قاسىم- جومارت توقايەۆ: پارلامەنتارالىق فورۋم حالىقتارىمىزدىڭ مۇددەسىنە ساي كەلەتىن ۋاقىتىلى باستاما
بۇگىن تۇركىستاندا ءوتىپ جاتقان فورۋمدا مەملەكەت باسشىسىنىڭ قۇتتىقتاۋ حاتىن ق ر پارلامەنتى سەناتىنىڭ ءتوراعاسى ماۋلەن اشىمبايەۆ وقىپ بەردى، دەپ حابارلايدى قازاقپارات.
«قۇرمەتتى فورۋمعا قاتىسۋشىلار! قوناقجاي قازاق جەرىنە باسقان قادامدارىڭىزعا شىن جۇرەكتەن قۇتتى بولسىن ايتامىن. ورتالىق ازيا مەملەكەتتەرىنىڭ تۇڭعىش پارلامەنتارالىق فورۋمىنىڭ ءبىزدىڭ حالىقتارىمىز ءۇشىن ەرەكشە قاسيەتتى سانالاتىن تۇركىستان قالاسىندا وتۋىندە تەرەڭ سيمۆولدىق ءمان جاتىر. ءبىزدى تاعدىردىڭ ءوزى تىعىز بايلانىستىرادى. ءتۇبى ءبىر تاريحىمىز، رۋحاني تۋىستىعىمىز بەن عاسىرلار بويعى مادەني- گۋمانيتارلىق بايلانىستارىمىز دا ءبىزدى بىرىكتىرەدى. ەلدەرىمىزدىڭ اراسىنداعى ۇزاقمەرزىمدى ءوزارا قارىم- قاتىناستاردىڭ قازىرگى كۇنى تابىستى جالعاسىن تابۋى دا وسىناۋ مىزعىماس ىرگەتاسىمىزدىڭ ارقاسى»، - دەلىنگەن مەملەكەت باسشىسىنىڭ حاتىندا.
«سوڭعى جىلدارى ءبىزدىڭ وڭىرىمىزدە جان- جاقتى ىنتاماقتاستىق ەرەكشە قارقىنمەن دامىپ جاتقانىن ايرىقشا اتاپ وتكىم كەلەدى. ساياسي ديالوگتىڭ جوعارى دەڭگەيى، ءوزارا ساۋدانىڭ ايتارلىقتاي ءوسۋى، ەكونوميكانىڭ باسىم سالالارىنداعى كووپەراتسيانىڭ قارقىن الا ءتۇسۋى جانە تاعى باسقالارى وسىنىڭ ايعاعى. بۇل ۇدەرىستە وڭىرلىك ءوزارا ارەكەتتەستىكتىڭ نەگىزگى باعىتتارىن ايقىندايتىن ورتالىق ازيا كوشباسشىلارىنىڭ جۇيەلى تۇردەگى كونسۋلتاتيۆتىك كەزدەسۋلەرى ەرەكشە ورىنعا يە»، - دەيدى پرەزيدەنت.
سونداي- اق قاسىم- جومارت توقايەۆ پارلامەنتارالىق فورۋمدى وتكىزۋ باستاماسى ۋاقىتىلى ەكەنىن ءارى حالىقتاردىڭ تۇپكىلىكتى مۇددەسىنە جاۋاپ بەرەتىنىن اتاپ وتەدى.
«كۇردەلى گەوساياسي احۋال مەن الەمدىك ەكونوميكانىڭ تۋربۋلەنتتىلىگى جاعدايىندا پارلامەنتتىك ديپلوماتيانىڭ ماڭىزى ارتىپ وتىر. پارلامەنتشىلەر قىزمەتى ەكىجاقتى كەلىسىمدەردى زاڭنامالىق قامتاماسىز ەتۋدە، دوستىق پەن تاتۋ كورشىلىك احۋالىنىڭ ساقتالۋىنا، وڭىردەگى ءوزارا ءتيىمدى ىنتىماقتاستىقتى نىعايتۋدا ۇلكەن ءرول اتقارادى»، - دەلىنگەن پرەزيدەنت حاتىندا.
بۇدان بولەك، مەملەكەت باسشىسى بۇگىنگى كۇنى ءوڭىر مەملەكەتتەرى ءۇشىن ەكونوميكالىق كووپەراتسيانى كەزەڭىمەن تەرەڭدەتۋدىڭ ماڭىزىنا توقتالىپ وتەدى. بۇل رەتتە پرەزيدەنت وڭىرلىك جانە شەكاراماڭى ساۋدا- ساتتىعىن نىعايتۋ، كولىك- ترانزيتتىك سالاداعى ارىپتەستىكتى دامىتۋ، جاڭا زاماناۋي جوبالاردى جۇزەگە اسىرۋ ماسەلەسىنە توقتالادى.
«پارلامەنتارالىق فورۋمدى وتكىزۋ حالىقتارىمىزدىڭ مۇددەسىنە ساي كەلەتىن ۋاقتىلى باستاما. بۇگىنگى شيەلەنىسكەن گەوساياسي احۋال جانە قۇبىلمالى الەمدىك ەكونوميكا جاعدايىندا پارلامەنتتىك ديپلوماتيانىڭ ماڭىزى ايتارلىقتاي ارتىپ وتىر. ەكىجاقتى كەلىسىمدەردى قامتاماسىز ەتۋدە، دوستىق جانە تاتۋ كورشىلىك قاتىناستى ساقتاۋدا، وڭىردەگى ءوزارا ءتيىمدى ىنتىماقتاستىقتى نىعايتۋدا پارلامەنتشىلەردىڭ قىزمەتى ايرىقشا ءرول اتقارادى. قازىرگى تاڭدا ءبىزدىڭ ەلدەرىمىز ءۇشىن ەكونوميكالىق كووپەراتسيانى دايەكتى تۇردە دامىتۋدىڭ ءمانى زور. بۇل رەتتە وڭىرلىك جانە شەكارا ماڭىنداعى ساۋدا- ساتتىقتى ارتتىرۋعا، كولىك- ترانزيتتىك سالاداعى سەرىكتەستىكتى دامىتۋعا، جاڭا بىرلەسكەن جوبالاردى قولعا الۋعا باسا ءمان بەرگەن ابزال. ورتالىق ازيانىڭ ورتاق رۋحاني مۇراسىن ساقتاۋ جانە ءبىرتۇتاس مادەني- تاريحي كەڭىستىگىن قالىپتاستىرۋ ءۇشىن گۋمانيتارلىق ىنتىماقتاستىقتى جاڭا قارقىنمەن جانداندىرۋ ماڭىزدى»، - دەلىنگەن قاسىم- جومارت توقايەۆتىڭ ۇندەۋىندە.