جاڭبىر، قار، اياز: بارلىق دەرلىك وڭىردە ەسكەرتۋ جاريالاندى

استانا. قازاقپارات - «قازگيدرومەت» ر م ك 25- اقپاندا اۋا رايىنىڭ بۇزىلۋىنا بايلانىستى بىرنەشە وڭىردە ەسكەرتۋ جاريالادى، دەپ حابارلايدى قازاقپارات.

الماتى وبلىسىندا كۇندىز كەي ۋاقىتتا قاتتى جاۋىن-شاشىن (جاڭبىر، جىلبىسقى قار)، تۇمان، كوكتايعاق كۇتىلەدى.

باتىس قازاقستان وبلىسىنىڭ باتىسىندا، سولتۇستىگى مەن شىعىسىندا جەل وڭتۇستىك-شىعىستان سوعادى، ەكپىنى 15-20 م/س قۇرايدى.

كۇندىز ماڭعىستاۋ وبلىسىنىڭ وڭتۇستىگى مەن ورتالىعىندا شاڭدى داۋىل تۇرادى. وڭتۇستىك-شىعىستان جەل سوعادى، وبلىستىڭ باتىسىندا، وڭتۇستىگى مەن ورتالىعىندا، كۇندىز ەكپىنى 15-20 قۇرايدى. ءوڭىردىڭ باتىسىندا جەلدىڭ كۇشى 25 م/س جەتۋى ىقتيمال.

قاراعاندى وبلىسىنىڭ وڭتۇستىگى مەن شىعىسىندا جاياۋ بۇرقاسىن، كوكتايعاق بولجانادى. ءوڭىردىڭ سولتۇستىگىن تۇمان باسادى. وڭتۇستىك-باتىستان، باتىستان جەل سوعادى، وبلىستىڭ وڭتۇستىگىندە، شىعىسىندا ەكپىنى 15-20 م/س قۇرايدى.

پاۆلودار وبلىسىنىڭ وڭتۇستىگىندە جاياۋ بۇرقاسىن كۇتىلەدى. باتىستان جەل سوعادى، ءوڭىردىڭ باتىسى مەن وڭتۇستىگىندە كۇندىز جىلدامدىعى 15-20 م/س قۇرايدى.

اقمولا وبلىسىنىڭ باتىسىندا، سولتۇستىگى مەن شىعىسىندا جاياۋ بۇرقاسىن بولادى. وبلىستىڭ وڭتۇستىك جارتىسىندا تۇمان كۇتىلەدى. وڭتۇستىك-باتىستان سوققان جەلدىڭ ەكپىنى 15-20 م/س قۇرايدى.

تۇندە سولتۇستىك قازاقستان وبلىسىنىڭ سولتۇستىگى مەن شىعىسىندا جاياۋ بۇرقاسىن كۇتىلەدى. وڭتۇستىك-باتىستان جەل سوعادى، كۇشى 15-20 م/س.

قوستاناي وبلىسىنىڭ وڭتۇستىگىندە تۇمان بولادى. باتىستان، وڭتۇستىك-باتىستان سوققان جەلدىڭ كۇشى 15-20 م/س قۇرايدى.

كۇندىز اقتوبە وبلىسىنىڭ سولتۇستىگىندە وڭتۇستىك-باتىستان، وڭتۇستىكتەن جەل سوعادى، ەكپىنى 18 م/س قۇرايدى.

اباي وبلىسىندا قاتتى قار جاۋادى. وبلىستىڭ سولتۇستىگىندە، باتىسىندا جاياۋ بۇرقاسىن كۇتىلەدى. سولتۇستىكتەن، سولتۇستىك-باتىستان جەل سوعادى، وبلىستىڭ باتىسىندا، سولتۇستىگىندە، شىعىسىندا كۇشى 15-20 م/س قۇرايدى. 25-26- اقپان ارالىعىندا اۋا تەمپەراتۋراسى تۇندە 0-3-جىلىدان 25- ايازعا دەيىن، كۇندىز 2-7-جىلىدان 16- ايازعا دەيىن كۇرت تومەندەۋى مۇمكىن.

شىعىس قازاقستان وبلىسىندا قار مەن جاڭبىر تۇرىندە قاتتى جاۋىن-شاشىن جاۋادى. وبلىستىڭ سولتۇستىگىندە، شىعىسىندا، باتىسىندا كوكتايعاق، جاياۋ بۇرقاسىن كۇتىلەدى. جەلدىڭ جىلدامدىعى 15-20 م/س قۇرايدى. 25-26- اقپان ارالىعىندا اۋا تەمپەراتۋراسىنىڭ تۇندە 0-3-جىلىدان 25- ايازعا دەيىن، كۇندىز 4-9-جىلىدان 16- ايازعا دەيىن كۇرت تومەندەۋى ىقتيمال.

سونداي-اق سينوپتيكتەر مالىمەتىنشە، 25 -27- اقپان ارالىعىندا تۇركىستان، جامبىل، جەتىسۋ، الماتى وبلىستارىندا جانە الماتى قالاسى ماڭىنداعى ايماقتاردا قار ارالاس جاڭبىردىڭ جاۋۋىنا، سونداي-اق اۋا تەمپەراتۋراسىنىڭ جوعارىلاۋىنا بايلانىستى قار قارقىندى ەرىپ، تاۋ بەتكەيلەرىنەن تاسقىن سۋ اعادى، وزەن-سۋلاردا مۇز السىرەپ، سۋ دەڭگەيى كوتەرىلەدى. بۇل رەتتە سۋ ارناسىنان تاسىپ، تاسقىن بولۋى مۇمكىن.

بۇدان بولەك، ۇلكەن جانە كىشى الماتى تاۋلارىندا قار جامىلعىسىنىڭ تۇراقسىزدىعى مەن بيىكتىگىنىڭ جوعارى بولۋىنا بايلانىستى قار كوشكىنى ءجۇرۋى ىقتيمال.