ا ق ش مەملەكەتتىك حاتشىسى ەنتوني بلينكەن قازاقستاننان كەيىن وزبەكستان مەن ءۇندىستانعا بارادى
28- اقپاندا مەملەكەتتىك حاتشى استاناعا كەلىپ، ەكىجاقتى ىنتىماقتاستىقتى دامىتۋ ءۇشىن قازاقستاننىڭ رەسمي تۇلعالارىمەن كەزدەسەدى.
سودان كەيىن ول ا ق ش- تىڭ ورتالىق ازيا ەلدەرىنىڭ تاۋەلسىزدىگى، ەگەمەندىگى مەن اۋماقتىق تۇتاستىعىنا جانە جالپى جاھاندىق ماسەلەلەردى شەشۋدە وڭىرمەن ىنتىماقتاستىققا بەيىلدىلىگىن راستاۋ ءۇشىن ورتالىق ازيانىڭ بەس مەملەكەتى وكىلدەرىمەن C5+1 فورماتىندا مينيسترلىك كەزدەسۋىنە قاتىسادى.
C5+1 مينيسترلىك كەزدەسۋى ەكونوميكالىق، ەنەرگەتيكالىق جانە ەكولوگيالىق ىنتىماقتاستىقتى، سونداي-اق امەريكا قۇراما شتاتتارى، قازاقستان رەسپۋبليكاسى، قىرعىز رەسپۋبليكاسى، تاجىكستان رەسپۋبليكاسى، تۇرىكمەنستان جانە وزبەكستان رەسپۋبليكاسى اراسىنداعى قاۋىپسىزدىك سالاسىنداعى ىنتىماقتاستىقتى نىعايتۋعا باعىتتالماق.
مەملەكەتتىك حاتشى C5+1 مينيسترلىك كەزدەسۋى اياسىندا ەكىجاقتى جانە كوپجاقتى ىنتىماقتاستىق مۇمكىندىكتەرىن تالقىلاۋ مەن گۇلدەنگەن، قاۋىپسىز ءارى دەموكراتيالىق ايماقتى قۇرۋدىڭ ورتاق ماقساتىن ىلگەرىلەتۋ ءۇشىن قىرعىزستان، تاجىكستان جانە تۇرىكمەنستاننىڭ جوعارى لاۋازىمدى مەملەكەتتىك شەنەۋنىكتەرىمەن بولەك جولىعادى.
قازاقستاننان كەيىن ە. بلينكەن تاشكەنتكە بارادى، وندا ول ءبىرقاتار ەكىجاقتى جانە ايماقتىق دەڭگەيدەگى ارىپتەستىكتى ودان ءارى جىلجىتۋ ماسەلەلەرى بويىنشا وزبەكستاننىڭ رەسمي تۇلعالارىمەن ءبىرقاتار كەزدەسۋلەر وتكىزەدى.
1- ناۋرىز كۇنى مەملەكەتتىك حاتشى G20 ەلدەرىنىڭ سىرتقى ىستەر مينيسترلەرىنىڭ كەزدەسۋىنە قاتىسۋ ءۇشىن نيۋ-دەليگە اتتانادى. ول جيىن ازىق-تۇلىك جانە ەنەرگەتيكالىق قاۋىپسىزدىك، تۇراقتى دامۋ، ەسىرتكىگە قارسى كۇرەس، جاھاندىق دەنساۋلىق ساقتاۋ، گۋمانيتارلىق كومەك جانە تابيعي اپاتتاردىڭ سالدارىن جويۋ، سونىمەن قاتار گەندەرلىك تەڭدىك، ايەلدەردىڭ قۇقىعى مەن مۇمكىندىكتەرىن كەڭەيتۋ سالالارىندا كوپجاقتى ىنتىماقتاستىقتى نىعايتۋ ماسەلەلەرىنە ارنالماق.
بۇعان دەيىن ا ق ش مەملەكەتتىك حاتشىسى ەنتوني بلينكەن قازاقستانعا العاش رەت كەلەتىنىن حابارلاعان ەدىك.