اۆتوجول سالۋدا مەردىگەرلەردىڭ بيۋدجەت قاراجاتىن زاڭسىز جىمقىرۋى انىقتالدى - باس پروكۋراتۋرا

استانا. قازاقپارات - مەملەكەت باسشىسىنىڭ تاپسىرماسى بويىنشا پروكۋراتۋرا ورگاندارى كولىك جولدارى سالاسىنىڭ جاي-كۇيىن تەكسەرۋدىڭ قورىتىندىسىن شىعاردى، دەپ حابارلايدى قازاقپارات باس پروكۋراتۋرانىڭ باسپا ءسوز قىزمەتىنە سىلتەمە جاساپ.

كولىك جولدارىن سالۋ جانە جوندەۋ كەزىندە بيۋدجەت قاراجاتىن جىمقىرۋ جانە سىبايلاس جەمقورلىق فاكتىلەرى انىقتالعان. بيۋدجەت قاراجاتىن زاڭسىز شىعارۋ سحەمالارىندا كوبىنە بەلگىلى ءبىر مەردىگەر ۇيىمدارى بولعان.

اتاپ ايتقاندا، وسىنداي فيرمالاردىڭ ءبىرىنىڭ وكىلدەرى اقمولا ءوڭىرىنىڭ قوياندى كەنتىندە 907 ميلليون تەڭگەگە كۇردەلى جوندەۋ جانە جەرگىلىكتى جول قۇرىلىسىن جاساماعاندىعى بەلگىلى بولدى. كەلىسىمشارت بۇزىلدى، وڭىردەگى پروكۋرورلار سوتقا دەيىنگى تەرگەپ-تەكسەرۋگە باستاماشىلىق جاساپ، ونىڭ شەڭبەرىندە قىلمىستىق قۇقىق بۇزۋشىلىق جاساۋدىڭ ءمان-جايلارى انىقتالىپ جاتىر.

سولتۇستىك قازاقستان وبلىسىندا جول جوندەۋگە بولىنگەن 423 ميلليون تەڭگەنى جىمقىردى دەگەن ايىپپەن ع. مۇسىرەپوۆ اتىنداعى اۋدان اكىمدىگىنىڭ جانە جەرگىلىكتى مەردىگەر مەكەمەنىڭ باسشىلارى قاماۋعا الىنىپ، جاۋاپقا تارتىلدى. جۇمىستاردى قابىلداۋ تۋرالى جالعان اكتىلەر بويىنشا جولدىڭ جوقتىعىنا قاراماستان، ميلليونداعان مەملەكەتتىك قارجىنى اۋدارعان.

مەملەكەتتىك ساتىپ الۋ كەزىندە ورىنداۋشىلاردى تاڭداۋ كەزەڭىندە جەمقورلىققا ءجيى جول بەرىلەدى. ماسەلەن، اۋدان پروكۋرورلارىنىڭ ارالاسۋىنان كەيىن اقمولا وبلىسى ارشالى اۋدانى اكىمدىگىنىڭ ءبولىم باسشىسى ەكاتەرينبۋرگ- الماتى اۆتوبانىنان بەرسۋات اۋىلىنا دەيىنگى ۋچاسكەنى كۇردەلى جوندەۋ بويىنشا 1,1 ميلليارد تەڭگەگە زاڭسىز شارت جاساسقانى ءۇشىن تەرىس سەبەپتەرمەن جۇمىستان بوساتىلعان بولاتىن.

پروكۋرورلار بيۋدجەتتىڭ نەگىزسىز شىعىندارىنىڭ جولىن كەسۋگە ەرەكشە نازار اۋدارادى. شىعىس قازاقستان وبلىسىنىڭ التاي اۋدانىندا جوندەلگەن ۋچاسكەگە 148 ميلليون استام بيۋدجەت قاراجاتىن ارتىق جۇمساۋعا جول بەرىلمەدى جانە باسشىلىق بۋىنداعى كىنالى لاۋازىمدى تۇلعا ءتيىستى تارتىپتىك جازاعا تارتىلدى.

تەكسەرۋ قورىتىندىسى بويىنشا بارلىعى 300 دەن استام زاڭ بۇزۋشىلىق انىقتالدى، 30 ميلليارد تەڭگە سوماسىنا بيۋدجەت شىعىندارىنىڭ الدى الىندى، مەملەكەت كىرىسىنە 2,5 ميلليارد تەڭگە وتەلدى، 29 قىلمىستىق ءىس قوزعالدى، 305 ادام تارتىپتىك جانە اكىمشىلىك جاۋاپكەرشىلىككە تارتىلدى.

جولداردىڭ قاناعاتتانارلىقسىز جاعدايىنا ورىنسىز جوسپارلاۋ، يننوۆاتسيالاردى ەنجار ەنگىزۋ، بەرىكتىگى جوعارى ماتەريالدارعا ۇنەمدەۋ جانە باسقا دا جايتتار ىقپال ەتىپ وتىر.

وسىعان بايلانىستى، باس پروكۋراتۋرا ۇكىمەتكە قارالىپ جاتقان شەتەلدىك وزىق تاجىريبەگە نەگىزدەلگەن كولىك جولدارى سالاسىن تۇبەگەيلى وزگەرتۋ بويىنشا ۇسىنىستارمەن قاداعالاۋ اكتىسىن ەنگىزدى.