الماتى وبلىسىنىڭ شارۋالارى ەگىستىككە قاجەتتى سۋعا ءۇش ەسە قىمبات تولەپ كەلگەن

تالدىقورعان. قازاقپارات - الماتى وبلىسىنىڭ شارۋالارى سۋارمالى جەرلەرگە قاجەتتى سۋ ءۇشىن ءۇش ەسە قىمبات تولەپ كەلگەن، دەپ حابارلايدى قازاقپارات ءتىلشىسى.

الماتى وبلىسى سىبايلاس جەمقورلىققا قارسى ءىس-قيمىل دەپارتامەنتىنىڭ ماماندارى زاڭسىز كوممەرتسيالىق قىزمەت فاكتىلەرىن انىقتادى. يرريگاتسيالىق جەلىلەرگ مونيتورينگ بارىسىندا اۋىلشارۋاشىلىعى كووپەراتيۆتەرىنىڭ سۋارۋ كانالدارىنا قۇقىقتارى جوق ەكەنى بەلگىلى بولعان. تابيعي مونوپوليالار تىزىلىمىنە كىرمەي، زاڭسىز كوممەرتسيالىق قىزمەتپەن اينالىسقان.

ولار سۋدى قونايەۆ اتىنداعى ۇلكەن الماتى كانالىنان («قازسۋشار» فيليالى) بەكىتىلگەن تاريفكە سايكەس العان، الايدا ونى فەرمەرلىك شارۋاشىلىقتارعا جوعارى باعامەن ساتقان. وسىلايشا، وزدەرىنە مونوپوليست ءرولىن العان.

«رەزەرۆۋارداعى سۋدىڭ قۇنى ۇلكەن الماتى كانالىندا 1 كۇپ مەتر ءۇشىن 0,7 تەڭگە بولسا، اۋىل شارۋاشىلىعى تاۋارىن وندىرۋشىلەرگە گەكتارىنا 20000-28000 تەڭگەدەن بەرەدى. بۇل - ورتاشا ەسەپپەن 1 كۇپ مەتر ءۇشىن 2 تەڭگەدەن اسادى. وسى ارنالاردى سەنىمگەرلىك باسقارۋ جونىندەگى شارتتاردا 24 تەن 2 ەۋى عانا بولا الادى. قالىپتاسقان جاعداي اۋىل شارۋاشىلىعى تاۋارىن وندىرۋشىلەر قۇقىقتارىنىڭ بۇزىلۋىنا الىپ كەلدى. بۇدان بىلاي سۋارمالى سۋدى فەرمەرلەر تىكەلەي ۇلكەن الماتى كانالىنان الادى»، - دەلىنگەن ۆەدومستۆو باسپا ءسوز قىزمەتىنىڭ حابارلاماسىندا.

ماسەلەن، ەڭبەكشىقازاق اۋدانىنىڭ ءبىر عانا قاراتۇرىق اۋىلدىق وكرۋگىندە 272 دەن استام شارۋا قوجالىعى بار. دەپارتامەنت ۇسىنىسى نەگىزىندە تىكەلەي ۇلكەن الماتى كانالىنان 1 كۇپ مەتر ءۇشىن 0,5 تەڭگەمەن شارتتار جاساسۋ ماسەلەسى پىسىقتالدى.

وسىلايشا، ءبىر اۋىلدىق وكرۋگ 42 ميلليون تەڭگەدەن استام قاراجات ۇنەمدەي الادى. سونداي-اق، باسقا اۋىلدىق وكرۋگتەردە تىكەلەي شارتتار جاساسۋ ماسەلەسى قارالىپ جاتىر.