سيدزۋوكا پرەفەكتۋراسىنداعى قالا پوليتسياسى مەن تۇرعىندار جەرگىلىكتى جاعاجايدان ۇلكەن تەمىر شاردى كورىپ اڭ-تاڭ. ال جەرگىلىكتى بيلىك ونىڭ نە ەكەنىن تۇسىنبەي الەك بولۋدا.
جەرگىلىكتى ب ا ق- تىڭ حابارلاۋىنشا، ديامەترى 1,5 مەترلىك مەتال سفەرا ەلدىڭ تىنىق مۇحيتى جاعالاۋىندا ورنالاسقان حاماماتسۋ قالاسىنداعى ەنشۋ جاعالاۋىندا جاتىر.
ساراپشىلار رەنتگەن تەحنولوگياسىمەن نىساننىڭ ءىشىن زەرتتەپ، ونىڭ مينا ەمەس ەكەنىن مالىمدەدى. شاردىڭ ك ح د ر نەمەسە قىتايدىڭ تىڭشىلىققا ارنالعان قۇرالى بولۋى مۇمكىن دەگەن بولجام دا راستالمادى.
جەرگىلىكتى تۇرعىن سفەرانىڭ سۋدان بىرنەشە مەتر قاشىقتىقتا قۇمدا جاتقانىن بايقاپ، پوليتسيا شاقىرعان. پوليتسيا قارا داقتارى بار سارعىش-قوڭىر ءتۇستى زاتتى تەكسەرىپ جاتىر، دەپ حابارلادى Asahi TV.
جۇمباق زات جاتقان اۋماق جارىلعىش زاتتار بويىنشا ماماندار كەلگەنشە قورشاۋعا الىندى. ونىڭ سۋرەتتەرى جاپونيا قورعانىس مينيسترلىگىنە، جاعالاۋ كۇزەتىنە جىبەرىلدى.
اتالعان جاعالاۋدا ۇنەمى سپورتپەن شۇعىلداناتىن ەر ادامنىڭ ايتۋىنشا، شار بۇل جەردە ءبىر ايدان بەرى جاتىر. «مەن ونى يتەرمەك بولدىم، ءبىراق ول جىلجىعان جوق»، - دەدى ول.