موڭعول يمپەرياسى كەزىندەگى مونەتالاردى ا ق ش-قا جونەلتپەك بولعان

الماتى. قازاقپارات - الماتى قالاسى بويىنشا مەملەكەتتىك كىرىستەر دەپارتامەنتى «جەتىسۋ» كەدەن بەكەتىنىڭ ماماندارى الماتى قالاسى اۋەجايىنداعى حالىقارالىق پوشتا جونەلتىلىمدەرىن باقىلاۋ ۋچاسكەسىندە قازاقستاننان ا ق ش-قا كونە مونەتالاردى زاڭسىز اكەتۋگە جول بەرمەدى، دەپ حابارلايدى قازاقپارات.

«قۇجاتتارعا ارنالعان قاپتاما قاپشىعىنىڭ سىرتىنا مونەتالاردى جاسىرۋ فاكتىسىن كەدەن قىزمەتكەرلەرى قوندىرعىنىڭ رەنتگەنوگرافياسىن پايدالانىپ، سكانەرلەۋ بارىسىندا انىقتادى. بۇل مونەتالار V- XIII عاسىرلار ارالىعىندا ورتا ازيا اۋماعىندا جاسالعان جانە تاريحي قۇندىلىققا يە»، - دەپ جازدى مەملەكەتتىك كىرىستەر كوميتەتىنەن.

دەپارتامەنت باسشىسىنىڭ ورىنباسارى داۋرەن مۇستافيننىڭ ايتۋىنشا، تابىلعان زاتتار قازاقستان رەسپۋبليكاسىنىڭ زاڭناماسىنا سايكەس ەلدەن اكەتۋ كەزىندە مىندەتتى دەكلاراتسيالاۋعا جاتاتىن جانە ۋاكىلەتتى ورگاننىڭ رۇقساتى بولعان جاعدايدا عانا مۇمكىن بولاتىن مادەني-تاريحي قۇندىلىقتار ساناتىنا جاتادى.

قازىرگى ۋاقىتتا انىقتالعان فاكت بويىنشا الىنعان زاتتار مەن ماتەريالدار ساراپشىلارعا بەرىلدى، ولار قورىتىندىدان كەيىن مونەتالاردى اكەتۋگە ارەكەت جاساعان ادامعا قاتىستى ءتيىستى پروتسەستىك شەشىم قابىلدايتىن بولادى.

ايتا كەتۋ كەرەك، سوڭعى ۋاقىتتا تىيىم سالىنعان تاۋارلاردى كونتراباندالىق جولمەن اكەلۋ ءۇشىن پوشتا جونەلتىلىمدەرىنىڭ ارناسى كوبىرەك قولدانىلۋدا.

تەك 2022 -جىلى الماتى قالاسىنىڭ اۋەجايىندا اينالىمعا تىيىم سالىنعان تاۋارلاردى، ونىڭ ىشىندە ەسىرتكى مەن پسيحوتروپتىق زاتتاردى، قارۋ-جاراق پەن وق-دارىلەردى كەدەندىك شەكارا ارقىلى وتكىزۋدىڭ ونداعان جاعدايلارى توقتاتىلدى.

فوتو: kgd.gov.kz