ەركىن تۇقىموۆ: قازاقستانعا ءبىلىمدى تالانتتار قاجەت

استانا. قازاقپارات - قازاقستانعا ءبىلىمدى تالانتتار قاجەت. قازاقستان ستراتەگيالىق زەرتتەۋلەر ينستيتۋتىنىڭ جەتەكشىسى ەركىن تۇقىموۆ «M. Narikbayev Public lecture» الەۋمەتتىك جوباسى اياسىنداعى قوعامدىق دارىستە مەملەكەت دامۋىنداعى ادامي كاپيتالدىڭ ءرولى تۋرالى ايتتى، دەپ حابارلايدى قازاقپارات.

ەركىن تۇقىموۆ بارلىق تابىستى ەلدەردىڭ تاجىريبەسى كورسەتكەندەي، جاڭعىرۋدىڭ نەگىزگى سەبەبى ادامي كاپيتال ەكەنىن اتاپ ءوتتى. قازاقستاننىڭ ادامي كاپيتالىن دامىتۋدىڭ وڭ جانە سىني فاكتورلارى تۋرالى ايتا كەلە، سپيكەر ەلىمىزدىڭ دەموگرافيالىق مۇمكىندىكتەرىنە توقتالدى.

«رەفورما جۇرگىزۋ ۋاقىتىنىڭ وزىندىك دەموگرافيالىق شەكارالارى بار. بۇگىن قازاقستاندىقتاردىڭ ورتاشا جاسى - 31,7 جاس. الايدا، 2035-2040-جىلداردان كەيىن 15 جاسقا دەيىنگى بالالار مەن زەينەتكەرلەردىڭ ۇلەسى ارتۋى مۇمكىن. بۇل ەكونوميكانىڭ دامۋ قارقىنىنا اسەر ەتەدى. وسىعان بايلانىستى قازاقستانعا ءبىلىمدى تالانتتار قاجەت»، - دەدى ول.

سونداي-اق، گارۆارد ۋنيۆەرسيتەتىنىڭ قازاقستانداعى رەسمي وكىلى رەتىندە ول ۋنيۆەرسيتەتكە ءتۇسۋ تاجىريبەسىمەن ءبولىسىپ، جاس ماماندارعا پراكتيكالىق ۇسىنىستار بەردى.