ەردوعاننان سىيلىق العان بالاقاي: تۇركياداعى جاڭالىقتارعا الاڭداپ وتىرامىن
حاكىم ابايدىڭ ولەڭىن جاتقا وقىپ، ەستافەتانى رەجەپ تايىپ ەردوعانعا جولداعان بالانىڭ ۇيىنە بىلتىر تۇركيا ەلشىلىگىنەن قوناق تا كەلگەن. بايجىگىت باۋىرلاس ەلدەگى سوڭعى جاعدايلاردى ەستىگەندە قاتتى كۇيزەلگەنىن ايتادى. جۋىردا اۋداندىق مادەنيەت ۇيىندە م. ماقاتايەۆقا ارنالعان كەشكە قاتىسقانى ءۇشىن العان اقشالاي سىيلىعىن تۇركيا جۇرتىنا كومەك رەتىندە جىبەرىپتى.
تۇركيا پرەزيدەنتىنىڭ سىيلىعى
اۋەلى بايجىگىتتىڭ ەردوعاننان سىيلىق الۋىنا سەبەپ بولعان وقيعاعا ءبىر كوز جۇگىرتىپ وتەيىك. ۇلى ابايدىڭ 175 جىلدىق مەرەيتويىندا 9 جاسار ءلايلىم رىسقالي اقىن ولەڭىن جاتقا وقىپ، ەستافەتانى مەملەكەت باسشىسى قاسىم-جومارت توقايەۆقا جولداعان ەدى. ال، بايجىگىت ەسىمدى تارباعاتايلىق بالا ەستافەتانى تۇركيا پرەزيدەنتىنە باعىتتاۋعا نيەت بىلدىرگەن. ونىڭ بۇل باتىلدىعىنا اكەسى دۋلات بايكۇبەنوۆ قولداۋ تانىتادى.
ۆيدەو جەلىگە جۇكتەلگەننەن كەيىن ارادا 1 جارىم جىلداي ۋاقىت وتكەن سوڭ اۋىلعا انادولى ەلىندەگى TRT AVAZ تەلەارناسىندا بايجىگىت جايلى سيۋجەت كورسەتىلگەنى تۋرالى حابار جەتتى. سودان كەيىن تۇركيانىڭ قازاقستانداعى ەلشىلىگى حابارلاسىپ، اكەسى مەن ۇلىن استاناعا شاقىرعان. ەلورداداعى ەلشىلىك عيماراتىندا وقۋشىعا تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋدىڭ حاتى، پرەزيدەنت اتىنان تۇركيا تۋى بەدەرلەنگەن جانە «بايجىگىت» دەگەن جازۋى بار التىن بىلەزىك پەن گادجەت سىيعا تارتىلدى.
وتكەن جىلدىڭ مامىر ايىندا تۇعىل اۋىلىنا ەلشىلىك جانىنداعى ءبىلىم ءبولىمىنىڭ باسشىسى ابدۋلمۋتاليب چەتين مەن تۇركياداعى TRT AVAZ تەلەارناسىنىڭ باسشىسى مەحمەد زاحيد قوناققا كەلدى. ماقساتى - بايجىگىتتىڭ كىندىك قانى تامعان جەرمەن تانىسۋ، ءۇيىن، وقىپ جاتقان مەكتەبىن كورۋ. قوناقتار مەكتەپكە بارىپ، وقۋشىلارعا سىيلىقتار بەرگەن. ودان سوڭ اۋىلدىق مەشىتكە باس سۇعىپ، قۇران كىتابىن تاراتتى. بۇدان بولەك، جاعدايى تومەن 30 وتباسىنا ازىق- تۇلىكپەن كومەك كورسەتكەن.
بالا تىلەگى
قازىر بايجىگىت 3-سىنىپتا وقيدى. ول «قازاقپارات» تىلشىسىنە باۋىرلاس ەلدەگى جويقىن جەر سىلكىنىسى تۋرالى حاباردى العاش ەستىگەندە قانداي اسەردە بولعانىن ايتىپ بەردى.
«بۇل سۋىق حاباردى ەستىگەندە، ءبىرىنشى قاتتى ۇرەيلەندىم. ودان سوڭ كۇيزەلىپ، ۋايىمداي باستادىم. الەۋمەتتىك جەلى ارقىلى جانە تەلەارنالارداعى جاڭالىقتاردان ءبارىن كورىپ وتىردىم. كىشكەنتاي بالالار امان بولسا ەكەن، اتا-انالارى ءتىرى تابىلسا عوي دەپ تىلەدىم»، - دەيدى وقۋشى.
