نەلىكتەن ەر ادامدار ادەمى ايەلدەرگە نازار اۋدارماي، قاراپايىم قىزدى تاڭدايدى؟

استانا. قازاقپارات - سۇلۋلاردىڭ وزدەرىنە ەرلەر نازار اۋدارمايدى دەپ شاعىمدانۋى ءبىرتۇرلى كورىنەدى. شىندىعىندا، بۇل ءجيى ورىن الاتىن جاعداي ونى عىلىمدا - «قار حانشايىمى سيندرومى» دەپ اتايدى.

كلينيكالىق پسيحولوگ دەنيس دولگوۆ ءوزىنىڭ قابىلداۋىندا بولعان ادەمى ايەلدەر كوبىنەسە ەرلەردىڭ ولارعا نازار اۋدارمايتىنىن ايتقان. سونىمەن قاتار، ولار سىرتقى كەلبەتى قاراپايىم ايەلدەر ەرلەردىڭ نازارىندا ەكەنىن بايقاپ، بۇعان تاڭعالادى ەكەن.

پسيحولوگتىڭ ايتۋىنشا، بۇل جەردە ماسەلە، ءبىر جاعىنان، ەرلەردىڭ سەنىمسىزدىگى بولسا، ەكىنشى جاعىنان، ايەلدەردەگى «قار حانشايىمى سيندرومى» بولۋىندا.

«ەركەكتەر كوبىنەسە وزىنە سەنىمسىز تىرشىلىك يەلەرى. ولار كوبىنە كوزدىڭ جاۋىن الاتىن سۇلۋلارعا تىكە نازار اۋدارۋدان قاشادى، وزدەرىندە مۇنداي ارۋعا قول جەتكىزۋگە ەشقانداي مۇمكىندىك جوق دەپ ەسەپتەيدى. ال قاراپايىم قىزبەن كەرىسىنشە سەنىمدى ارالاسادى. ال سۇلۋ ايەلدەر ولارعا ەمەۋرىن بىلدىرسە كوبىسى تاڭعالادى، ويتكەنى ولار ءالى دە ەرلەر ءبىرىنشى بولىپ قادام جاساۋ كەرەك دەيتىن ستەرەوتيپتىڭ تۇتقىنىندا»، - دەيدى دەنيس دولگوۆ ءوزىنىڭ Telegram-ارناسىندا.

قىسقاشا ايتقاندا، باستى ماسەلە - ەرلەر سەنىمسىزدىكتەن قورىقسا، ال سۇلۋلار «قار حانشايىمى» سياقتى ەرلەردەن ءبىرىنشى قادامدى كۇتەدى، ويتكەنى ولار دا ءبىرىنشى ەر ادامدار سەزىمىن ءبىلدىرۋى كەرەك دەپ سانايدى.

«كورىنبەيتىن باسكيىم» سياقتى

قوعامدا ادەمى، اقىلدى، جاقسى جۇمىسى بار، ءبىراق جالعىز ايەلدەر كوپ كەزدەسەدى. ولاردى ەر ادامدار بايقامايتىن سياقتى. ەگەر بىرەۋمەن قارىم-قاتىناستى باستاسا، وتە تەز اياقتالادى.

پسيحولوگ يننا ۆورونوۆانىڭ ايتۋىنشا، جەكە ومىردەگى مۇنداي ساتسىزدىكتەردىڭ ارتىندا، ادەتتە، قورقىنىش جاتىر. بۇل، مىسالى، رەنجىتۋ، قاتەلەسۋ، ساتسىزدىككە ۇشىراۋ، جوعالتۋ، تاستاپ كەتۋ، جازادان قورقۋ جانە ت. ب. بولۋى مۇمكىن. پسيحولوگ بۇل قورقىنىشتاردىڭ وزىندىك باستاۋى مەن سەبەپتەرى بار ەكەنىن ايتادى. ءبىرى بالالىق شاقتان قالعان بولسا، ەكىنشىسى ومىردەگى ساتسىزدىكتەر. بۇل قورقىنىشقا جاۋاپ رەتىندە دەنەدە قورعانىس ءتۇرى - اشۋ پايدا بولادى.

ناتيجەسىندە، قورقىنىش پەن اشۋ ايەلدىڭ اينالاسىندا قابىرعا ورناتادى، ول باسقالارعا: «ماعان جاقىنداما!» دەپ ەسكەرتەدى. پسيحولوگتىڭ ايتۋىنشا، ادامداردىڭ كوپشىلىگى قيىندىقتاردى جەڭۋگە جانە ولاردىڭ سەبەپتەرىن تالداۋعا بەيىم ەمەس، ولار ءۇشىن مۇنداي ادام جولىندا كەزدەسسە اينالىپ ءوتۋ الدەقايدا وڭاي.

massaget.kz