سۇيەل نە ءۇشىن شىعادى جانە ودان قالاي ارىلۋعا بولادى؟

استانا. قازاقپارات - سۇيەل - تەرىدە نەمەسە شىرىشتى قابىقتا پايدا بولاتىن قاتەرسىز تۇزىلىمدەر. ول ءجيى يممۋندى جۇيەسى قاتايماعان بالالار مەن جاس وسپىرىمدەردە كەزدەسەدى. سۇيەلدىڭ تەرىگە تەك بىرەۋى نەمەسە قاپتاپ شىعۋى مۇمكىن.

سۇيەل سوپاق، دوڭگەلەك بولۋى جانە اشىق ءتۇستى نەمەسە قارايىپ شىعۋى مۇمكىن. ۋاقىتىندا ەمدەمەسە، ول ىڭعايسىزدىق تۋدىرادى. ول ءجيى بەتكە، ساۋساقتار مەن تىرناق اينالاسىنا، بۋىندار بەتىنە (تىزە، شىنتاق) جانە تابانعا شىعادى.

سۇيەل شىعۋىنىڭ نەگىزگى سەبەبى - پاپيللوما ۆيرۋسى. ۆيرۋس تەرىگە تۇسكەن كەزدە ول اعزا جارىقشالار نەمەسە جارالار ارقىلى كىرەدى. ميكروورگانيزمدەردىڭ بەلسەندىرىلۋىنە جانە وسىندىلەردىڭ پايدا بولۋىنا مىنا فاكتورلار اسەر ەتۋى مۇمكىن:

- يممۋنيتەتتىڭ السىرەۋى؛

- جاس وسپىرىمدىك كەزەڭدەگى گورموندى وزگەرىس؛

- ۇيلەستىرىلمەگەن تاماقتانۋ؛

- دارۋمەن جەتىسپەۋشىلىگى؛

- از قوزعالىستى ءومىر سالتى؛

- جەكە گيگيەنانى ساقتاماۋ؛

- كۇيزەلىس، سوزىلمالى شارشاڭقىلىق؛

- ىڭعايسىز اياقكيىم كيۋ.

قازىر زاماناۋي مەديتسينادا پاپيللوماۆيرۋستىڭ 40 تان اسا ءتۇرى تابىلعان. بۇل ۆيرۋس جاناسۋ ارقىلى جۇعادى. بۇل ۆيرۋستى جۇقتىرىپ العان ەرلەر مەن ايەلدەر، سونداي-اق پاپيللوماۆيرۋستى جۇقپاسى بار جانۋارلار قاۋىپ توندىرەدى. كەي جاعدايلاردا ادامدا ەشقانداي ونىڭ بەلگىسى بىلىنبەسە دە، ول ۆيرۋستى تاسۋشى بولا الادى.

بۇل ۆيرۋس سونداي-اق اۋتوينوكۋلياتسيا (اعزانىڭ ءبىر بولىگىنەن ەكىنشىسىنە ءتۇسۋ) جولىمەن جۇعۋى دا مۇمكىن. مىسالى، تىرناعىن تىستەيتىن ادامداردا ساۋساقتارىنا سۇيەل ءجيى شىعۋى مۇمكىن. دەنەسىندەگى تۇكتى قىراتىن، ەپيلياتسيا، دەپيلياتسيا جاسايتىندارعا بەتىنە، يەگىنە، بالدىرىنا سۇيەل شىعۋى مۇمكىن. كەيدە ادام پاپيللوماۆيرۋستى قوعامدىق جەرلەردەن، مىسالى، باسسەين، ساۋنا، سپورتتىق زالدان جۇقتىرىپ الۋى مۇمكىن. ەت كەسۋمەن اينالىساتىن ادامدار ونى جانۋارلاردان جۇقتىرىپ الۋى مۇمكىن: ولاردا سۇيەل ءجيى بىلەگىنە، يىق اينالاسىنا شىعادى.

سۇيەلدى قالاي ەمدەيدى؟

سۇيەلدى ەمدەمەس بۇرىن دياگنوزدى راستاۋ قاجەت. دەرماتولوگ سۇيەلدى دەرماتوسكوپپەن قاراپ، ونىڭ ءتۇرىن انىقتايدى. بۇل پروتسەدۋرا ەش اۋىرتپايدى. تەرىدە سۇيەل كوپ بولسا، پاپيللوما ۆيرۋسىنىڭ شتامىن جانە ونىڭ بەلسەندىلىگىن انىقتاۋ ءۇشىن قان تاپسىرۋ كەرەك بولادى. العان مالىمەتتەرگە قاراي سۇيەلدى ەمدەۋ جولى تاڭدالادى. سۇيەلدىڭ بەتىنە جاعاتىن جاقپامايلار جانە يممۋنيتەتتى كوتەرەتىن، ۆيرۋسقا قارسى دارىلەر جازىپ بەرۋى مۇمكىن. ەگەر مەديكامەنتوزدى اسەر ءتيىمسىز بولسا، سۇيىق ازوتپەن ەمدەۋ، لازەرمەن كەتىرۋ، ەلەكتروكواگۋلياتسيا نەمەسە حيرۋرگيالىق جولمەن جويۋدى ۇسىنۋى مۇمكىن.

massaget.kz