قازىر ادامدى جەرلەۋ قانشا تۇرادى؟
Massaget.kz ءتىلشىسى وسى قىزمەت ءتۇرىن ۇسىناتىن كومپانيالاردىڭ رەسمي سايتتارىنداعى دەرەكتەرگە سالىستىرمالى شولۋ جاساپ، قايتىس بولعان ادامدى جەرلەۋگە قانشا اقشا كەتەتىنىن انىقتاپ كوردى.
كرەماتسيالاۋ قانشا تۇرادى؟
جەرلەۋ ءراسىمىنىڭ ءبىر بولىگى - كرەماتسيالاۋ (دەنەنى ورتەۋ – ە س ك.). اقتىق ساپارعا شىعارىپ سالۋ قىزمەتىن ۇسىناتىن كومپانيالاردىڭ بىرىندە دەنە ءبىر جارىم-ەكى ساعات ىشىندە كۇلگە اينالاتىنى ايتىلادى.
بۇل قىزمەت قۇنى 150 مىڭ تەڭگەدەن باستالادى ەكەن.
دەنەنى بالزامداۋ قانشا؟
دەنەنى بالزامداۋ ادام قايتىس بولعاننان كەيىنگى العاشقى 12 ساعاتتا جاسالۋى قاجەت ەكەن. ال بۇل قىزمەتتىڭ باعاسى 30 مىڭ تەڭگەدەن باستالادى. وسىنداي قىزمەت ءتۇرىن ۇسىنعان تاعى ءبىر كومپانيادا باعا 20 مىڭ تەڭگە مولشەرىندە ەكەن.
جەرلەۋ ءراسىمىن ۇيىمداستىرۋ قانشا؟
ادەتتە جەرلەۋ ءراسىمىن ۇيىمداستىرۋعا عۇرىپتىق اتريبۋتتار، جەرلەۋگە بايلانىستى تاۋارلاردى ساتىپ الۋ، قايتىس بولعان ادامدى تاسىمالداۋ، قابىر قازۋ، وركەستردىڭ سۇيەمەلدەۋى جاتادى.
وسى قىزمەتتىڭ جالپى قۇنى 90 مىڭ تەڭگەدەن باستالادى. سونداي-اق، ادەتتە كومپانيالار پراۆوسلاۆيە، مۇسىلمان، كورەي جانە اسكەري جەرلەۋ راسىمدەرىن ۇيىمداستىرادى.
ەندى ءار قىزمەت قۇنىنىڭ جەكە-جەكە باعاسىنا شولۋ جاساپ كورسەك:
قۇجاتتاردى راسىمدەۋ قانشا تۇرادى؟
وسى سالاداعى كومپانيالار قايتىس بولعان ادامنىڭ قۇجاتتارىن راسىمدەۋ جۇمىستارىمەن دە اينالىسادى ەكەن. بۇل قىزمەت قۇنى 10 مىڭ تەڭگەدەن باستالادى.
مۇسىلمانشا جەرلەۋ قانشا تۇرادى؟
نارىقتا جەرلەۋ ءراسىمى قىزمەتىن ۇسىناتىن كومپانيالار تۇتىنۋشىلاردىڭ تالابىنا ساي بەيىمدەلەتىنىن بايقاۋعا بولادى. ماسەلەن، مۇسىلمانشا جەرلەۋ ءراسىمىنىڭ قۇنى 45 مىڭ تەڭگەدەن باستالادى ەكەن. ال كورەي حالقىنىڭ جەرلەۋ ءراسىمى 120 مىڭ تەڭگەدەن باستالادى.
تاسىمالداۋ قۇنى قانشا؟
دەنەنى ءمايىتحاناعا، ۇيگە جانە قوشتاسۋ راسىمىنە تاسىمالداۋ قۇنى 20 مىڭ تەڭگەدەن باستالادى ەكەن. ەندى ءبىر كومپانيادا 15 مىڭ تەڭگە كولەمىندە بەلگىلەنگەن. بۇل ورايدا كومپانيالار بىلىكتى ماماندار مەن ارنايى كولىكتەر پايدالانىلاتىنىن العا تارتادى. ەندى ءبىر كومپانيادا باعا 45 مىڭ تەڭگەدەن باستالادى.
