قازاقستاننىڭ تۇركياداعى ەلشىسى ەركەبۇلان ساپيەۆ پەن توتەنشە جاعدايلار ءبىرىنشى ۆيتسە-ءمينيسترى يبراگيم قۇلشىمبايەۆ تۇركيانىڭ سىرتقى ىستەر ءمينيسترى ميەۆليۋت چاۆۋشوعلىنا جانە بارشا تۇرىك حالقىنا كوڭىل ايتتى.
تاراپتاردىڭ اڭگىمەلەسۋى بارىسىندا تابيعي اپات ورىن العان العاشقى كۇننەن باستاپ قازاقستاننىڭ تۇركياعا جان-جاقتى كومەك كورسەتىپ جاتقانى ايتىلدى.
قازاقستاندىق قۇتقارۋشىلار مەن ديپلوماتتار تاۋلىك بويى جۇمىس ىستەپ جاتىر.
تابيعي اپات بولعان ايماققا گۋمانيتارلىق كومەك پەن ادامدارعا قاجەتتى وزگە دە زاتتار ۋاقىتىلى جەتكىزىلۋ ۇستىندە.
ءوز كەزەگىندە تۇرىك ءمينيسترى تۇركيانىڭ بارشا تۇرعىندارى اتىنان باۋىرلاس قازاق حالقىنا قيىن-قىستاۋ ساتتە كورسەتكەن كومەگى ءۇشىن ريزاشىلىعىن ءبىلدىردى.
«ەكى ەل اراسىنداعى قارىم-قاتىناس شىنىمەن دە باۋىرلاستىققا قۇرىلعان. وعان ءدال وسى قيىن ساتتە كوزىمىز جەتىپ وتىر»، - دەدى ميەۆليۋت چاۆشوعلى.
كەزدەسۋ گازيانتەپ قالاسىنىڭ اۋەجايىندا بولدى. ءدال وسى اۋەجايعا قازاقستاننان گۋمانيتارلىق جۇك تيەلگەن ارناۋلى بورت كەلىپ قونعان ەدى.
گۋمانيتارلىق جۇك مەملەكەت باسشىسىنىڭ تاپسىرماسىمەن بۇگىن تاڭەرتەڭ تۇركياعا جونەلتىلگەن بولاتىن.
گۋمانيتارلىق كومەكتىڭ جالپى كولەمى - 55 توننا.
قازاقستاننان جەتكىزىلگەن گۋمانيتارلىق جۇك ەڭ ءبىرىنشى كەزەكتە قاجەتتى زاتتار بولعاندىقتان اۋەجايدان بىردەن كاحرامانماراشقا جىبەرىلدى.
بۇل وڭىردە ادامدار باسپاناسىز قالىپ، كومەككە مۇقتاج بولىپ وتىر.
جۇكتىڭ ىشىندە جويقىن ءزىلزالادان زارداپ شەككەندەرگە كومەك كورسەتۋگە ارنالعان شاتىرلار، جىلىتقىشتار، جىلى كيىمدەر جانە باسقا دا قاجەتتى زاتتار بار.