بايجىگىت 9 اقپاندا اۋداندىق مادەنيەت ۇيىندە م. ماقاتايەۆقا ارنالعان كەشكە قاتىسقانى ءۇشىن اقشالاي سىيلىق الىپتى. سول اقشانى بىردەن تۇركيا حالقىنا كومەك رەتىندە AFAD قورىنا اۋدارعان. بالاقاي ءالى كۇنگە دەيىن الاڭداپ، سوڭعى جاڭالىقتاردى قاراپ، ەلەڭدەپ ءجۇر.
اۋىل تۇرعىندارىنىڭ كومەگى
وقۋشىنىڭ اكەسى دۋلات بايكۇبەنوۆ تۇركياداعى جاعدايدى ەستىگەندە مۇلدە سەنگىسى كەلمەگەنىن ايتتى.
«تۇركياداعى تۇرىك باۋىرلارىمىزعا WhatsApp جەلىسى ارقىلى حابارلاستىم. جاۋاپ بولمادى. ارتىنان وزدەرى بەينەقوڭىراۋمەن بايلانىسقا شىقتى. كوز جاستارىن تىيا الماي، جەر سىلكىنىسىنىڭ زارداپتارىن ايتتى. ء«بىز ءۇشىن اللاعا دۇعا جاساڭىزدار» دەپ ءوتىندى. مەنىڭ دە كوزىمە ىستىق جاس كەلدى. «دۇعادامىز، بىرگەمىز» دەدىك. سودان سوڭ تۇركيا حالقىنا كومەكتەسۋ ءۇشىن ازىق- تۇلىك، كيىم- كەشەك جيناۋمەن اينالىسپاق بولدىق. كەيىننەن AFAD قورىنا اقشا اۋدارۋعا بولاتىنىن بىلدىك. قازىر تۇعىل اۋىلىنداعى مەشىت جاماعاتى قارجى جيناپ جاتىر»، - دەيدى ول.
دۋلات بىلتىر تارباعاتايعا كەلگەن TRT AVAZ تەلەارناسىنىڭ باسشىسى مەحمەد زاحيدتەن قانداي كومەك قاجەتتىگىن سۇراعان. ول نەگىزىنەن جىلىتقىشتار قاجەت دەپ ايتىپتى.
«تۇعىلدان جىلىتقىشتار جىبەرۋدى ۇيىمداستىرىپ جاتىرمىز. ودان سوڭ اۋىل اكىمدىگىنىڭ قىزمەتكەرلەرى ءبىر كۇندىك جالاقىلارىن كومەك رەتىندە اۋدارماق. جالپى، اۋىلداعى بارشا حالىق تۇرىك اعايىنداردىڭ اماندىعىن، وسى سىناقتان امان- ەسەن ءوتۋىن تىلەپ وتىرمىز»، - دەيدى دۋلات بايكۇبەنوۆ.
تارباعاتايلىق ازامات قازاقستاننىڭ تۇركياعا كومەگى، ياعني پرەزيدەنت قاسىم-جومارت توقايەۆتىڭ گۋمانيتارلىق، قارجىلاي كومەك بەرۋ تۋرالى شەشىمى دەر كەزىندە قابىلدانعانىنا ريزا.
«سول جاققا اتتانعان ەلىمىزدىڭ قۇتقارۋشىلارىنا، مەديتسينا قىزمەتكەرلەرىنە العىس بىلدىرەمىن. بارلىعى امان- ەسەن ورالسىن. تۇرىك باۋىرلارىمىزعا سابىر مەن شىدامدىلىق تىلەيمىن. جاراتقان جەڭىلدىگىن بەرسىن. ءبىز سىزدەرمەن بىرگەمىز!» - دەيدى بايجىگىتتىڭ اكەسى.
ەسكە سالساق، 6-اقپاندا تۇركيادا 7 بالدان اساتىن جەر سىلكىنىسى بولدى. قاسىم- جومارت توقايەۆ تۇركيا پرەزيدەنتىنە كوڭىل ايتىپ، ۇكىمەتكە تۇركياعا شۇعىل كومەك كورسەتۋدى تاپسىرعان. بۇل - تۇركيادا كەيىنگى 100 جىلدا بولعان ەڭ جويقىن جەر سىلكىنىسى.
سونداي-اق، ش ق و حالقىنىڭ تۇركيا مەن سيرياداعى زارداپ شەككەندەرگە 10 توننادان استام گۋمانيتارلىق كومەك جيناعانىن حابارلاعان ەدىك.
كەيىپكەردىڭ جەكە مۇراعاتىنان
اۆتور
تالعاتجان مۇحامەتبەك ۇلى