ءزىلزالادان زارداپ شەككەن تۇركيا تۇرعىندارىنا قانداي ەم شارالارى كورسەتىلىپ جاتىر - قازاقستاندىق دارىگەرمەن سۇحبات
الەمنىڭ تۇپكىر-تۇپكىرىنەن كومەككە اعىلعان قۇتقارۋشىلار مەن دارىگەرلەر اراسىنا وتانداستارىمىز دا بار. ولار تاۋلىك بويى ىزدەستىرۋ جۇمىستارىن جۇرگىزىپ، زارداپ شەككەندەرگە مەديتسينالىق كومەك كورسەتۋدە. قازاقپارات اگەنتتىگى تۇركياعا العاشقىلاردىڭ ءبىرى بوپ اتتانعان اپاتتار مەديتسيناسى ورتالىعىنىڭ ەلوردالىق فيليالىنىڭ فەلدشەرى سەرىكباي احمەتجانوۆپەن سۇحباتتى ۇسىنادى.
سەرىكباي احمەتجانوۆ اپاتتار مەديتسيناسى ورتالىعىندا 2013-جىلدان بەرى جۇمىس ىستەيدى. قىزمەتى بارىسىندا استانا اۋماعى مەن ونىڭ سىرتىندا ورىن العان توتەنشە جاعدايلاردى جويۋ جۇمىستارىنا قاتىسقان. اتاپ ايتقاندا، ءورت، جول-كولىك وقيعاسى، سۋ تاسقىنى جانە باسقا ت ج ورنىنا بىرنەشە مارتە شىعىپ، حالىققا قاجەتتى مەديتسينالىق كومەك كورسەتكەن.
بۇعان دەيىن سەرىكباي احمەتجانوۆ دەنساۋلىق ساقتاۋ مينيسترلىگىنە قاراستى جەدەل-جاردەم بريگاداسى قۇرامىندا قىزمەت اتقارعان.
«جەدەل جاردەمدە كۇردەلى شاقىرۋلار كوپ بولدى، سونىڭ ءبىرىن ايتىپ بەرەيىن. ءبىر شاقىرتۋدا انافيلاكتيكالىق شوك العان ايەلدى قۇتقارۋعا باردىق. سول كىسىگە دەر كەزىندە كومەك كورسەتىپ 11-قاباتتان زەمبىل ءتۇسىرىپ، تەمىر جول اۋرۋحاناسىنا امان-ەسەن جەتكىزگەنىم ەستە قالىپتى»، - دەپ ەسكە الدى دارىگەر.
تاعى ءبىر قايعىلى وقيعا استانادان 70 شاقىرىم جەردە بولعان. وندا جۇرگىزۋشىلەردىڭ ءبىرى كوماعا ءتۇسىپ، باس سۇيەگى سىنعان. تەز ارادا وعان العاشقى مەديتسينالىق كومەك كورسەتىپ، اۋرۋحاناعا امان جەتكىزگەن. الايدا جاراقات سالدارىنان ول 4 كۇننەن كەيىن اۋرۋحانادا قايتىس بولعان.
ودان بولەك، اۋا-رايىنىڭ كۇرت ناشارلاۋىنان اقمولا وبلىسىنىڭ تۇرعىندارى بوران مەن قار قۇرساۋىندا قالىپ، اۋرۋحانا مەن پەرزەنتحاناعا جەتە الماي، كومەككە جۇگىنگەن. س. احمەتجانوۆ مەديتسينالىق بريگادا قۇرامىندا مۇقتاج جاندارعا كومەك كورسەتىپ، سول اۋىلدان 117 ناۋقاستى، ءۇش جۇكتى ايەلدى ەۆاكۋاتسيالاعان.
بۇگىندە سەرىكباي احمەتجانوۆ تۇركيا رەسپۋبليكاسىنىڭ گازيانتەپ قالاسىندا ءزىلزالادان زارداپ شەككەن حالىققا دارىگەرلىك كومەك كورسەتۋدە. ونىڭ اتا-اناسى، جۇبايى، بالالارى مەن تۋىستارى ونىڭ امان كەلۋىن تىلەپ، كۇتىپ وتىر.
«2023-جىلعى 8- اقپاندا انكارا ۋاقىتىمەن ساعات 17:08 دە گازيانتەپ قالاسىنا كەلىپ قوندىق. ءبىزدى قارسى العان تۇركياداعى قازاكستان ەلشىلىگى جاتىن ورىنعا ورنالاستىرىپ، ەرتەڭىنە وقيعا ورنىنا اپاردى. مۇنداعى باستى جۇمىسىمىز - قۇتقارۋشىلاردىڭ دەنساۋلىعىن قاداعالاپ، كەرەك جاعدايدا شۇعىل مەديتسينالىق كومەك كورسەتۋ، جەرگىلىكتى حالىققا دا ەم-دوم جاساۋ، ولاردى جىلىنۋ ورىندارىنا ورنالاستىرۋ. تۇرعىندار كوبىنەسە قان قىسىمى كوتەرىلۋ، سترەسس، كۇيىك الۋ، سالقىن تيۋ، رەسپيراتورلى اۋرۋلارمەن جۇگىنىپ جاتىر»، - دەيدى ق ر ت ج م اپاتتار مەديتسيناسى ورتالىعىنىڭ فەلدشەرى.
ايتا كەتەيىك، سوڭعى مالىمەت بويىنشا، قازاقستاندىق قۇتقارۋشىلار ءۇيىندى استىنان 7 ادامدى قۇتقارىپ، 88 ادامنىڭ دەنەسىن شىعارعان.
ق ر ت ج م اپاتتار مەديتسيناسى ورتالىعىنىڭ دارىگەرلەرى زارداپ شەككەندەرگە تاۋلىك بويى مەديتسينالىق كومەك كورسەتۋدە. وسىعان دەيىن 140 تان استام جەرگىلىكتى تۇرعىنعا، سونىڭ ىشىندە 17 بالاعا مەديتسينالىق كومەك كورسەتىلدى. ولاردىڭ ىشىندە سترەستىڭ جەدەل رەاكسياسىمەن، سالقىن تيۋ، تىنىس الۋ جولدارىنىڭ اۋرۋلارىمەن، سونداي-اق ءارتۇرلى جاراقاتتارمەن بايلانىستى اۋرۋلار باسىم.