ماجارستان تۋرنيرىندە قازاقستاندىق بوكسشى قىزدارعا ەكى «التىن» بۇيىردى
09:14, 11 - اقپان 2023
استانا. قازاقپارات - قازاقستاننىڭ بوكستان ايەلدەر قۇراماسى ماجارستاننىڭ دەبرەتسەن قالاسىندا ءوتىپ جاتقان يشتۆان بوچكايدى ەسكە الۋعا ارنالعان تۋرنيردە ونەرىن اياقتادى، دەپ حابارلايدى قازاقپارات Sports.kz كە سىلتەمە جاساپ.
فينالدا ءۇش قازاقستاندىق سپورتشى جەكپە- جەك وتكىزدى: ريمما ۆولوسەنكو (60 ك گ)، لاۋرا ەسەنكەلدى (63 ك گ) جانە ۆالەريا اكسەنوۆا (+81 ك گ).
ريمما ۆولوسەنكو سلوۆاكيا وكىلى ميروسلاۆا ەديناكوۆامەن كەزدەسۋى كەرەك ەدى. الايدا قازاقستان بوكسشىسىنىڭ قارسىلاسى رينگكە شىقپادى.
لاۋرا ەسەنكەلدى اعىلشىن سپورتشىسى حاننا روبينسونمەن جۇدىرىقتاسىپ، تورەشىلەردىڭ ءارتۇرلى داۋىسىمەن جەڭىسكە جەتتى.
اقتىق سىننىڭ سوڭعى جۇبى بولىپ رينگكە ۆالەريا اكسەنوۆا مەن پولشالىق اگاتا كاچمارسكايا شىقتى. تورەشىلەردىڭ ءبىراۋىزدى شەشىمىمەن ۆ. اكسەنوۆا كۇمىس مەدالعا لايىق دەپ تانىلدى.