اسكەري مىندەتىن وتكەرگەندەر قورعانىس مينيسترلىگىنىڭ وقۋ ورىندارىنا ەمتيحانسىز قابىلدانادى

استانا. قازاقپارات - بيىلدان باستاپ مەرزىمدى اسكەري مىندەتىن اتقارعان جاستار قورعانىس مينيسترلىگىنىڭ وقۋ ورىندارىنا ەمتيحانسىز قابىلدانادى.

بۇل تۋرالى ورتالىق كوممۋنيكاتسيالار قىزمەتىندە وتكەن بريفنگىدە قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باستىعى جۇمابەك احمەتوۆ ايتتى، دەپ حابارلايدى قازاقپارات ءتىلشىسى.

«بيىلدان باستاپ مەرزىمدى اسكەري مىندەتىن وتكەرگەن ازاماتتار قورعانىس مينيسترلىگىنىڭ اسكەري وقۋ ورىندارىنا ءتۇسۋ ەمتيحانىن تاپسىرماي قابىلدانادى. بۇل رەتتە، بۇل ازاماتتاردى قابىلداۋ قارۋلى كۇشتەردىڭ بولىمدەرىندە بۇرىن جۇرگىزىلگەن ىرىكتەۋ ناتيجەلەرى بويىنشا جۇزەگە اسىرىلادى»، - دەپ ءمالىم ەتتى دەپارتامەنت باسىشى.

جۇمابەك احمەتوۆتىڭ ايتۋىنشا، قازىر مينيسترلىكتىڭ اسكەري بولىمدەرىندە ىرىكتەۋ جۇرگىزىلۋدە. مەرزىمدى اسكەري قىزمەتتى وتكەرگەندەر ءۇشىن تالاپكەرلەردىڭ جالپى سانىنان 25 پايىزدىق كۆوتا بولىنەدى.