تەڭگە باعامى ينتەرۆەنتسيا ارقىلى نىعايىپ جاتىر ما - ۇلتتىق بانك جاۋاپ بەردى

استانا قازاقپارات - ۇلتتىق بانك ءتوراعاسى عالىمجان ءپىرماتوۆ تەڭگە باعامىن نىعايتۋ ءۇشىن جاسىرىن ينتەرۆەنتسيا جاسالىپ جاتقانى تۋرالى پايىمداردى تەرىسكە شىعاردى، دەپ حابارلايدى قازاقپارات ءتىلشىسى.

«كەيبىر ساراپشىلار ايتىپ جۇرگەندەي، تەڭگە باعامى ينتەرۆەنتسيا ارقىلى نىعايتىلىپ جاتىر ما؟»، - دەپ سۇرادى ب ا ق وكىلى.

عالىمجان ءپىرماتوۆ ۇلتتىق بانك ۆاليۋتا ساياساتىن بارىنشا اشىق جۇرگىزىپ وتىرعانىن باسا ايتتى.

«ءبىز بىلتىردان باستاپ ۇلتتىق بانكتىڭ ۆاليۋتا نارىعىنداعى بۇكىل وپەراتسيالارىن ترانسپارەنتتى تۇردە اشىپ ايتىپ كەلەمىز. تەڭگە باعامى تەك نارىقتاعى سۇرانىس پەن ۇسىنىس بازاسىندا عانا قالىپتاسىپ جاتىر. ءبىز ۇلتتىق قوردان قانشا اقشا ساتقانىمىزدى، ۇلتتىق بانككە قاراستى قورلاردىڭ بارىندە قانداي ۆاليۋتا وپەرتسياسىن جاساعانىمىزدى اشىق ايتىپ وتىرمىز. ونىڭ ىشىندەگى ەڭ ۇلكەنى - زەينەتاقى قورى. ول قور ارقىلى ءبىز جىلدىڭ باسىندا- اق بيىل 2 ملرد دوللار ساتىپ الاتىنىمىزدى مالىمدەگەنبىز. ونى 12-ايعا تەڭدەي ءبولىپ، كۇن سايىن ىستەيمىز. بۇل تەڭگەنىڭ دوللارعا دەگەن باعامىنا بارىنشا ىقپال ەتپەۋ ءۇشىن جاسالادى»، - دەدى ول.

ۇلتتىق بانك باسشىسى بيىل كۆازيمەملەكەتتىك سەكتوردىڭ ۆاليۋتاداعى تابىسىن ساتۋىنا قويىلاتىن تالاپتاردى جەڭىلدەتتىلگەنىن ەسكە سالدى.

«بىلتىر تابىسىنىڭ 75 پايىزىن ساتۋى كەرەك بولسا، بيىل 50 پايىز تابىسىن ساتادى. سوندىقتان ەشقانداي جاسىرىن نەمەسە جاسىرىن ەمەس ينتەرۆەنتسيا جاساعان جوقپىز. بۇل ءبىزدىڭ مۇددەمىزگە جات»، - دەدى ۇلتتىق بانك ءتوراعاسى.

ايتا كەتەيىك، ۇلتتىق بانكتىڭ اقشا- كرەديت ساياساتى كوميتەتى بازالىق مولشەرلەمەنى ,75 دەڭگەيىندە قالدىرۋ جونىندە شەشىم قابىلدادى.