ىشكى ىستەر ۆيتسە- ءمينيسترى پەتروپاۆلداعى وقيعانىڭ قالاي بولعانىن ايتتى

استانا. قازاقپارات - ىشكى ىستەر ۆيتسە- ءمينيسترى مارات قوجايەۆ ۇكىمەت وتىرىسىندا پەتروپاۆل مەكتەبىندەگى وقيعانىڭ قالاي بولعانىن ايتتى، دەپ حابارلايدى قازاقپارات.

«13- اقپاندا ساعات 07.52-دە پەتروپاۆل قالاسىنىڭ پوليتسيا باسقارماسىنا №4 ورتا مەكتەپتىڭ وقۋشىلارىنا دەنە جاراقاتىن كەلتىرۋ تۋرالى حابارلاما ءتۇستى.

وقيعا بولعان ورىنعا جىلدام جەدەل- تەرگەۋ توبى شىعىپ، تەكسەرۋ بارىسىندا ساعات 07:40-تا ريۋكزاگىندا بالتا، پىشاق جانە قولدان جاسالعان ماسكا سالىنعان 9 -سىنىپ وقۋشىسى انىقتالدى.

ول ساعات 07:50-دە 2- قاباتتا ورنالاسقان اجەتحانادا ماسكاسىن كيىپ، بالتامەن دالىزگە جۇگىرىپ شىعىپ، 10- سىنىپ وقۋشىسىنىڭ باسىنان ەكى رەت ۇرىپ، ودان كەيىن 10- سىنىپتا وقيتىن قىزدىڭ يىعىنان 1 رەت جانە باسىنان ەكى رەت ۇرعان، سونداي- اق 9- سىنىپ وقۋشىسىنىڭ باسىنان ءبىر رەت ۇرعان. شابۋىل جاساعان بالانى جوعارى سىنىپ وقۋشىلارى مەن مۇعالىمدەر ۇستاعان.

ەكى جابىرلەنۋشى قالالىق ەمحانانىڭ ستاتسيونارىندا جاتىر، جاعدايلارى ءبىرقالىپتى، ءبىر وقۋشى مەديتسينالىق كومەك كورسەتىلگەننەن كەيىن ۇيىنە قايتارىلدى»، - دەدى ۆيتسە- مينيستر.

«№4 ورتا مەكتەپتە 2 اۋىسىممەن ساباق وقيدى، 39 سىنىپ، 984 وقۋشى، مۇعالىمدەر شتاتى – 70، ونىڭ ىشىندە بىرەۋى پسيحولوگ. مەكتەپتە جانە ونىڭ اۋماعىندا 42 بەينەباقىلاۋ كامەراسى جانە «СА BARS NEXT» جاۋاپكەرشىلىگى شەكتەۋلى سەرىكتەستىگىنە قوسىلعان (شاقىرۋ تۇسكەن ۋاقىتتا جىلدام قيمىلداۋدى قامتاماسىز ەتەدى) 5 دابىل بەلگىسى بار»، - دەدى ول.

ۆيتسە- ءمينيستردىڭ سوزىنە قاراعاندا، وقيعا بولعان كۇنى مەكتەپتىڭ 1- قاباتىندا كۇزەتشى- ۆاحتەر بولعان.

«تەرگەۋ بارىسى باقىلاۋعا الىندى، ونىڭ ناتيجەلەرى بويىنشا قىلمىس پەن زاڭدى بۇزۋدىڭ سەبەپتەرى مەن جاعدايلارىنىڭ الدىن الۋ تۋرالى ۇسىنىم ەنگىزىلەدى»، - دەدى مارات قوجايەۆ.

ەسكە سالساق، پەتروپاۆلدا 9-سىنىپ وقۋشىسى مەكتەپكە قارۋلانىپ كەلىپ، بىرنەشە بالانى جاراقاتتاعان بولاتىن.

كەشە ءتۇس كەزىندە وقيعا كەزىندە زارداپ شەككەن وقۋشىلار جانساقتاۋ بولىمىندە جاتقانى بەلگىلى بولدى.

اشىق كوزدەردەن الىنعان فوتو

اۆتور

ەسىمجان ناقتىباي