قابىلداۋىنا نەگىز بولدى. دەمەك، جامبىل وبلىسى پروكۋراتۋراسىنىڭ ىقپالىمەن Ⅱ توپتاعى مۇگەدەكتىگى بار تۇرعىن مەملەكەتتەن بەرىلگەن پاتەرىندە قالدى.