ەكىباستۇزدا توق سوققان ەرلى- زايىپتىلار كوز جۇمدى
13-اقپاندا «112» جەلىسىنە جىلۋ رادياتورلارىنىڭ زاقىمدانۋىنان تۇرعىن ءۇيدى سۋ باسىپ جاتقانى تۋرالى حابار ءتۇستى. وقيعا ورنىندا جەكە تۇرعىن ۇيدەن 1959 -جىلى تۋعان ەر ادام مەن 1965 -جىلى تۋعان ايەلدىڭ ءمايىتى تابىلدى. دەنەلەرىندە زورلىق- زومبىلىق بەلگىلەرى جوق، - دەپ مالىمدەدى پاۆلودار وبلىسىنىڭ پوليتسيا دەپارتامەنتىنىڭ باسپا ءسوز قىزمەتى.
تەكسەرۋ كەزىندە ماماندار ءۇيدىڭ قوناق بولمەسىندە ەدەندە جالاڭاش سىمدارى بار ەلەكتر جىلىتقىشتى بايقاعان.
- سوت- مەديتسينالىق ساراپشىلارىنىڭ الدىن الا قورىتىندىسىنا سايكەس، ولىمگە تەحنيكالىق ەلەكتر توگىنىڭ سوعۋى سەبەپ بولعان. سوت- مەديتسينالىق ساراپتاما تاعايىندالدى، ونىڭ قورىتىندىسى بويىنشا پروتسەسسۋالدىق شەشىم قابىلدانادى، - دەپ قوستى پوليتسەيلەر.
«پاۆلودارەنەرگو» ا ق مالىمەتىنشە، اپات جەكە ۇيىشىلىك جەلىلەردە بولعان.
31-قاڭتاردا «ەكىباستۇزجىلۋەنەرگو» ج ش س- نە ءۇي يەسىنەن ىلمەكتى ارماتۋرالاردى اۋىستىرۋ ءۇشىن جىلۋ جەلىسىن ءوشىرۋ تۋرالى ءوتىنىش تۇسكەن.
جىلۋ ماۋسىمى كەزىندە جەلىلەر تەك جىلۋ قىزمەتكەرلەرىنىڭ باقىلاۋىمەن جانە ءوتىنىش بەرۋشىدە قاجەتتى ماتەريالدار دايىن بولعان كەزدە عانا وشىرىلەتىندىكتەن كەلەسى كۇنى ماماندار اتالعان مەكەنجايعا كەلگەن.
- الايدا، ورناتۋعا جوسپارلانعان ارماتۋرا تالاپ ەتىلەتىن ستاندارتتارعا سايكەس كەلمەگەندىكتەن، قوڭىراۋ شالعان كۇنى جىلۋدى ءوشىرۋ جۇرگىزىلگەن جوق. ماماندار جوندەۋ جۇمىستارىنا قاجەتتى قۇرال- جابدىقتاردى دايىنداۋ بويىنشا ۇسىنىستار بەردى. ەرلى- زايىپتىلاردان قايتادان وتىنىشتەر بولعان جوق، وسىعان بايلانىستى جىلۋ جەلىلەرىنىڭ ماماندارى بۇل مەكەنجايعا قايتا بارماعان، - دەدى «پاۆلودارەنەرگو» ا ق.
ەنەرگەتيكالىق كومپانيا جەكە تۇرعىن ۇيلەردىڭ ىشكى جەلىلەرىن جوندەۋ جۇمىستارى ەكىباستۇز جىلۋ جەلىلەرى كاسىپورنىنىڭ جاۋاپكەرشىلىگىنە جاتپايتىنىن اتاپ ءوتتى.
سونداي- اق مۇندا مارقۇمدار تابىلعان كۇنى تۇرعىن ءۇي ينسپەكتسياسى مەن پوليتسەيلەردىڭ ءوتىنىشى بويىنشا وسى مەكەنجايعا ۇيدەگى سۋدى سورۋ ءۇشىن سۋ سورعىزۋ كولىگى جىبەرىلگەنى حابارلاندى.