سونداي-اق، ادام تۋعان جەرىنەن شالعايدا قايتىس بولسا، كومپانيالار تاسىمالداۋدى ءوز موينىنا الا الادى. بۇل قىزمەت قۇنى 150 مىڭ تەڭگەدەن باستالادى.
جەرلەۋدىڭ قانداي تۇرلەرى بار؟
قازىر قايتىس بولعان ادامدى جەرلەۋ قىزمەتىنە دە نەسيە قوسىلىپتى. ياعني قايتىس بولعان ادامنىڭ جاقىندارىندا قانداي دا ءبىر قارجىلىق ماسەلە تۋىنداسا، «بانك ارقىلى نەسيەگە جەرلەۋ» ۇسىنىلادى ەكەن.
ودان بولەك، ىڭعايلى جەرلەۋ ءراسىمى جانە ەليتالى جەرلەۋ ءراسىمى دە بار ەكەن. العاشقىسى 90 مىڭ تەڭگەدەن باستالسا، ەليتالى جەرلەۋ ءراسىمى 500 مىڭ تەڭگەدەن باستالادى.
قابىر قازۋ قانشا تۇرادى؟
كومپانيالاردا قابىر قازۋ قىزمەتىنىڭ قۇنى شامالاس ەكەنىن، ياعني 20-30 مىڭ تەڭگە ارالىعىندا تۇراتىنى بايقالدى.
دەنەنى جۋىندىرۋ قانشا تۇرادى؟
ادەتتە بۇل قىزمەت باعاسى 10 مىڭ تەڭگەدەن باستالاتىنى بايقالدى. ال كومپانيالاردىڭ بىرىندە مۇسىلمانشا اقتىق ساپارداعى دارەت ەرلەر ءۇشىن 35 مىڭ تەڭگە، ال ايەلدەر ءۇشىن 50 مىڭ تەڭگە كولەمىندە ەكەن.
ەسكەرتكىش ورناتۋ قانشا تۇرادى؟
ال بەيىتكە ەسكەرتكىش ورناتۋدىڭ جالپى جيىنتىق قۇنى 295 مىڭنان باستالادى ەكەن. كەيىن ارنايى قىزمەتكەرلەر اباتتاندىرۋ، تازالاۋ، رەكونسترۋكتسيا قىزمەتتەرىن دە ۇسىنادى. مۇنىڭ ءبارى بولەك قارجىنى تالاپ ەتەدى.
كوڭىل ايتىپ كەلگەندەرگە ارنالعان ءمازىر دە بار
ءتىپتى جەرلەۋ ءراسىمىن ۇيىمداستىراتىندار كوڭىل ايتىپ كەلگەندەرگە ارنالعان داستارحاندى دا مويىندارىنا الادى ەكەن. بۇل قىزمەتتى ۇسىنعان كومپانيالاردىڭ بىرىندە ارنايى ءمازىر جاسالعانىن بايقادىق. پراۆوسلاۆ مازىرىنە قۇيماق، كۋتيا، كيسەل، قالاۋىنا قاراي بورش، سورپا، گولۋبتسى، شاي نەمەسە كومپوت، جەمىستەر مەن تاتتىلەر كىرەدى. ال مۇسىلمان ءمازىرىنىڭ قۇرامىنا سورپا، بەشبارماق، قازى، شەلپەك، باۋىرساق، شاي، سۋ، جاڭعاق، كەپتىرىلگەن جەمىستەر، جەمىستەر، تاتتىلەر جاتادى.
ەسكە سالايىق، بۇعان دەيىن بەيىت سالۋ بيزنەسىمەن اينالىساتىن كاسىپكەر 200-300 مىڭ تەڭگەلىك قۇلپىتاستارعا سۇرانىس كوپ ەكەنىن ايتقان ەدى.