تۇركياداعى جەر سىلكىنىسىنەن كەيىنگى «تاڭعاجايىپ قۇتقارۋلار» - شەتەلدەگى قازاق باسپا ءسوزى
جەر سىلكىنىسىنەن كەيىنگى قۇتقارۋ جۇمىسى كەزىندەگى عاجايىپ وقيعالار - «TRT»
ەپيسەنترى كاحرامانماراشتا بولعان جانە 10 ايماقتى قامتىعان جەر سىلكىنىستەرىنەن كەيىن ىزدەۋ- قۇتقارۋ توپتارى زارداپ شەككەندەردەردى قۇتقارۋ ءۇشىن كۇندىز-ءتۇنى توقتاماي جۇمىس ىستەدى. ءۇيىندى استىنان قۇتقارىلعان جاندار از دا بولسا ادامداردىڭ كوڭىلىن كوتەرۋدە. بۇنداي «عاجايىپ قۇتقارۋلار» بۇكىل تۇركيانى اسەرلەندىردى، دەپ جازادى تۇركيا راديو تەلەۆيزيا پورتالى.
تۇركيالىق ب ا ق-تىڭ دەرەگىنشە، گازيانتەپتە قۇلاعان عيماراتتىڭ قيراندىلارى استىندا قالعان 40 جاستاعى سيبەل كايا 170 ساعاتتان كەيىن قۇتقارىلدى. ادىياماننىڭ بەسني اۋدانىندا 60 جاستاعى ەرەنگۇل وندەر 166 ساعاتتان كەيىن، 10 جاستاعى اسيما بالتاجى ادىياماندا 158 ساعاتتان كەيىن قۇتقارىلدى.
سونداي-اق، 14 جاستاعى وسمان حالەبيە انتاكيادا جەر سىلكىنىسىنىڭ 260-ساعاتىندا عيمارات قيراندىلارىنىڭ استىنان امان- ەسەن قۇتقارىلعان.
ال، 26 جاستاعى مەحمەت الي شاكيروعلۋ مەن 34 جاستاعى مۇستافا اۆجى حاتايدىڭ انتاكيا اۋدانىندا جەر سىلكىنىسىنىڭ 261-ساعاتىندا ۇيىندىگە اينالعان ءۇي استىنان قۇتقارىلعان.
ايتا كەتەيىك، تۇركيانىڭ حاتاي پروۆينتسياسىندا جەر سىلكىنىسىنەن كەيىن 278 ساعات وتكەندە ءۇيىندى استىنان ەر ادام امان تابىلسا، 45 جاستاعى حاكان ياسينوعلى ون ءبىر كۇن بويى دەفنە اۋدانىنداعى قۇلاعان عيماراتتىڭ استىندا جاتقان.
تۇركيانىڭ وڭتۇستىگىندەگى حاتاي پروۆينتسياسىندا جويقىن جەر سىلكىنىسىنەن كەيىن 13-كۇنى ءۇيىندى استىنان 3 ادام قۇتقارىلدى. قۋانىشتى حابار سەنبى كۇنى انتاكيا قالاسىنان كەلدى. جەراستى دۇمپۋلەرىنەن كەيىن 296 ساعات وتكەندە ەر ادام، ايەل جانە بالا قۇتقارىلدى، قازىر اتى- جوندەرى انىقتالۋ ۇستىندە. ولارعا العاشقى مەديتسينالىق كومەك كورسەتىلىپ، سودان كەيىن اۋرۋحاناعا جىبەرىلگەن.
قازاقستان مەن ە ە و- نىڭ ساۋدا اينالىمى 28 ميلليارد دوللاردى قۇرادى - «Parstoday»
قازاقستان مەن ەۋرازيالىق ەكونوميكالىق وداقتىڭ ساۋدا اينالىمى 28 ميلليارد دوللاردى قۇرادى. 2022 -جىلى قازاقستاننىڭ ەۋرازيالىق ەكونوميكالىق وداققا مۇشە ەلدەرمەن ساۋدا اينالىمىنىڭ كولەمى 2021 -جىلمەن سالىستىرعاندا 6,5 پايىزعا ءوسىپ، 28,3 ميلليارد دوللارعا جەتتى.
بۇل تۋرالى وسى اپتادا يراننىڭ «Parstoday» اقپارات اگەنتتىگى حابارلادى.
