«بولجامدارعا سۇيەنسەك، بيىل قاردىڭ كوپ بولۋىنا جانە توپىراق قاباتىنىڭ قاتۋىنا بايلانىستى سۋ تاسۋ قاۋپى جوعارى. بۇگىنگى تاڭدا ەلدى مەكەندەردەن 11 ميلليون تەكشە مەتردەن استام قار شىعارىلدى. دەگەنمەن، بۇل جۇمىس بارلىق وڭىردە ءتيىستى دەڭگەيدە جۇرگىزىلىپ وتىرعان جوق. ءوڭىر اكىمدەرى قار شىعارۋ جۇمىستارىن كۇشەيتۋلەرى قاجەت»، - دەدى ءاليحان سمايىلوۆ ۇكىمەتتىڭ بۇگىنگى وتىرىسىندا.
پرەمەر-مينيستر وڭتۇستىك وڭىرلەردە كۇردەلى جاعداي قالىپتاسقانىن، وعان سۋ بۇرۋ ارنالارىنىڭ، ارىقتاردىڭ، قورعانىش جەر ۇيىندىلەرىنىڭ بولماۋى سەبەپ بولعانىن اتاپ ءوتتى.
تۇركىستان، جامبىل جانە الماتى وبلىستارىندا جاۋىن-شاشىننىڭ كوپ مولشەرىنە درەناجدىق جۇيەلەردىڭ قۋاتى جەتپەدى، كەي جەرلەردە ولار مۇلدەم جوق. اتىراۋدا قار كۇرت ەرىپ، كوشەلەردى سۋ باسىپ قالعان.
«سوندىقتان، ارىقتاردى، نوسەر كارىزدەرىن تازارتىپ، ۋاقىتشا جەر ۇيىندىلەرى مەن بوگەتتەر سالۋ قاجەت. يندۋستريا مينيسترلىگى مەن ءوڭىر اكىمدەرى جولداردى، كوپىرلەردى، سۋ وتكىزۋ قۇرىلىستارىن بەكىتۋ جۇمىستارىن جالعاستىرسىن. قازگيدرومەتتىڭ بولجامىندا ايتىلعانداي، ناۋرىز ايىندا ەلىمىزدىڭ وڭتۇستىك جانە شىعىس وڭىرلەرىندە اۋا تەمپەراتۋراسى مەن جاۋىن-شاشىن مولشەرى نورمادان جوعارى بولادى. بۇعان دايىن بولۋ كەرەك»، - دەدى ۇكىمەت باسشىسى.
سونىمەن قاتار، پرەمەر-مينيستر مىنا ماسەلەلەردى قامتاماسىز ەتۋدى تاپسىردى.
«توتەنشە جاعدايلار مينيسترلىگى مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، «كوكتەم-2023» رەسپۋبليكالىق وقۋ-جاتتىعۋ شارالارى شەڭبەرىندە تاسقىن قاۋپى تۋىنداعان جاعدايدا ناقتى ءىس-قيمىل الگوريتمىن پىسىقتاسىن. جارىلعىش زاتتار مەن ينەرتتى ماتەريالداردىڭ قاجەتتى قورىن دايىنداپ، حابارلاندىرۋ جۇيەلەرىنىڭ دايىندىعىن تەكسەرسىن. قوسىمشا كۇشتەر مەن قۇرالدار ورنالاساتىن جەرلەردى، ەۆاكۋاتسيالاناتىن حالىقتى قابىلداۋ پۋنكتتەرىن جانە اۋىل شارۋاشىلىعى جانۋارلارىن كوشىرۋ ءۇشىن قاۋىپسىز ۋچاسكەلەردى انىقتاۋ قاجەت»، - دەدى ءا. سمايىلوۆ.
ەكىنشىدەن، ەكولوگيا مينيسترلىگى ءوڭىر اكىمدەرىمەن بىرگە كوممۋنالدىق، جەكەمەنشىك جانە يەسى جوق گيدروتەحنيكالىق قۇرىلىستاردى جوندەۋ شارالارىن ازىرلەپ، قاجەت بولعان جاعدايدا ولاردىڭ تەحنيكالىق جاعدايى مەن جوندەۋ ماسەلەسىن سۋ كەڭەسىنىڭ قاراۋىنا شىعارۋى قاجەت.
«ءۇشىنشى، قازگيدرومەتتىڭ ناۋرىز ايىنا بولجامىن ەسكەرىپ، سۋ قويمالارىن تولتىرۋ كولەمىن قايتا قاراۋ كەرەك جانە قاجەت بولسا، ولاردى الدىن-الا قاۋىپسىز جاعدايدا بوساتۋ جونىندە شارالار قابىلدانۋى ءتيىس. قازىرگى تاڭدا بۇل ماسەلە بويىنشا رەسپۋبليكالىق دەڭگەيدە پرەمەر- ءمينيستردىڭ ءبىرىنشى ورىنباسارى جەتەكشىلىك ەتەتىن ۇكىمەتتىك كوميسسيا جۇمىس ىستەپ جاتىر. كوميسسيا جاعدايدى باقىلاۋدا ۇستاپ، سۋ تاسۋ جاعدايلارىندا جەدەل ارەكەت ەتۋگە دايىن بولۋى ءتيىس»، - دەدى ءاليحان سمايىلوۆ.