قازاقشا سويلەمەيدى. عالامتور الاياعىنان قالاي وڭاي قۇتىلۋعا بولادى؟
ولار ءبىزدىڭ كەيىپكەرىمىزگە ونىڭ اتىنا نەسيە راسىمدەلىپ جاتقاندىقتان «ساقتاندىرماق بولىپ» حابارلاسقان.
«جۇمىستا وتىر ەدىم. بەلگىسىز نومەر قوڭىراۋ شالدى. تۇتقانى دەرەۋ كوتەردىم. «اينۇر الي، بۇل ءسىز بە؟» دەدى تەلەفوننىڭ ار جاعىنداعى داۋىس. «الي» دەگەننەن اق، الاياقتار ەكەنىن تۇسىنە قويدىم دا، اڭگىمەمدى جالعاستىرا بەردىم. سەبەبى، الي الەۋمەتتىك جەلىدە تىركەلگەن پاراقشامدا عانا كورىنەتىن لاقاپ اتىم ەدى. ورىس تىلىندە سايراپ تۇرعان جىگىتتىڭ داۋىسى كەرەمەت قويىلعان، ءاپ دەگەننەن ادام وعان سەنىپ قالۋى ابدەن مۇمكىن»، - دەيدى اتىراۋلىق اينۇر تاحاۋوۆا.
ءوزىن بەلگىلى ءبىر بانكتىڭ مەنەدجەرىمىن دەپ تانىستىرعان جىگىت تارازدا تانىستارىنىڭ بار-جوعىن سۇراپتى. ارينە، اينۇر تارازدا تۋىسىنىڭ دا، تانىسىنىڭ دا جوق ەكەنىن ايتقان.
«جەبەۋشىم» تاراز قالاسىنان مەنىڭ اتىما 100 مىڭ تەڭگە نەسيە راسىمدەۋگە ءوتىنىم تۇسكەنىن ايتتى. بۇل جاعداي بىزگە كۇدىكتى بولىپ كورىنگەندىكتەن دە، سىزگە حابارلاسىپ وتىرمىز. سالدەن سوڭ وپەراتور حابارلاسادى. ول شوتىڭىزدى الاياقتاردان قورعاۋ وپەراتسياسىن تۇسىندىرەدى. شۇعىل تۇردە ەسەپ-شوتىڭىزدى ساقتاندىرۋ كەرەك» دەگەندى دە قوسىپ قويدى»، - دەيدى ول.
ارادا جارتى مينۋت وتەر-وتپەستەن الگى بەلگىسىز نومەردەن «مەنەدجەرى» حابارلاستى» دەيدى اينۇر. «مەنەدجەر» اينۇرعا جاڭادان «قاۋىپسىز» شوت اشۋدى ۇسىنىپتى. وپەراتسيالاردىڭ بارلىعى ونلاين فورماتتا جاسالاتىنىنا انت-سۋ ىشكەن مەنەدجەر، كارتاسىنداعى قاراجاتتى جاڭادان اشىلاتىن شوتقا اۋدارۋدى تالاپ ەتكەن. وسى جەردە قۋلىققا باسقان اينۇر «مەنەدجەردەن» اقپاراتتى تولىقتاي قازاق تىلىندە ايتىپ بەرۋىن سۇراعان. اينۇردىڭ تالابىن ۇناتپاعان مەنەدجەر «بۇعان دەيىن ورىسشا ءتاپ- ءتاۋىر سويلەدىڭىز عوي» دەپ رەنجىپ، تۇتقانى لاقتىرا سالىپتى.
«وسى جاعدايدان كەيىن ارينە، مەن بانككە حابارلاستىم. ونداعىلار بانك، كومپانيالاردىڭ اتىن جامىلىپ، قۇيتۇرتقى وپەراتسيالار جاساپ جاتقان الاياقتار ارەكەتىنىڭ كوبەيگەنىن راستادى» دەدى اينۇر.
قايتا اينۇردىڭ جولى بولعان. اينۇر ينتەرنەت ارقىلى جاسالاتىن الاياقتىقتار تۋرالى كوبىرەك اقپارات وقىعانى، ءوزىن قورعاۋعا سەبەپ بولعانىن ايتادى.
ال، ەكىنشى كەيىپكەرىمىزدىڭ اينۇر سياقتى جولى بولمادى. روزا الدەشوۆا ءسان يندۋسترياسىندا جۇرگەن اتىراۋلىق كاسىپكەر، بلوگەر. ول وسىدان ءبىراز ۋاقىت بۇرىن ينتەرنەت الاياقتارعا 900 مىڭ تەڭگەسىن اۋدارىپ، جەر سيپاپ قالعان.
«ولار سونداي مادەنيەتتى سويلەسەدى. تاڭ الاسىمەن تەلەفون سوعىپ، الدەبىرەۋلەر كارتامنان اقشا اۋدارىپ الىپ جاتىر» دەگەندى ەستىگەندە، ۇيقىلى-وياۋ تۇرعان مەن ساسقالاقتاپ، الگىلەر اشتىق دەگەن «جاڭا شوتىما» اقشانى ءوز قولىممەن اۋدارىپ جىبەرگەن ەدىم. تاڭنان كەشكە دەيىن اياعىمنان تىك تۇرىپ جۇمىس ىستەپ، جيناپ جۇرگەن اقشامنان ءبىر ساتتە ايرىلىپ قالۋ ماعان اۋىر ءتيدى» دەگەن ەدى ءسان سالاسىندا قىزمەت ەتىپ جۇرگەن كاسىپكەر.
كەيىنىرەك بىلگەنىمىزدەي، ءىستى پوليتسيا جاۋىپ تاستاعان. سەبەبى، قىلمىسكەرلەردى انىقتاۋ مۇمكىن بولماعان.
ەسكە سالا كەتسەك، تەك وتكەن جىلدىڭ وزىندە قازاقستاندا ينتەرنەت الاياقتىققا قاتىستى 20500 دەن استام قىلمىستىق ءىس تىركەلگەن.
Massaget.kz