اتالعان ب ا ق-تىڭ مالىمەتىنشە، 2022 -جىلدىڭ قاڭتار- جەلتوقسان ايلارىندا قۇنى 9,7 ميلليارد دوللاردى قۇرايتىن تاۋار ەكسپورتتالدى. بۇل ەكسپورت كولەمىنىڭ 24,3 پايىزعا وسكەنىن كورسەتەدى. 18,6 ميلليارد دوللارعا تاۋار يمپورتتالدى. 2021 -جىلمەن سالىستىرعاندا تەك 0,9 پايىزعا وسكەن. قازاقستاننىڭ ەۋرازيالىق ەكونوميكالىق وداققا مۇشە ەلدەرمەن ساۋدا اينالىمى كولەمىنىڭ 92,3 پايىزى رەسەي، 4 پايىزى قىرعىزستان، 3,6 پايىزى بەلارۋس جانە 0,1 پايىزى ارمەنيانىڭ ۇلەسىندە.
ايتا كەتەيىك، يراندىق باسىلىم بۇل اقپاراتتى قازاقستان ۇلتتىق ستاتيستيكالىق بيۋروسىنىڭ مالىمەتىنەن العان.
20 جىل مينيستر بولعان قانداسىمىزعا ارنالعان عىلىمي كونفەرەنتسيا ءوتتى - «Kaznews»
موڭعوليانىڭ قۇرىلىس ءمينيسترى قىزمەتىن 20 جىل اتقارعان، موڭعولياعا «ەڭبەك سىڭىرگەن قۇرىلىسشى» تىلەيحان ورىن ۇلىنىڭ تۋعانىنا 100 -جىل تولۋىنا وراي ۇلانباتىر قالاسىنداعى و. تىلەيحان اتىنداعى قۇرىلىس پوليتەحنيكالىق كوللەجىندە عىلىمي- پراكتيكالىق كونفەرەنتسيا ءوتتى، دەپ حابارلايدى موڭعوليانىڭ «Kaznews» اقپاراتتىق پورتالى.
اتالعان ب ا ق-تىڭ مالىمەتىنشە، وعان ەلىمىزدىڭ بەلگىلى تاريحشى عالىمدارى، قۇرىلىس سالاسىنىڭ مايتالماندارى، بيلىك وكىلدەرى قاتىسقان.
موڭعوليالىق ب ا ق-تىڭ دەرەگىنشە، تىلەيحان ورىن ۇلى 1923 -جىلى بايان-ولگي ايماعى ۋلاانحۋس سۇمىنىندا دۇنيەگە كەلگەن. تىلەيحان ورىن ۇلىن 1935-1941 -جىلدارى اتالمىش سۇمىننىڭ ورتا مەكتەبىندە ءبىلىم الىپ، 1942-1944 -جىلدارى ۇلانباتىر قالاسىنداعى پارتيا مەكتەبىن «وتە جاقسى» دەگەن باعامەن ءبىتىرىپ شىققان. 1944-1947 -جىلدارى سول وقۋ ورنىندا ۇستازدىق قىزمەت اتقارعان. كەيىن پارتيا قىزمەتىنە اۋىسىپ، ەلدىڭ ساياسي ومىرىنە بەلسەندى تۇردە ارالاسا باستاعان.
تىلەيحان ورىن ۇلى قۇرىلىس، ماتەريال، ءوندىرىس ءمينيسترى قىزمەتىن 1962-1982 -جىلعا دەيىن اتقارعان.
سونداي-اق، وسى اپتادا موڭعوليالىق ب ا ق-تا «بەكنۇر قالي ۇلى بوكستان ەل چەمپيونى اتاندى» دەگەن اقپارات جاريالاندى.
«Kaznews» اقپاراتتىق پورتالىنىڭ كەلتىرگەن مالىمەتىنە سۇيەنسەك، 11-12-اقپان كۇندەرى «ورتالىق» سپورت كەشەنىندە ەرەسەكتەر اراسىندا بوكستان موڭعوليا چەمپيوناتى مارەسىنە جەتتى. 5 كۇن بويى 185-كە جۋىق بىلعارى قولعاپ شەبەرى ءوزارا مىقتىنى انىقتاعان.
قاينار قايساناي ۇلى باستاعان بايان-ولگي ايماعىنىڭ بىلعارى قولعاپ شەبەلەرى 1 التىن، 3 كۇمىس جانە 1 قولا جۇلدەگە يە بولعان.
اتاپ ايتار بولساق، +92 كەلى سالماقتا فينالدا بەكنۇر قالي ۇلى مەن ەربولات تولەك ۇلى كەزدەسىپ، 4:1 ەسەبىمەن بەكنۇر قالي ۇلى بوكستان 2023 -جىلعى ەل چەمپيونى اتاندى. ەربولات تولەك ۇلى ەل چەمپيوناتىنىڭ كۇمىس جۇلدەسىن يەلەنگەن.
ەرلەر اراسىنداعى 75 كەلىدە جاندوس اسقار ۇلى كۇمىس جۇلدەگەر، 60 كەلى سالماقتا نۇرلان اسقار ۇلى قولا جۇلدەگەر اتاندى.
