تۇركىستاندا جەتىم بالالار مەن كوپبالالى وتباسىلار ءۇي كەزەگىنەن سەبەپسىز شىعارىلعان

تۇركىستان. قازاقپارات - تۇركىستان قالاسىندا جەتىم بالالار مەن كوپ بالالى وتباسىلار تۇرعىن ءۇي كەزەگىنەن سەبەپسىز شىعارىلعان.

بۇل تۋرالى سىبايلاس جەمقورلىققا قارسى ءىس قيمىل اگەنتتىگىنىڭ تۇركىستان وبلىسى بويىنشا دەپارتامەنتى باسشىسىنىڭ ورىنباسارى داۋلەت نارىمبەتوۆ مالىمدەدى، دەپ حابارلايدى قازاقپارات ءتىلشىسى.

تۇركىستاندا تۇرعىن ءۇي- كوممۋنالدىق شارۋاشىلىعى ءبولىمى تاراپىنان تۇرعىن ءۇي بەرۋ كەزىندە 2018 -جىلى 2330 ادام كەزەكتە تۇرعانىنا قاراماستان، 2019، 2020، 2021 -جىلدارى كەزەكتە تۇرعان ازاماتتارعا كەزەكتەن تىس تۇرعىن ءۇي بەرۋ فاكتىلەرى انىقتالعان. سونداي-اق، جەتىم بالالار مەن اتا-اناسىنىڭ قامقورلىعىنسىز قالعان بالالار جانە كوپ بالالى وتباسىلار تۇرعىن ءۇي كەزەگىنەن سەبەپسىز شىعارىلعان.

ال، اۋىل شارۋاشىلىعى سالاسىنا جاسالعان تالداۋ جۇمىستارىنىڭ بارىسىندا سۋبسيديانى جىمقىرۋ ءۇشىن جىل سايىن بىردەي سحەمالار قولدانىلىپ كەلگەن. بۇل باعىتتا اۋىل شارۋاشىلىعىنا قاتىسى جوق تۇلعالارعا سۋبسيديا ءبولۋ، شىعىندى كاسىپورىنداردى ينۆەستيتسيالاۋ جانە تاعى باسقا كەمشىلىكتەر انىقتالعان.

سونداي-اق، مۇنداي كەمشىلىكتەر ءبىلىم بەرۋ، الەۋمەتتىك قولداۋ، مەديتسينا سالاسىناندا تابىلعان.

«ءبىلىم بەرۋ سالاسىندا جۇرگىزىلگەن سىرتقى تالداۋ ناتيجەسىندە جالعان ديپلومداردى پايدالانۋ، سوتتالعان پەداگوگتاردى جۇمىسقا ورنالاستىرۋ، ساپاسىز وقۋلىقتاردى ساتىپ الۋ، جۇمىسقا نەگىزسىز قابىلداۋ، باقىلاۋشى ورگانداردى ءبىرجاقتى تەكسەرۋ، بىلىكتىلىك ساناتتارىن زاڭسىز بەرۋ سەكىلدى فاكتىلەر انىقتالدى. الەۋمەتتىك قولداۋ سالاسىندا الەۋمەتتىك جۇمىس ورىندارىنا كەزەكتەن تىس جۇمىسسىزداردى جۇمىسقا ورنالاستىرۋ، جۇمىس بەرۋشى تاراپىنان اي سايىنعى مىندەتتى زەينەتاقى جارنالارىن اۋدارماۋ سەكىلدى زاڭ بۇزۋشىلىقتتار بار. مەديتسينا سالاسىندا جابدىقتاردى ساتىپ الۋعا، ولاردىڭ باعاسىن كوتەرۋگە، سونداي- اق عيماراتتاردى نەگىزسىز ەسەپتەن شىعارۋ جانە عيماراتتار مەن قۇرىلىستاردى جوندەۋ مانىنە مونيتورينگ جۇرگىزىلۋدە» - دەدى داۋلەت نارىمبەتوۆ.