سپورت مەملەكەتتەر مەن حالىقتاردىڭ دوستىعىن نىعايتىپ، جاقىنداستىرا تۇسەدى - توقايەۆ
كەشە استانادا اشىلعان جابىق الاڭداعى جەڭىل اتلەتيكادان ح ازيا چەمپيوناتىنىڭ قاتىسۋشىلارىنا جولداعان حاتىندا پرەزيدەنت قاسىم- جومارت توقايەۆ وسىلاي دەدى، دەپ حابارلايدى قازاقپارات.
مەملەكەت باسشىسىنىڭ قۇتتىقتاۋ حاتىن پرەمەر- مينيستر ءاليحان سمايىلوۆ وقىپ بەردى.
«سپورت شەكارا تالعامايدى، مەملەكەتتەر مەن حالىقتاردىڭ دوستىعىن نىعايتىپ، جاقىنداستىرا تۇسەدى. قازاقستان سپورت سالاسىنا ايرىقشا ءمان بەرەدى. ەلىمىزدە ازاماتتاردىڭ كاسىبي جانە بۇقارالىق سپورتپەن اينالىسۋى ءۇشىن بارلىق جاعداي جاسالعان. بۇل سالانىڭ ينفراقۇرىلىمىن دامىتۋعا كوپ كوڭىل بولىنەدى. 6 مىڭنان استام ادام سياتىن جەڭىل اتلەتيكا كەشەنى - وسىنىڭ ايقىن دالەلى.
قازاقستان سپورتشىلارى كوپتەگەن ءدۇبىرلى دودادا توپ جارىپ، ەل ابىرويىن اسقاقتاتىپ ءجۇر. ولار وسكەلەڭ ۇرپاققا ۇلگى- ونەگە بولىپ، جاستاردى جارقىن جەڭىستەرگە باستايدى. ازيا بىرىنشىلىگىنىڭ استانا تورىندە ءوتۋى ەلىمىزدە جەڭىل اتلەتيكانى دامىتۋعا تىڭ سەرپىن بەرەدى دەپ سەنەمىن. ءبىز وسى سالاداعى حالىقارالىق ۇيىمدارمەن ىنتىماقتاستىقتى نىعايتا تۇسەمىز. بارشاڭىزعا زور دەنساۋلىق، تولاعاي تابىس تىلەيمىن!»، — دەلىنگەن مەملەكەت باسشىسىنىڭ قۇتتىقتاۋ سوزىندە.
ءوز كەزەگىندە ءاليحان سمايىلوۆ بارلىق سپورتشىعا ءساتتى ونەر كورسەتۋدى، ال قازاقستان ۇلتتىق قۇراماسىنا جەڭىس تۇعىرىنا كوتەرىلۋدى تىلەدى.
پرەمەر- مينيستر ازيا جەڭىل اتلەتيكا قاۋىمداستىعىنىڭ پرەزيدەنتى داحلان ءال- حامادقا جارىستى ۇيىمداستىرۋعا جانە وتكىزۋگە قولداۋ كورسەتكەنى ءۇشىن ەرەكشە العىسىن ءبىلدىردى.
ايتا كەتەيىك، جابىق الاڭداعى جەڭىل اتلەتيكادان ازيا چەمپيوناتى ت م د ەلدەرىنىڭ اۋماعىندا العاش رەت وتكىزىلىپ وتىر.
«Qazaqstan» سپورت كەشەنىندە باستالعان تۋرنيرگە 31 ەلدەن 500 دەن استام سپورتشى قاتىسۋدا. ولار جۇگىرۋ، ەستافەتالىق جۇگىرۋ، ۇزىندىققا سەكىرۋ، بيىككە سەكىرۋ، ءۇش رەت سەكىرۋ، سىرىقپەن سەكىرۋ، يادرو لاقتىرۋ جانە كوپسايىس سياقتى جارىس تۇرلەرى بويىنشا 26 مەدال جيىنتىعى ساراپقا سالىنادى.
قازاقستان ۇلتتىق قۇراماسى ساپىندا 69 سپورتشى بار.
حالىقارالىق جارىس 10-12-اقپان ارالىعىندا وتەدى.
ايتا كەتەيىك، اتالعان ءتۋرنيردىڭ العاشقى ديستسيپلينالارىندا قازاقستان قۇراماسىنا ەكى مەدال بۇيىردى.