سونىمەن قاتار قىزدار اراسىندا 75 كەلىدە زەينەپ ءازىمباي قىزى مەن 48 كەلى سالماقتا نالايحاندىق جانارگۇل بەيسەنبەي قىزى دا فينالعا دەيىن جەتىپ، كۇمىس جۇلدەگەر اتاندى.
سونداي-اق، ەركىن جامانتاي ۇلى جاتتىقتىراتىن «حيلچين» سپورت كلۋبى قورىتىندى ەسەپ بويىنشا ءۇشىنشى ورىننان كورىنگەن.
كاسپيدە يران مەن قازاقستان اراسىندا تۇراقتى جانە بىرلەسكەن كەمە قاتىناسىن قۇرۋ تۋرالى ۇسىنىس جاسالدى - «Parstoday»
يراننىڭ پورتتار جانە تەڭىز ۇيىمىنىڭ باس ديرەكتورى الياكبار سافاي كاسپي تەڭىزىندە يران مەن قازاقستان اراسىندا ورتاق جانە تۇراقتى كەمە قاتىناسىن قۇرۋدى ۇسىندى، دەپ حابارلايدى يراندىق «Parstoday» اقپارات اگەنتتىگى.
اتالعان اقپارات اگەنتتىگىنىڭ حابارلاۋىنشا، الياكبار سافاي قازاقستاننىڭ تەگەرانداعى ەلشىسىمەن كەزدەسۋىندە بۇل ۇيىمنىڭ يراننىڭ سولتۇستىگى مەن وڭتۇستىگىندەگى پورت وپەراتسيالارى بويىنشا كەلىسىم-شارتتى قازاقستاندىق جەكە سەكتور ينۆەستورلارىنا بەرۋگە دايىن ەكەنىن بىلدىرگەن. جانە ەكى ەلدىڭ ۇزاق مەرزىمدى مۇددەلەرىنە ساي جەتكىزىلىم تىزبەگى مەن تەڭىز لوگيستيكاسىن قۇرۋدى باعالادى.
يراننىڭ جول جانە قالا قۇرىلىسى ءمينيسترىنىڭ ورىنباسارىنىڭ ايتۋىنشا، قازاقستاندىق كومپانيالاردىڭ يراننىڭ سولتۇستىگى مەن وڭتۇستىگىندەگى پورتتارعا سالعان كەز كەلگەن ينۆەستيتسياسى شەتەلدىك ينۆەستيتسيالاردى قورعاۋ زاڭىمەن قولداۋ تابادى.
اسقات ورازباي قازاقستان ۇكىمەتىنىڭ يران پورتتارى ارقىلى ايماق ەلدەرىمەن ەكونوميكالىق جانە ساۋدا قاتىناستارىن دامىتۋعا مۇددەلى ەكەنىن ايتقان.
وزبەكستاندا قاي ەلدەردىڭ كاپيتالىمەن قانشا كاسىپورىن بار ەكەنى بەلگىلى بولدى - «ءوز ا»
2023 -جىلعى 1-اقپانداعى جاعداي بويىنشا رەسپۋبليكادا جۇمىس ىستەيتىن شەتەلدىك كاپيتالدىڭ قاتىسۋىمەن كاسىپورىندار مەن ۇيىمداردىڭ سانى 15481 دى قۇرادى. ونداعى دەرەك بويىنشا، وزبەكستانداعى شەتەلدىك كاسىپورىندار سانى بويىنشا رەسەي كوش باستاپ تۇر، دەپ جازادى «ءوز ا» اقپاراتتىق اگەنتتىگى.
سونداي-اق، شەتەل كاپيتالىنىڭ قاتىسۋىمەن جۇمىس ىستەپ تۇرعان كاسىپورىنداردىڭ سانى وتكەن جىلدىڭ سايكەس كەزەڭىمەن سالىستىرعاندا 2088 گە وسكەن.
وزبەكستاندىق باسىلىمى شەتەل كاپيتالىنىڭ قاتىسۋىمەن جۇمىس ىستەيتىن كاسىپورىنداردىڭ سانى جاريالاعان. اتاپ ايتقاندا، رەسەيدەن – 3151، تۇركيادان - 2152، قىتايدان - 2104، قازاقستاننان - 1227، كورەيادان – 903 تى قۇرايدى.
قازاقستان ءۇش ەل شەكاراسىندا ەلەكتروندى كەزەك جۇيەسىن ەنگىزبەك - People.cn
قازاقستان ءۇش ەل شەكاراسىندا ەلەكتروندى كەزەك جۇيەسىن ەنگىزبەك.
