ۇلتتىق قۇرىلتاي اشىق ءارى ءتيىمدى ديالوگ الاڭىنا اينالۋدا - ەرلان قارين
بۇل تۋرالى ق ر مەملەكەتتىك كەڭەسشىسى ەرلان قارين تەلەگرام كانالىندا جازدى، دەپ حابارلايدى قازاقپارات.
«ۇلتتىق قۇرىلتاي - پرەزيدەنت جانىنداعى نەگىزگى كونسۋلتاتيۆتىك- كەڭەسشى ورگان. مەملەكەت باسشىسى بۇل ۇيىمدى قۇرۋ تۋرالى باستامانى وتكەن جىلعى جولداۋىندا كوتەرگەن بولاتىن. ۇلتتىق قۇرىلتايدىڭ قۇرامىنا ەلىمىزگە بەلگىلى قوعام قايراتكەرلەرى جانە ساراپشىلارمەن قاتار، وڭىرلەردەگى ازاماتتىق قوعامنىڭ بەلسەندى وكىلدەرى مۇشە بوپ كىردى. قازىرگى ۋاقىتتا ۇلتتىق قۇرىلتاي مەملەكەت باسشىسىنىڭ قوعام بەلسەندىلەرىمەن جانە ساراپشىلارمەن اراداعى تىكەلەي ديالوگىن ورناتىپ، ونى دامىتىپ وتىر. مىسالى، بۇگىن پرەزيدەنت ۇلتتىق قۇرىلتايدىڭ مۇشەسى، قولدانبالى ەتنوساياسي زەرتتەۋلەر ينستيتۋتىنىڭ ديرەكتورى تالعات قالييەۆپەن كەزدەستى. كەزدەسۋدە ساراپتامالىق قۇرىلىمداردىڭ جۇمىسى مەن قولدانبالى زەرتتەۋلەر جۇرگىزۋگە قاتىستى ماسەلەلەر تالقىلاندى. بۇعان دەيىن پرەزيدەنت ۇلتتىق قۇرىلتايدىڭ ت. اۋباكىروۆ، س. اقىلبايەۆ، ا. بايمەنوۆ، ر. باتالوۆ، ب. ىزمۇحامبەتوۆ، ج. كۇلەكەيەۆ، س. حۋدياكوۆ، ي. سالجانوۆ، د. تۇرلىحانوۆ سەكىلدى باسقا دا مۇشەلەرىمەن ءدال وسىنداي كەزدەسۋلەر وتكىزگەن بولاتىن»، - دەپ جازدى ە. قارين.
سونداي- اق ول بىلتىرعى جىلدىڭ جەلتوقسان ايىندا Quryltai ءموبيلدى قوسىمشاسى ىسكە قوسىلعانىن جەتكىزدى.
«ازاماتتار بۇل پلاتفورماعا قوعامداعى وزەكتى ماسەلەلەر جونىندەگى ءوز ويلارى مەن ۇسىنىستارىن جولداي الادى. بۇدان بولەك، «حابار» تەلەارناسىندا «ۇلتتىق قۇرىلتاي» اتتى ارنايى باعدارلاما كورسەتىلەدى. وعان ءار كەزدە ءارتۇرلى ءوڭىر قوسىلادى. باعدارلامادا ۇلتتىق قۇرىلتاي مۇشەلەرى مەن ساراپشىلار ەلىمىزدى دامىتۋعا ىقپال ەتەتىن ۇسىنىستاردى تالقىلايدى. سولايشا، ۇلتتىق قۇرىلتاي ەلدىڭ ءوتىنىش- تىلەكتەرىن جينايتىن كوممۋنيكاتسيانىڭ ءارتۇرلى فورماتتارىن پايدالانۋ ارقىلى اشىق ءارى ءتيىمدى ديالوگ الاڭىنا اينالۋدا»، - دەپ تولىقتىردى ول.
ەسكە سالساق، وتكەن جىلى 16-ماۋسىمدا مەملەكەت باسشىسى قاسىم- جومارت توقايەۆتىڭ قاتىسۋىمەن ۇلتتىق قۇرىلتايدىڭ I وتىرىسى ءوتتى. ۇلتتىق قۇرىلتايدىڭ وزەگى بولاتىن ءۇش قۇندىلىق اتالدى.
فوتو: akorda.kz