ەلدە حالىقارالىق جۇك تاسىمالىنا قاتىستى تالاپتار كۇشەيەدى

ماقسات - ىشكى نارىق پەن وتاندىق تاسىمالداۋشىلاردىڭ مۇددەسىن قورعاۋ، دەپ حابارلايدى «حابار 24».

پاۆەل تەليتسين - 30 جىلعا جۋىق تاجىريبەسى بار جۇك تاسىمالداۋشى. ول كوبىندە ەۋرووداق ەلدەرىمەن جۇمىس ىستەيدى. جاڭا تالاپتاردى ازىرلەۋگە قاتىسقان جۇمىس توبىنىڭ مۇشەسى. ايتۋىنشا، حالىقارالىق جۇك تاسىمالىنىڭ رۇقساتىن ءجون- جوسىقسىز الىپ- ساتاتىندار كوبەيگەن. ال جاڭا ەرەجە «رۇقسات» قاعازىن الۋ ءۇشىن جالعان كومپانيا اشاتىن پىسىقايلاردىڭ جولىنا توسقاۋىل بولادى. بۇدان بۇرىنعى «رۇقسات بەرۋ» جۇيەسىندەگى قۇجات «ۇستاعاننىڭ قولىندا، تىستەگەننىڭ اۋزىندا» كەتىپ جۇرگەن.

پاۆەل تەليتسىن، جۇك تاسىمالداۋشى:

- حالىقارالىق اۆتوكولىك جۇكتەرىنە رۇقسات بلانكىسى بەرىلەدى. بۇل - ليتسەنزيانىڭ ءبىر ءتۇرى. ونسىز بىردە- ءبىر جۇك كولىگىنىڭ جۇرگىزۋشىسى شەكارادان وتە المايدى. ال كەيىنگى كەزدەرى «رۇقسات بەرۋ» جۇيەسىندە بۇرمالاناتىن جاعدايلار كوپ بولدى. زاڭسىز دەلدالدار «ادال» رۇقساتى بار جۇك تاسىمالداۋشىلارىنا قيىندىق تۋعىزدى.

اتاپ ايتقاندا، ەنگىزىلگەن جاڭا تالاپتار ارقىلى اۆتوكولىك قۇرالدارىنا رۇقسات بەرۋدىڭ ناقتى مەرزىمى بەلگىلەندى. ءارى شەتەلدىك رۇقسات قۇجاتىن الۋدىڭ ءتارتىبى ايقىندالدى.

جاسۇلان مارالبايەۆ، ق ر ي ي د م كولىك كوميتەتى باسقارماسىنىڭ باسشىسى:

- رۇقساتتامالاردى ءۇشىنشى تۇلعالارعا بەرۋ، قايتا ساتۋ جاعدايلارى انىقتالعان كەزدە رۇقساتتاما كۋالىگى دەرەۋ توقتاتىلادى. سونداي- اق وسى قۇجاتتارعا رۇقسات الۋعا قويىلاتىن تالاپتار بەلگىلەندى. ياعني، بۇرىن ەلەكتروندى تۇردە 3 قۇجات بەرىلەتىن. قازىر بۇل قۇجاتتار 12-گە دەيىن ءوستى. ءبىز تالاپتاردى كۇشەيتۋدىڭ ءتۇرلى شارالارىن قابىلدادىق. اۆتوكولىكپەن حالىقارالىق جۇك تاسىمالداۋ ءۇشىن قازاقستان مەن شەت مەملەكەتتەر اراسىندا ەكى جاقتى كەلىسىم بولۋى ءتيىس. ياعني، شەتەلدىك رۇقسات كۋالىگى بولماسا، جۇك تاسىمالىنا جولداما بەرىلمەيدى.

بۇگىندە ەلىمىز 42 ەلمەن كەلىسىم جاساعان. ايتا كەتۋ كەرەك، قىزمەتتەر ەلەكتروندى تۇردە كورسەتىلەدى.

تالعات ەسەنگەلدى، قازاقستان كولىكشىلەر وداعى اۆتوموبيل كولىگى ماسەلەلەرى بويىنشا اتقارۋشى ديرەكتورى:

- قازىرگى تاڭدا 10 مىڭعا جۋىق وتاندىق تاسىمالدۋشىلار حالىقارالىق تاسىمالداۋعا رۇقسات بەرۋ كۋالىگىن العان جانە 44 مىڭ اۆتوكولىككە كارتوچكالار الىنعان. نەگىزىندە مەملەكەتتىك تاسىمالداۋشىلار ونداي كوپ ەمەس. ولاردىڭ كوبىسى باسقا ماقساتپەن اشىلعان بولىپ وتىر. بەلگىلى ءبىر جوبامەن، مىسالى، 2000 رۇقسات بلانكىسىمەن كەلىسىپ، كۆوتامەن الىپ وتىرساق، 5 مىڭعا جۋىق ۇسىنىس بولىپ تۇسەدى.

ماماندار وزگەرتىلگەن ەرەجە وتاندىق جۇك تاسىمالداۋشىلاردىڭ باسەكەگە قابىلەتتىلىگىن ارتتىراتىنىن ايتادى. ءارى «ساڭىراۋقۇلاقشا» قاپتاعان جالعان كومپانيالاردىڭ جولىنا تۇساۋ بولادى.

اۆتورلارى: اينۇر قۋات قىزى، اقىلبەك ەسىمسەيىتوۆ.