تۇركياعا بارعان قازاقستاندىق قۇتقارۋشى قيراندىدان جارتى كەلى التىن مەن گاۋھار تاۋىپ العان
جەر سىلكىنىسىنىڭ وشاعىنان ورالعان قۇتقارۋشى NUR.KZ تىلشىسىنە بەرگەن سۇحباتىندا ومىرگە دەگەن كوزقاراسى قالاي وزگەرگەنىن ايتتى.
«كوپ نارسەنى كوردىك. قۇتقارۋشى بولعاندىقتان ادامنىڭ ءمايىتىن كورۋ ءبىز ءۇشىن ۇيرەنشىكتى نارسە. ال ەڭ اۋىر تيگەنى - ءتۇرلى ادام تاعدىرىنىڭ كۋاسى بولىپ كەلدىك. ءبىر وتباسىنان ءبىر ادام عانا ءتىرى قالعان جاعدايلار بولدى، ءۇيىندىنىڭ قاسىندا جىلاپ وتىرعان جانداردى كوردىك. ال جۇمىس بويىنشا قيىندىق - ءبىز رەسمي تۇردە سەگىز ساعات جۇمىس ىستەۋىمىز كەرەك بولسا، ول جاقتا نەگىزىندە 3-4 ساعات قانا ۇيىقتادىق. تاۋلىگىنە 16 ساعاتتان ارتىق جۇمىس ىستەدىك. كۇندىزگى، تۇنگى اۋىسىم بولدى، سوڭىندا كۇن مەن ءتۇنىمىز اۋىسىپ، شاتاسىپ كەتتىك. جۇمىس قاۋىپتى بولدى، بەتون پليتالاردىڭ، ۇيىندىلەردىڭ اراسىندا جۇردىك»، - دەيدى ول.
دۋماننىڭ سوزىنشە، قۇتقارۋشىلار ءۇشىن الەمدىك ماسشتابتاعى توتەنشە جاعدايعا قاتىسۋ كاسىبي مانساپتاعى ەڭ جوعارعى دەڭگەي. ول تۇركياعا اتتانار الدىندا باسقا ويدا بولعانىن، ال بارىپ كەلگەن سوڭ ومىرگە كوزقاراسى مۇلدە وزگەرگەنىن ايتادى.
«مەن قانشا جىلدان بەرى قۇتقارۋشى بولىپ قىزمەت ەتىپ كەلەم. مەن ءۇشىن الەمدىك دەڭگەيدەگى توتەنشە جاعدايدا جۇمىس ىستەۋ مارتەبە. الايدا وعان قاتىسۋ - ءبىر ماقتاناتىن، كەۋدە سوعاتىن دۇنيە ەمەس. ول دۇنيەجۇزىن ءدۇر سىلكىندىرگەن توتەنشە وقيعا. ءبىراق قۇتقارۋشىلاردىڭ قىزمەت جولىنداعى ەڭ جوعارعى ماقسات دەسەم بولادى. مەن تۇركياعا ءوزىمنىڭ بويىمداعى بار قابىلەت-قارىمىمدى كورسەتەمىن دەپ قۇلشىنىپ باردىم. ال وقيعا وشاعىندا بولعان كەزدە ويىم مۇلدە وزگەردى. ول جاقتا اقشا، بيلىكتىڭ ەش ءمانى جوق ەكەنىن ءتۇسىندىم. سول ساتتە ساعان كوپ اقشا، بيلىك بەرسە دە ونىڭ ەش قۇنى بولمايدى ەكەن. مەن ول جەردەن ءبىر قوراپقا سالىنعان جارتى كيلوگرامعا جۋىق التىن، گاۋھاردان جاسالعان زەرگەرلىك بۇيىمداردى دا تاپقام. ءبىراق ونى وزىمە الىپ قالۋ تۋرالى ويلامادىم. ءبارىن تۇرىك جاندارمدارىنىڭ قولىنا ۇستاتتىم»، - دەيدى ول. بۇعان دەيىن دۋمان قامزين قيراندى استىنان كەزدەيسوق مىلقاۋ ادامدى تاۋىپ العانىن، ونى قالاي قۇتقارعانىن ايتىپ بەرگەن بولاتىن.