بالاباقشا پەداگوگتەرىنىڭ جالاقىسىن كوتەرۋ قارالىپ جاتىر

استانا. قازاقپارات - مەكتەپكە دەيىنگى ءبىلىم بەرۋ ۇيىمدارىندا جۇمىس ىستەپ جۇرگەن پەداگوگتەردىڭ جالاقىسىن ءوسىرۋ باعىتىندا ءتيىستى ءىس- شارالار پىسىقتالىپ جاتىر.

بۇل تۋرالى وقۋ-اعارتۋ مينيسترلىگىنىڭ «بالالاردى ەرتە دامىتۋ ينستيتۋتى» ر م م ديرەكتورى مانارا اداموۆا ايتتى، دەپ حابارلايدى قازاقپارات.

بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا بالاباقشا پەداگوگتەرىنىڭ ورتاشا جالاقىسى تۋرالى سۇراق قويىلدى.

«ەگەر 5 جىلعا دەيىنگى ەڭبەك ءوتىلى بار جانە ەڭ تومەنگى Ⅱ ساناتى بار بالاباقشا پەداگوگىنىڭ ورتاشا ايلىعىنا توقتالساق، شامامەن 164-172 مىڭ تەڭگەنى قۇرايدى. سونىمەن قاتار، تاجىريبەسى جوق، جۇمىسقا ەندى عانا ورنالاسقان جاس ماماننىڭ جالاقىسى 94-120 مىڭ تەڭگە ارالىعىندا بولادى. ارينە، وسى سوماداعى جالاقى تىم از ەكەنى تۇسىنىكتى. سول سەبەپتى مەكتەپكە دەيىنگى ۇيىم پەداگوگتەرىنىڭ تابىسىن تاعى دا كەزەڭ-كەزەڭمەن كوتەرۋدى قاراستىرىپ جاتىرمىز»، - دەدى م. اداموۆا.

وسى ورايدا ول 2023-جىلدىڭ اياعىنا دەيىن مەكتەپكە دەيىنگى ۇيىم پەداگوگتەرىنىڭ ايلىعىن كوتەرۋ ماسەلەسى قاراستىرىلاتىنىن ايتتى.

ايتا كەتەيىك، 2022-جىلعى قىركۇيەكتەگى جولداۋىندا مەملەكەت باسشىسى قاسىم-جومارت توقايەۆ بالالاردى بالاباقشامەن قامتاماسىز ەتۋ ماسەلەسىن تۇپكىلىكتى شەشۋدى، سونداي-اق تاربيەشىلەردىڭ الەۋمەتتىك مارتەبەسىن ارتتىرىپ، جالاقىسىن كوبەيتۋدى تاپسىردى.

بۇدان بۇرىن حابارلانعانداي، مەكتەپكە دەيىنگى ءبىلىم بەرۋ ۇيىمدارىندا 97408 پەداگوگ جۇمىس ىستەپ ءجۇر. ونىڭ ىشىندە اۋىلداردا 41596 (B,7)، ال قالادا 55811 (W,3) ادام قامتىلعان.

ەلىمىزدەگى مەكتەپكە دەيىنگى ۇيىمداردىڭ 70 پايىزعا جۋىعى قازاق تىلىندە ءبىلىم بەرىپ جاتىر.

كەيىنگى 4 جىلدا بالاباقشا كەزەگىندە تۇرعاندار سانى ەكى ەسەگە ازايدى.