قازاقستان قۇتقارۋشىلارى تۇركيادا كۇندىز-ءتۇنى جۇمىس ىستەپ جاتىر

استانا. قازاقپارات – ق ر توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمبايەۆ تۇركياداعى جويقىن جەر سىلكىنىسىنىڭ سالدارىن جويۋ بويىنشا جۇرگىزىلىپ جاتقان ىزدەستىرۋ-قۇتقارۋ جۇمىسىنا قاتىستى سوڭعى اقپاراتپەن ءبولىستى، دەپ حابارلايدى قازاقپارات ءتىلشىسى.

«9- اقپاندا قازاقستان رەسپۋبليكاسىنىڭ قۇتقارۋشىلار توبى تۇركيانىڭ 3 قالاسىندا ىزدەستىرۋ-قۇتقارۋ وپەراتسياسىن جالعاستىرىپ جاتىر. ولاردىڭ قاتارىندا گازيانتەپ، نۇرداعى جانە حاتاي قالاسى بار. قۇتقارۋشىلار ءۇيىندى استىنان 10 ادامنىڭ ءمايىتىن الىپ شىقتى. ودان بولەك، 4 ادامدى تىرىدەي قۇتقاردى. ءبىزدىڭ ماماندار ەكى اۋىسىمدا (كۇندىز، تۇندە) جۇمىس ىستەپ جاتىر. ىزدەستىرۋ-قۇتقارۋ جۇمىسىن جەرگىلىكتى اتقارۋشى ورگاندارمەن بىرلەسىپ جۇزەگە اسىرۋدامىز»، - دەدى يبراگيم كۇلشىمبايەۆ.

ءبىرىنشى ۆيتسە-ءمينيستردىڭ ايتۋىنشا، قۇتقارۋشىلار ءتيىستى قۇرال-جابدىقتارمەن قامتىلعان.

ايتا كەتەيىك، سوڭعى مالىمەتكە سايكەس، تۇركيادا جويقىن ءزىلزالادان قازا بولعاندار سانى 14 مىڭنان استى، تاعى 63 مىڭ 794 ادام جارالانعان.

سونداي-اق، تۇركيانىڭ كاحرامانماراش قالاسىنىڭ ماڭىندا 4,8 بالدىق جاڭا جەر سىلكىنىسى تىركەلدى.

بۇگىن ت ج م يۋري يلين قازاقستاندىق قۇتقارۋشىلاردىڭ جۇمىسى تۋرالى مەملەكەت باسشىسى قاسىم-جومارت توقايەۆقا ەسەپ بەرگەن ەدى.