قازاقستان مەن قىتاي ءوزارا ۆيزاسىز رەجيم ەنگىزۋدى پىسىقتاۋدا
كەزدەسۋ بارىسىندا كونسۋلدىق سالاداعى ەكىجاقتى ىنتىماقتاستىقتىڭ اۋقىمدى ماسەلەلەرى تالقىلاندى. اتاپ ايتقاندا، سۇحباتتاسۋشىلار وسى سالادا تاراپتار اراسىنداعى ءوزارا ءىس-قيمىلدىڭ جاڭا تاسىلدەرىن قالىپتاستىرۋدىڭ ماڭىزدىلىعىن اتاپ ءوتتى.
كەلىسسوزدەر بارىسىندا ازاماتتاردىڭ ءوزارا ساپارلارى ءۇشىن قولايلى جاعدايلار جاساۋ جانە جالپى ەكىجاقتى ىنتىماقتاستىققا قوسىمشا «سەرپىن» بەرۋ ماقساتىندا شارتتىق- قۇقىقتىق بازانى جەتىلدىرۋ تاقىرىبىنا ەرەكشە نازار اۋدارىلدى.
وسى تۇرعىدا ش. نۇرىشيەۆ قىتاي تاراپىنا ەكى ەلدىڭ ازاماتتارىن ۆيزالىق تالاپتاردان ءوزارا بوساتۋ تۋرالى ۇكىمەتارالىق كەلىسىمنىڭ جوباسىن كەلىسۋ ءۇردىسىن جەدەلدەتۋدى ۇسىندى. سونىمەن بىرگە، ەكى ەل اراسىنداعى كوشى- قون ۇردىستەرىن رەتتەۋدىڭ ءتيىمدى تەتىگىن قۇرۋ ماقساتىندا قازاقستان ەلشىسى كوشى- قون سالاسىنداعى ىنتىماقتاستىق تۋرالى كەلىسىمگە قول قويۋ بويىنشا ءتيىستى جۇمىس جۇرگىزۋدى ۇسىندى.
سونىمەن قاتار، قازاقستاندىق ديپلومات ق ح ر ازاماتتارى- قانداستاردىڭ ماسەلەسىنە نازار اۋداردى. ش. نۇرىشيەۆ قىتاي تاراپىنا پاندەميا كەزىندە شەكارانىڭ ەكى جاعىندا قالعان وتباسىلاردى بىرىكتىرۋ ماسەلەسى بويىنشا ءوزارا ءىس-قيمىلدى جانداندىرۋدى ۇسىندى. بۇل تۇستا ەلشى قازاقستاندىق تاراپتىڭ ىشكى ىستەرگە ارالاسپاۋ، ەگەمەندىك پەن اۋماقتىق تۇتاستىقتى ءوزارا قۇرمەتتەۋ قاعيداتتارىن ۇستاناتىنىن اتاپ ءوتتى.
ءوز تاراپىنان ۋ سي قازاقستاندىق ديپلومات كوتەرگەن ماسەلەلەردىڭ ماڭىزدىلىعىن جانە ق ح ر س ءى م كونسۋلدىق دەپارتامەنتى ءوز قۇزىرەتى شەڭبەرىندە اتالعان ماسەلەلەردى ودان ءارى پىسىقتاۋعا دايىن ەكەنىن ءبىلدىردى. قىتاي ديپلوماتى قازاقستان ۇكىمەتىنىڭ ەكى ەل اراسىنداعى ادام الماسۋدى جانداندىرۋ جولىندا قابىلداپ جاتقان شارالارىن جوعارى باعالادى جانە قىتاي تاراپىنىڭ ەكى ەلدىڭ ازاماتتارىن ۆيزالىق تالاپتاردان ءوزارا بوساتۋ تۋرالى كەلىسىمگە قول قويۋعا مۇددەلىلىگىن ءبىلدىردى.
اڭگىمەلەسۋ قورىتىندىسى بويىنشا تاراپتار كەزدەسۋ بارىسىندا كوتەرىلگەن ماسەلەلەردى ودان ءارى پىسىقتاۋ ماقساتىندا قازاقستان ەلشىلىگى مەن ق ح ر س ءى م كونسۋلدىق دەپارتامەنتى اراسىندا تۇراقتى بايلانىستاردى ساقتاۋعا كەلىستى.
اۆتورى: باقىتجول كاكەش