تۇركيادا قۇتقارۋشى يتتەر جاراقاتتانعانىنا قاراماستان، ادامداردى ىزدەستىرۋىن توقتاتقان جوق

استانا. قازاقپارات – ولاردىڭ اراسىندا ءۇيىندى استىندا تىرشىلىك بەلگىسى بار-جوعىن انىقتاۋ بارىسىندا جارالانىپ، ءولىپ جاتقاندارى دا بار.

تۇركيادا قۇتقارۋشى يتتەر جاراقاتتانعانىنا قاراماستان، ادامداردى ىزدەستىرۋىن توقتاتقان جوق، دەپ حابارلايدى Qaz365.kz ءتىلشىسى Haber Global-عا سىلتەمە جاساپ.

قۇتقارۋ توپتارىنىڭ ەڭ ۇلكەن كومەكشىسى - جول كورسەتۋشى ءيىسشىل يتتەر. ساراپشىلاردىڭ ايتۋىنشا، ىزدەۋ-قۇتقارۋ قىزمەتىندەگى ءبىر ءيت جيىرما، ءتىپتى وتىز كاسىبي ءىز كەسۋشىنىڭ جۇمىسىن اتقارا الادى.

قازىر الەمنىڭ تۇكپىر-تۇكپىرىنەن كەلگەن ىزدەستىرۋ-قۇتقارۋ توبىنىڭ يتتەرى ۇيىندىلەردى ءتىنتىپ، ادامداردى ىزدەۋ جۇمىستارىن اتقارىپ جاتىر.

حاتايدىڭ سامانداگى اۋدانىندا قۇتقارۋ جۇمىستارىنا قاتىسقان تەتيك ەسىمدى ءيت 80 ءۇيىندىنى قاراپ، 15 ادامنىڭ جانىن ساقتاپ قالۋىنا اتسالىستى.

سىلا اتتى ءيت تۇرىك قارۋلى كۇشتەرىنىڭ گۋمانيتارلىق كومەك بريگاداسىنىڭ قۇرامىندا جۇمىس اتقارىپ جاتىر. مالاتياداعى 12 ادام ونىڭ ارقاسىندا انىقتالدى.

مۇنداي جەتىستىككە جەتۋ جولىندا ول ۇيىندىدەگى شىنىلاردىڭ كەسىرىنەن جاراقاتتانىپ تا قالدى. ول اياعىن تاڭىپ بەرگەن سوڭ، جۇمىسىن قايتا جالعاستىردى.

شۆەتسيانىڭ قۇتقارۋشى ءيتى تيمي رەدوكتىڭ اپات الاڭىندا جۇرگەنىنە بىرنەشە كۇن بولدى. ونىڭ كومەگىمەن 9 ادام تابىلدى.

پولشا قۇتقارۋ توبىنىڭ يتتەرى جۇمىس بارىسىندا جەڭىل جاراقاتتاندى. ولارعا بىردەن مەديتسينالىق كومەك كورسەتىلدى. ولار جاعدايى جاقسارعان سوڭ، ۋاقىت جوعالتپاستان جۇمىسىن قايتا جالعاستىردى.

گازيانتەپتە كيلليان ەسىمدى ءيت ەكى كىسىنى تىرىدەي تاپتى.

مەكسيكا توبىنىڭ 16 ءيتىنىڭ ءبىرى پروتەو ءۇيىندى استىنداعى ەكى ادامدى تاۋىپ، مىندەتىن اتقارۋ كەزىندە ءومىرىن جوعالتتى.

سونداي-اق تۇركيادا قازاقستاننىڭ جەدەل-قۇتقارۋ جاساعىنىڭ كينولوگيالىق ەسەپتوبىنىڭ دجەيكوب ەسىمدى ءيتى دە ىزدەستىرۋشىلەر قاتارىندا ءجۇر. 6 جىل بويى قۇتقارۋشى بولىپ جۇمىس ىستەيدى. ول توتەنشە جاعدايعا تاپ بولعان ادامدارعا قانشاما رەت كومەكتەسكەن.

جالپى ءيىسشىل يتتەر ۇزاق ۋاقىت بويى ءتىرى ادامداردى تابا الماسا، كۇيزەلىسكە ءتۇسىپ، كەيبىرەۋى ادام ىزدەۋگە شىعۋدان ءۇزىلدى-كەسىلدى باس تارتقان وقيعالار كەزدەسكەن ەكەن.