تۇركياداعى قوناق ۇيدە ورىس جانە ۋكراين فۋتبولشىلارى توبەلەسىپ قالدى

استانا. قازاقپارات - ماۋسىم الدىنداعى وقۋ-جاتتىعۋ جيىنىن تۇركيانىڭ انتاليا قالاسىندا وتكىزىپ جاتقان رەسەيدىڭ «شيننيك» جانە ۋكراينانىڭ «ميناي» كلۋبتارىنىڭ ويىنشىلارى قوناق ۇيدە جاعا جىرتىسقان.

بۇل تۋرالى Telegram-داعى «بازا» ارناسى العاشقىلاردىڭ ءبىرى بولىپ حابارلادى.

13- اقپان كۇنى كەشكىسىن ۋكراين فۋتبولشىلارى رەسەيلىك ويىنشىلاردان ۋكراينا ءانۇرانىن ايتۋدى تالاپ ەتكەن، ال ورىستار ماسەلەنى «كوشەدە شەشۋدى» ۇسىنعان. «بازا» ارناسى كەيىننەن ۋكرايندەر ورىستارعا «رەسەي رەجيمىنە قارسى نە ءۇشىن نارازىلىققا شىقپايسىڭدار» دەپ سۇراعاننان كەيىن داۋ-جانجال تۋىندادى دەپ جازدى.

داۋ-جانجالدىڭ نەدەن تۋىنداعانىن ەكى كلۋب وكىلدەرى ەكى ءتۇرلى تۇسىندىرەدى. اقپاراتتارعا سەنسەك، العاشقى كيكىلجىڭنەن كەيىن رەسەيلىك كلۋبتىڭ ءبىر ويىنشىسى ليفتىگە ۋكراينالىق كوماندا فۋتبولشىلارىمەن بىرگە كىرگەننەن ۇرىس باستالعان. ليفت اشىلعان كەزدە توبەلەسكە «شيننيك» كومانداسىنداعىلار قوسىلعان. ناتيجەسىندە ەكى كوماندانى پوليتسيا قىزمەتكەرلەرى مەن قوناق ءۇي ماماندارى اجىراتقان.

ۋكراينالىق كەي باسىلىمداردىڭ جازۋىنشا، كيكىلجىڭ قوناق ءۇي قىزمەتكەرىنە دورەكىلىك كورسەتكەن رەسەيلىك فۋتبولشىعا ۋكراين سپورتشىلارى ەسكەرتۋ جاساعاننان كەيىن تۋىنداعان. «ميناي» كلۋبى دا وسى نۇسقانى ۇسىنىپ، رەسمي مالىمدەمە جاسادى.

قازىرگى تاڭدا ەكى كوماندا دا وزگە قوناق ۇيگە الماسقان.