اقپان ايىنىڭ اياعىنا دەيىن قازاقستانداعى ءتورت وتكىزۋ بەكەتىندە ەلەكتروندى كەزەك جۇيەسى ەنگىزىلمەك. بۇل تۋرالى وسى اپتادا قىتايدىڭ «People.cn» اقپاراتتىق پورتالى قازاقپاراتقا سىلتەمە جاساپ حابارلادى.
ايتا كەتەيىك، بۇل تۋرالى مەملەكەتتىك كىرىستەر كوميتەتىنىڭ باسپا ءسوز قىزمەتى مالىمدەگەن بولاتىن.
ەسكە سالايىق، ولاردىڭ ەكەۋى - قىتاي شەكاراسىنداعى «باقتى» (اباي وبلىسى) جانە «مايقاپشاعاي» (ش ق و) بەكەتى. «CarGoRuqsat» سەرۆيسى «باقتى» بەكەتىندە 15-اقپاننان، ال «مايقاپشاعاي» بەكەتىندە 20-اقپاننان باستاپ ىسكە قوسىلماق.
سونىمەن قاتار، تاعى ەكى بەكەت ماڭعىستاۋدا وبلىسىندا ورنالاسقان. «تەمىر- بابا» بەكەتىندە كەزەك 22 اقپاندا، ال «تاجەن» بەكەتىندە 27-اقپاندا ەنگىزىلمەك. ءبىرىنشىسى تۇرىكمەنستانمەن، ال ەكىنشىسى وزبەكستانمەن شەكارادا.
«سەرۆيستى جاساپ شىعارۋشىلاردىڭ ايتۋىنشا، جۇيە ۇدايى جەتىلدىرىلىپ كەلەدى. جۋىردا Face ID، ياعني ادامنىڭ كەلبەتىن سكانەرلەپ تەكسەرۋمەن تولىعىپ، شەتەلدىك ازاماتتار ءۇشىن بانك كارتاسى ارقىلى راستاۋ قىزمەتى ىسكە قوسىلماق» ، دەپ جازدى قىتايلىق باسىلىم.
قازاقستاننان كەلگەن كومەكتى ت ر سىرتقى ىستەر ءمينيسترى كۇتىپ الدى - «TRT»
قازاقستان پرەزيدەنتى قاسىم-جومارت توقايەۆتىڭ تاپسىرماسى بويىنشا باۋىرلاس تۇركيا ەلىندە بولعان جويقىن جەر سىلكىنىسىنەن زارداپ شەككەندەرگە كومەك كورسەتۋگە ارنالعان جالپى كولەمى 55 توننالىق گۋمانيتارلىق كومەك (شاتىر، جىلىتقىش، جىلى كيىم، كورپە- توسەك، جامىلعىش جانە ت. ب. تۇرمىستىق زاتتار) قازاقستاننان جۇك اۋە كولىگىمەن تۇركيانىڭ گازيانتەپ قالاسىنا جەتكىزىلدى.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
اتالعان ب ا ق-تىڭ دەرەگىنشە، گازيانتەپ قالاسىنا كەلگەن گۋمانيتارلىق كومەكتى تۇركيا رەسپۋبليكاسىنىڭ سىرتقى ىستەر ءمينيسترى ميەۆلۇت چاۆۋشوعلۋ جەكە كۇتىپ الىپ، قازاقستاننىڭ تۇركياداعى توتەنشە جانە وكىلەتتى ەلشىسى ەركەبۇلان ساپيەۆكە جانە قازاقستاننىڭ توتەنشە جاعدايلار مينيسترلىگىنەن كەلگەن قۇتقارۋشىلارعا العىسىن ءبىلدىردى. سونداي-اق، «TRT»-دا «قازاقتىڭ كيىز ۇيلەرى تىگىلدى» دەگەن اقپاراتتا جارىق كوردى.
تۇركيالىق باسىلىمنىڭ كەلتىرگەن دەرەگىنە سۇيەنسەك، قازاقستاننان تۇركياعا جەتكەن كيىز ۇيلەر كاحرامانماراش ەلدى- مەكەنىنە جەتكىزىلگەن. ەندى قازاق كيىز ۇيلەرىنە جەر سىلكىنىسىنەن زارداپ شەككەندەر ورنالاستىرىلادى.
«جەر سىلكىنىسى بولعان ايماقتا كيىز ءۇيدى قازاقستاننان ارنايى كەلگەن ازاماتتار مەن تۇركياداعى قازاق دياسپوراسىنىڭ وكىلدەرى جانە ستۋدەنتتەردەن تۇراتىن 70 تەن استام ادام تىگىپ بولدى»، دەپ جازدى «TRT».
اۆتور
بەيسەن سۇلتان ۇلى